#ادم_يحكي
عديت بيديا الزوز على وجهي وبقيت نغزرلهم حتى وصلو لتاكسي.. لحظتهاا تلفتتلو وين شفتو هو زادة يتبع فيهم بعينيه.. ضربتو على كتفو نحكي
انا :" شصاير بينك انت ولارين ؟"
غزرلي على جنب يحكي
عيسى :" ماصاير شي "
قحرتلو نحكي
انا :" اما انت بيرك غارق ياساقط.. ريت نمشي ونجي تحكيلي وبالسيف عليك "
هزلي براسو باهي من غير حتى كلمة.. طبطبت على كتفو نحكي
انا :" ايا خليني نطير انا "
عيسى :" تعمل مزية "
قحرتلو وعطيتو بظهري مشيت طول للتاكسي.. رغم اني ماشي ماخذه فخاطر عيسى اما حاسس روحي مغزل منهاا الفر/خة كيفاه صار لي ف راسهاا وانا بش نوصلهاا..حليت الباب وطلعت ريتها من لمرايا كيف قحرتلي ودورت وجهها علياا.. رسيت على سنيا ودورت المفاتح نحكي
انا :" لارين وين قاصدين ربي قبل ؟"
كبست بيديا عالفولون ك سمعتها هي جاوبت نحكي
مايا :" تي ماو قلنا للكنيسة.. نغنيوهالك "
تلفتتلهاا بكلي وحليت عينيا فيها نحكي
انا :" شوفي انت.. خلي النهار هذاا يتعدا على خيرر.. راني متحملك فخاطر عيسى ولارين "
عصابي فلتت مني ك ريتها هزتني وحشتني بعيناهاا ودورت وجهها.. تلفتت على صوت لارين تحكي
لارين :" مرسي ادم ياخو بخاطرك.. وماايا ماتقصدش هي برك مازالت متغششة من لي صار "
نفخت بالشوي وغزرت قدامي..خدمت التاكسي وشديت الثنية ساكت..اول ماوقفنا فالإشارة هزيت راسي وغزرتلهم كيفاه يحكيو ويضحكو.. عديت بعينيا علاهم وركزت معاها هي.. الفر/خة لي يراهاا من بعيد يقول عاقلة وفينو وهي ظهرت لفعة بسبعة ريوس لسانها أطول منهاا.. ضيقت عينيا مستغرب كيفاه فرنساوية ومسيحية كيفهاا وتلبلب بالتونسي للحظة بكري حسيتها كأنها بنت ربط عايشة سنين فالحومة.. فقت من سرحتي مع صوت التزمير ورايا وين شفت الإشارة ك تبدلت.. نفخت بالقوي ك ريت الطريق كيفاه مسكر والدنيا معبية..للحظة حسيت روحي فديت خاطر اكره مانكره سواقة لكراهب خاصة فوسط لبلاد.. عضيت على شفايفي ك سمعتها تحكي
مايا :" كان مشينا على ساقينا رانا وصلنا "
قحرتلها من لمرايا نحكي
انا :" كان تحبي تو ناقف هناا واهبطي.. مانيش بش نطير انا على خاطرك"
ماايا :" ماعندي وين نهبط.. كمل سوق "
دمي فور مني وعروق راسي ضربت ك ريتها رقصتلي حواجبها تغزل فياا.. كبست عالفولون وبقيت نغزر قدامي نسوق ونسمع فيها كيفاه رجعت تحكي وتضحك.. مسافة الطريق ووصلنا قدام لكنيسة.. غزرتلهم من لمرايا نحكي
انا :" اهبطوا هاني نستنى فيكم حتى تكملو تو نوصلكم وين ماشين بعد "
لارين :" لا ادم عيشك احنا ناوين نبقاو هناا بش نعملو دورة فوسط لبلاد "
انا :" باهي سايسو رواحكم مالا "
ريتها ك حلت ساكهاا وغزرتلي من لمرايا تحكي
ماايا :" قداه طلعت الكورسة ؟"
تلفتت بالوقت وقحرتلها نحكي
انا :" اهبطي.. ماحاجتي بشي كان انك تهبطي وتبعديني "
