#عيسى_يحكي
عديت بيديا على شعري وغزرتلها من بعيد كيفاه تتدرجح.. تبسمت على شكلها كيفاه تعض فالقلم وسارحة..ساعات نحس روحي قاعد نغزر لطفلة صغيرة قدامي.. كل شي تعملو بقصد ولامن غير قصد نحسها تعملو ببراءة.. عملت غطسة وخرجت من الماء قربت خذيت مريولي لبستو وغزرتلها وين شفتها رجعت طبست راسها ترسم.. قربتلها شوي ووقفت نغزرلها كيفاه مركزة مع الورقة لدرجة انها ماحستش بياا واقف حذاها.. ميلت راسي وبقيت نتفرج فيها شتعمل.. تبسمت ك شفت الرسمة لي كانت غاطسة فيهاا ولي كانت تشبهني.. حكيت على جبيني نحكي
انا :" فشنوة غاطسة ؟"
وخرت بخطواتي لتالي اول ماريتها تنطرت وطيحت الكراسة.. تبسمت كيف ريتها دخلت بعضها ووجها حمار.. رجعت شعرها لتالي وغزرتلي نحكي
لارين :" عيسى ؟ شتعمل هنا ؟ مش كنت تعوم ؟"
انا :" اي كنت وخرجت "
شهقت بالشوي اول ماطبست وهزيت كراستها.. قربتلي فيسع تحكي
لارين :" اعطيني متاعي "
طلعت يدي لفوق وعديت بعينيا عالرسمة.. رجعت غزرتلها وضيقت عينيا فيها نحكي
انا :" هاذي تو رسمتها ؟"
عضت على شفايفها تحكي
لارين :" اي عجبتك ؟"
رجعت غزرت لرسمة لي كانت عبارة على عينيا نحكي
انا :" يعني تعدي روحها "
لارين :" شمعناها تعدي روحها ؟ قصدك خايبة؟"
مطيت شفايفي نحكي
انا :" مانعرفش قتلك قبل مانفهمش فالرسم "
لارين :" ساعة انا حاولت نقرب على قد مانقدر بش تطلع نفس عينيك "
دوب تبسمت نحكي
انا :" صار هاذي عينيا ؟"
عقدت بحواجبها تحكي
لارين :" مش باينة هكا ؟"
رجعت غزرت لرسمة وضيقت عينيا نحكي
انا :" لا مش باينة.. ياخي انا عينيا هكا ؟"
لارين :"لاهي عينك احلى بالطبيعة..اما الرسمة تشبهلها والله"
طبست راسي وعديت بعينيا عليهاا.. هزيت بحاجبي نحكي
انا :" نظن لازمك تتدرب اكثر.. طلعت ماكش رسامة كيما تحكي "
شهقت بالقوي تحكي
لارين :" شنوة؟ولي ريتهم ف المعرض شنوة؟ شوف انت ماتفهمتش..مالا ماتحكيش فحاجة ماتفهمهاش "
انا :" انا حكيت حسب لي نرا فيه قدامي "
فكت الكراسة من يدي تحكي
لارين:" ننصحك ثبت "
قربتلي وعدات بعيناها علياا.. هزت يداها وعداتهم على عيني تحكي
لارين:"شوف نفس التفاصيل لي نشوف فيهم قدامي هوما نفسهم فالرسمة..حتى الضربة لي هناا "
عدات بصبعها على حاجبي ورجعت تحكي
لارين :" انا مانسيتهاش رغم انها صغيرة ومش ظاهرة برشة اما اناركزت معاها..عينيك اناحفظتها وحفظت غزرتهاا..كل تفصيلة فيهاا كانت قدامي وانا نرسم فيهاا.. حتى الخط لي يطلعلك هناا "
عدات بكف صبعها بين حواجبي ورجعت تحكي
لارين:" وقتلي تتغشش اناحفظتو وتذكرتو.. رغم اني عندي ايامات ماريتوش خاطرك ماتغششتش..اما انا متذكرتو "
عديت بعينيا عليها وبقيت نغزرلها كيفاه قريبة مني ويداها تتعدا على وجهي..للحظة حسيت روحي سرحت فيهاا ومع لسمتهاا.. عدات بعيناها عليا وغزرتلي درا كيفاه تحكي
