#لارين_تحكي
قربتلو ووقفت قدامو..عديت بعينيا عليه وين شفتو كيفاه ساكت..هزيت بحاجبي نحكي
انا :" شبيك ساكت ؟ جاوبني "
عدا بعينيه عليا يحكي
عيسى:" شتحبني نجاوب ؟ شنوة لهبال لي تحكي فيه هذا ؟"
انا :" ماهوش هبال..تنكر انك كل ماتراني مع خالد تتقلب.. فهمني علاش تعمل هكااا ؟؟ علاش تتصرف هكاا ؟ ف الريستو ف ليون صحت علياا قدام الناس لكل خاطر حكيت معاه وقتلك نجيو معاه لهنااا.. وت لبارح مررتلي السهرية وكشيت علياا خاطر ضحكت معاه وسالتو على صحابو.. وتو.. تو رجعت صحت عليااا قدام الناس لكل خاطر حكيت معاه شوي وقلك رانا تفاهمناا بش نزيدو ايامات.... "
قص علياا يحكي
عيسى :" تراه ف عوض ماتسالني انا.. جرب اسال روحك إذا لي تعمل فيه عادي ولا لا ؟"
انا :" انا شعملت ؟ فهمني انا شنوة عملت غالط ؟ ياخي انا نحكي ف العيب ؟ تجاوزت حدودي معاه ؟.. هاني نحكي قدامك ونضحك قدامك.. كل شي نعمل فيه وانت بجنبي.. وليت نسمع ف كلامك على كل شي.. وليت قبل مانعمل حاجة نخمم فيك انت قبل مانخمم ف روحي.. فهمني انا شعملت عيسى حتى تعيط علياا هكاا وتحشمني قدام الناس وقتلي انت وعدتني معادش تعملهاا "
عدا بيديه على وجهو وغزرلي يحكي
عيسى :" انت شمهبطك الصباح وعلاش حتى تتفاهم معاه بش تبقى... "
قصيت عليه نحكي
انا :" ماتفااااهمتش.. ورحمة نور لا تفاهمت..هو قلي خليكم علاش مروحين غدوة.. قتلو تو نخمم.. انا ماتفاهمت ف شي.. وماحكيت ف شي.. الف مرة نقلك اسألني واحكي معايا بالسياسة.. اما انت ماتنجمش لازم تعيط وتصيح "
عيسى :"انا نصيييح خاطر نراك ماتسمعش لكلام.. قتلك حتى لحديث نقص منووو.. فكرني وقتاه عرفتو خالد انت حتى نجي تو نلقاك جنبك ف جنبو وتحكيو عالعومان "
عديت بعينيا عليه مستغرب كلامو كيفاه ماحبش يفهم.. عديت بيديا على شعري نحكي
انا :" كيف ماتحبني انا نسأل روحي على تصرفاتي.. ننصحك انت زادة اسال روحك علاش قاعد تتصرف هكاا.. انا تعبت من تبرير ليك.. تعبت "
عيسى :" تصرفاتي هاذم من عمايلك انت.. تحبني نفكرك ف البارح ولا نسكت.. راني ماحبيتش نتكلم بش ماتكبرش لحكاية ونقول كلام يغششك "
عقدت بحواجبي مستغربة نحكي
انا :" شعملت انا لبارح؟"
عيسى :" موضوع لبستك لي ريقي شاح عليه.. لي ملبزتو ف خليقتك.. كان جيت مش عاملة هذاكا لكل ف روحك راو حد ماغزرلك ولا تصرف معاك هكاكا "
ضميت على شفايفي شديت دمعتي بالسيف نحكي
انا :" وعلاش عليك مستني بش تقلي لكلام هذا ليوم.. حقك من بارح تكلمت.. حقك ضربتني انا ف بلاصة الراجل خاطر انا قتلووو اغزرلي "
شهقت بالشوي وين دمعتي نزلت ورجعت نحكي
انا :" تعرف حاجة.. انا تعبت وفديت.. من لي احنا ف باريس واحنا قاعدين ندورو فنفس الحلقة.. عملت كل شي على خاطرك.. اما انت مش عاجبك شي.. فديت من عياطك وصياحك.. فديت من غشك.. قد مانحاول نرضيك مانجمتش.. قاعدة نبدل من روحي على خاطرك وشي مش عاجبك.. وبين هذاا لكل انا مش لاقية سبب يخليك تعمل هكاا ونقول ميسالش.. مدام عيسى قال هكاا ميسالش.. مدام عيسى يحب هكاا ميسالش.. خليتني نشك ف كلامي وف تصرفاتي.. وقتلي انا نعمل ف هذاا لكل على خاطرك انت شتعمل.. تقوم تصيح وتعيط علياا قدام الناس... "
قص علياا وعلا ف صوتو شوي يحكي
عيسى:" يااخي انا كنت قاااعد قمت نصيييح وحدي "
انا :" يعني كالعادة تحب ترجع لغلط فياا.. انااا فاش غلطت.. واقفة نحكي معاه ك الناس.... "
تهزيت وتحطيت على صوتو لي علا اكثر يحكي
عيسى :" مااااتحكيييش معاااه.. مانحبش نراااك تحكي معاااه.. مااانحبش نشوفك بجنبووو.. ماانحبكش تضحك معاااه.. افهمممم "
عديت بعينيا عليه نغزر لوجهو لي حمار وعينيه المحلولة فياا.. غير صدرو لي كان يتهز ويتحط من قوة ماينهج لدرجة حسيت ب انفاسو ضربتني.. هزيتلو براسي باهي نحكي
انا :" باهي فهمت.. هاذي آخر مرة بش نحكي معاه.. وغدوة نروحو.. لهناا ويزي عيسى.. معادش عندي طاقة بش نتحمل اكثر من هكا "
عدا بيديه الزوز على وجهو ونفخ بالقوي يحكي
عيسى:" غدوة نروحو وخلي نهار ليوم يتعدا على خير.. هذا اخر تنبيه ليك "
دمعتي نزلت اول ماريتو عطاني بظهرو ودخل لبيتو.. تهزيت وتحطيت مع بابو لي تلطخ.. تكيت بظهري عالحيط وبقيت نرد ف النفس لي حسيتو بش يتقطع علياا.. هزيت راسي وغزرت لباب بيتو وين دموعي نزلو بالوقت.. حسيت روحي تعبت عاللخر نفس الموال وليت عايشة عليه.. قد مانعمل معاه باقي نفس التصرفات.. قد مايوعدني ديما يخلف بوعدو.. مانيش عارفة شنوة لازمني نعمل بش نرضيه..اصلا مانيش فاهمة لتو انا شعملت بكري حتى يتغشش هكاا.. مسحت دموعي ونزلت تحت.. خرجت لتيراس التلاني وقعدت وحدي.. مانعرفش علاش مفماش نهار تعدا علياا لباس.. قد مانحاول نبعد عالمشاكل باقي هي وراياا.. دمعتي نزلت وقت تفكرتو كيفاه لامني عالبارح.. ديما مرجعني انا غالطة وهو الصحيح.. قمت من بلاصتي وقربت وين الدربوز.. خذيت نفس طويل ومسحت دموعي.. حسيت روحي تعبت وراسي وجعني غير قلبي لي باقي يدق بقوة من بارح...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