رجعت شعرها لتالي وسكرت ساكهاا وهبطت من غير ماتجاوبني.. كبست عالبونية متاعي بش مانهبطش نوراهاا كيفاه تطفيني هكاا.. تلفتت على صوت لارين تحكي
لارين:" مرسي ادم..وماتتغشش من ماايا هي ماتقصدش والله "
عديت بيديا على وجهي نحكي
انا :" مانيش متغشش "
تبسمتلي وهزتلي براسها باهي وهبطت طول.. بقيت واقف نغزرلهم حتى دخلو للكنيسة.. خذيت نفس طويل بش نهدى شوي وخدمت التاكسي شديت الثنية لعمك كمال.. مسافة الطريق وكنت عندو.. جربت التاكسي قدامو وتحاسبناا..اول ماكلمت معاه شديت الثنية لورشة باب منارة.. بقيت نتمشى ونخمم شنوة بش نعمل تو مع امي لي تستنى فياا نكلمهاا ف الليل بش نقلهاا شنوة خممت..للحظة حسيت روحي بلحق تنرفزت وكرزت خاطر لعب الذري هذا مانحبوش مانعرفش منين طلعولي بحكاية العرس..اول ماوصلت للورشة تفقدت الخدمةلكل وقعدت بش نكمل حسابات متاع الجمعة.. مانعرفش قداه تعدا علياا وقت وانا مع قاعد مع الصناع.. هكاكا وسمعت تاليفوني نوقر.. غمضت عينيا بالقوي و رجعت حليتهم وقت شفت نومرو امي.. قمت من بلاصتي خرجت لبرا ورديت علاها نحكي
انا :" ااا فطووم "
فاطمة :" وينك ادومة "
انا :" يا أمي يهديك ربي ادومة شنوة لي تقولي فيهاا قدام الجماعة.. مش قتلك مانحبهاش "
ضحكت تحكي
فاطمة :" شيهمني فيهم انا..ندلل فولدي الصغير.. وماتبدلش الموضوع.. انت وينك ؟"
انا :" نخدم "
فاطمة :" وقتاه جاي؟"
نفخت بالشوي نحكي
انا :" امي من لخر انا مانيش جااي.. الموضوع هذا تنساوووه.. انا مانحبش نعرس باكا رحمة "
فاطمة :" علاش ماتحبش ؟ الطفلة شناقصهاا ؟ تربية ومتربية.. زين ومزيانة.. نهارين عديتهم هناا شفتها صوتها ماطلعش.. اكا حدها بيا حاسبتني كيما امهاا.. حرة وتعرف تقضي.. متحجبة.. شتحب اكثر من هكا "
رسيت على سنيا بالقوي نحكي
انا :" تي ربي معاها انا شنعمللها..ياللا الناس ملايكات وهي ملايكتهاا رزينة.. بالسيف ناخذهاا "
فاطمة :" شوف هوما كلمتين.. ياتجي وتشوفها.. يا تنسى اني امك.. لوقتاه ناوي تبقى هامل ندادك بصغارهم يابابا "
انا :" مانجمش نجي عندي خدمة وعم جابر معمل علياا "
فاطمة :" خوذ حتى نهارين.. ومش لازم اول الجمعة فرمضان.. ايجا حتى الجمعة لخرة.. المهم ايجااا "
انا :" باهي يامن حيا.. تو نشوف ونكلمك "
فاطمة :" برا ربي يرضى عليك ويفتحلك بيبان الرزق ونفرح بيك انت ورحمة.... "
قصيت علاهاا نحكي
انا :" اوب اوب حدك هناا فالدعاء.. اياا بش نعلق ورايا خدمة "
علقت علاهاا ونفخت بالقوي من الوحلة لي وحلتهاا.. حسيت روحي غزلت اكثر خاطر نعرفها امي ك تشد صحيح ف حاجة ماترتاح كان متعلمها.. اما المرة هاذي مش كيما كل مرة.. مستحيل ناخذ رحمة ك تكون آخر طفلة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