لارين :" انا ك نصور حاجة نحبها تطلع حقيقية.. خاطرني نرسمها من قلبي ونعطي فيها لي عندي لكل "
تبسمت نحكي
انا :" يعني انت تحب عينيا ؟"
هزتلي براسها اي تحكي
لارين :" اي ونحب لونها.. ونحب غزرتك لياا "
ميلت راسي وعديت بعينيا عليهاا نحكي
انا :" غزرتي لي هي كيفاه ؟"
قربتلي اكثر وغزرتلي فعينيا.. تبسمت تحكي
لارين :" غزرتك لي نحسها تطمن قلبي..غزرتك لي ماتخوفنيش حتى وقت غشك..لي تفرحني وتخليني نحس انو كل شي مليح خاطر نحسك تحاوطني بيها.. غزرتك ليا تفكرني ف المغترب لي لقى بلادو.. الضايع لي لقى ثنيتو..ساعات نحسك تحكي معايا بغزرتك قبل لسانك..نحسك توجهني بيهاا وانا وليت نفهمك منها "
طبست راسي وغزرت ليداها لي شدتني.. رجعت غزرتلها تحكي
لارين :" اوعدني انك تبقى ديما تغزرلي هكا.. اوعدني ماتبدلش غزرتك لياا جملا "
كبست على يداهاا وهزيت يدي لخرى عديتها على خصلات شعرها نحكي
انا :" نوعدك اي حاجة تفرحك وتطمنك وتخليك مرتاحة انا بش نعملها ومانبدلهاش "
قربتلي اكثر وتكات براسها على صدري تحكي
لارين:" عيسى انا فرحانة.. قلبي فرحان برشة..عندي قداه ماحسيتش هكاا..انا فرحانة تو لدرجة اني خايفة انو تصير حاجة وتنزعلي الفرحة هاذي "
دورت بيديا عليهاا ولزيتها ليا نحكي
انا :" مفما حتى حاجة تنجم تصير وتنزعلك فرحتك.. انا مانيش بش نسمح بهذا..خليك ديما فرحانة وتضحك وكان تحس انو فما حاجة بش تصير وتقلقك ايجا قلي وانا بش نمنعها.. تفاهمنا "
بعدت علياا شوي وهزت راسها معايا تحكي
لارين :" يعني نهرب ليك ؟"
انا :" اي اهرب واشكي لياا واخلي الباقي علياا "
عدات بعيناها علياا وغزرتلي درا كيفاه تحكي
لارين :" وكان تصير حاجة منك انت ؟ لشكون نهرب ؟"
عقدت بحواجبي نحكي
انا :" شنوة بش يصير مني ؟"
لارين:" مانعرفش.. اي حاجة.... "
قصيت علاهاا نحكي
انا :" لارين انا مستحيل نضرك ولا نعملك حاجة تقلقك وتخليك تخمم تهرب مني.. انا قتلك قبل حتى وقت غشي مستحيل نضرك.. يعني نحي الأفكار هاذم من مخك "
هزتلي براسها باهي وضحكت تحكي
لارين :" تو نشوفو "
تنهدت بالشوي ورجعت غزرت لرسمة نحكي
انا :" بش تبقى تكمل رسمتك ولابش تدخل ؟"
عنقت كراستها وضحكت تحكي
لارين :" لا مانيش بش نكملها.. ليوم سوف اكتفي بعينيك مسيو عيسى "
تبسمت نحكي
انا :" مالا ادخل قدامي "
لارين:" اي هياا.. عندي برشة تحضيرات لليلة "
عقدت بحواجبي مستغرب نحكي
انا :" تحضيرات شنوة زادة؟"
ضحكت ورقصت حواجبها تحكي
لارين :" مفاجأة.. ومعادش تسألني خاطر ساعات لساني يفلت "
تبسمت على شكلها كيفاه جرات ودخلت.. الفرخة كل مرة تعمل حاجة ولا تقول كلمة تخليني نشيخ اكثر علاهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
