#لارين_تحكي
خليت خالد قاعد ودخلت طول لبيتي.. سكرت الباب وراياا وقربت شعلت الضو.. عديت بعينيا عالبيت وغزرت لدبشي لي لميتو.. فاللحظة هاذي كان جات عندي القدرة راني خرجت من تو وبعدت وحدي.. قدمت بخطواتي ناحية الفرش وقعدت على قد ماكنت تاعبة لقيت روحي مش منجمة لانتسطح ولانغمض عينيا من التخمام لي بقى ياكل ف راسي.. خذيت نفس طويل وتلفتت بش نشوف تاليفوني وينو بش نكلم مايا.. ضغطت على يدي بالقوي اول مالمحت كراسة الرسم لي فوق التابل دونوي.. قربت هزيتها بالوقت وحليتها وين قابلتني رسمة عينيه لي بقيت نكمل فيهاا.. عديت بعينيا عليها وبقيت نغزرلهاا للحظة حسيت روحي نغزر لعينين واحد مانعرفوش واحد انا صورتو فخيالي هكاا وصدقتو.. صدقت انو فيه نسخة باهية أما اكتشفت اني كنت عمية وقت تغاضيت على حقيقتو انو غول والخايب لي فيه طغى عالباهي.. كلامو لياا بكري ولي عملو خلاو الغشاوة لي فوق عينيا تطيح ونرجع نشوف نسختو الصحيحة لي ريتها اول مرة وتناسيتها من وراء فرحتي لي جرفتني.. خلاوني ننسى كل شي عملو معاياا ونرجع معاه لنقطة الصفر وقت كنت مانعرفوش..للحظة حسيت اني كارهة غزرتو هاذي خاطرها كذبة وهو بكلو كذبة كلامو ووعدو كل شي فيه كذب.. خذيت نفس طويل ومديت يدي قطعة الرسمة طروف طروف وطيشتها تحت ساقيا.. قمت عفست علاهاا ودخلت لسالدوبان وقفت قدام لمرايا وعديت بعينيا على وجهي لي كان تاعب للحظة استغربت حالتي انا علاش هكاا..علاش نبكي عليه وعلى كلامو.. شكونو هو حتى يبكيني..نور علمتني اني مانوطي راسي لحتى حد ومانبكي على خاطر حد خاطرو ماهوش خير مني..انا لي سمحتلو يدخل لحياتي وانا بش نخرجو.. من اللحظة لي رماني فيها برا بيتو وسمعني لكلام هذاكا انا مسحت كل حاجة عشتها معاه وكل حاجة حسيتها ناحيتو..من اللحظة هذيكا هو مسح لارين لي تعلقت بيه وحبت وجودو.. من اللحظة هذيكا انا رجعت لارين لولى ولي شافها اول مرة..طبست غسلت وجهي برشة مرات وقمت هزيت المقص لي كان على جنب وفردت شعري.. بقيت نقص ونصلح فيه بش ماتظهرش الخصلة لي فسدتهالي الكلبة لخرى..اول ماكلمت عديت بعينيا على شكلي كيفاه طلعت وركزتهم عالقصة لخفيفة لي عملتهاا وين حسيت شكلي تغير.. حطيت لمقص على جنب ورجعت للبيت.. هزيت كراسة الرسم متاعي خبيتها ف ساكي خليت الضو يشعل وقربت للفرش تسطحت وعنقت عروسة نور.. على قد مانحاول بش نتقوى نحس روحي مازلت مش منجمة نتقبل لي صار..كيفاه ف نهار واحد حالي تقلب هكاا.. كيفاه لبارح كنت فرحانة وليوم راقدة وحاسة بغضة شادتني فقلبي قبل حلقي.. رمشت عينيا برشة مرات حاولت نمنع دموعي عالنزول..اول ماغمضت عينيا رجعت حليتهم فيسع على صوت الحثلة لي سمعتها قدام الباب.. قلبي ضرب بقوة اول مالمحت خيال من تحت الباب واقف.. حطيت يدي على فمي كتمت شهقتي لي حسيتها بش تخوني وتغلبني وقت حسيت انو هو لي واقف.. على قد ماقاومت دموعي مانجمتش.. حشيت راسي ف المخدة وبقيت نبكي بصوت مكتوم حتى غفيت.. رجعت حليت عينيا على ضو الشمس.. تململت شوي وهزيت روحي شوي تنطرن من بلاصتي اول ماغزرت للوقت..قمت فيسع بش نحضر روحي قبل ما خالد يفيقني.. دخلت نجري لسالدوبان عملت دوش خفيف وخرجت لبست الكابدوبان متاعي ورجعت للبيت.. قربت وين الفاليز حطيتها عالفرش وقعدت بجنبها..حليتها وبقيت نشوف شنوة بش نلبس.. قمت من بلاصتي بعد مااخترت وقرب وين لكوافوز قعدت قدام لمرايا وعديت بعينيا على وجهي.. خذيت نفس طويل وبقيت انشف ف شعري فردتو وراء ظهري وبقيت نعمل ف ميساج خفيف بش نغطي بيه آثار التعب لي كانت ظاهرة ف ملامحي خاطر معادش نحب نشوف روحي هكاا خاطر عمري لا كنت هكاا.. مهما صار فياا قبل كنت ديما ناقف على ساقياا صحيح الوضع غير تو خاطر قبل كانت نور معايا.. اما مش خاطرني وحدي بش نضعف بالعكس بش نكون قوية على خاطر روحي وعلى خاطر نور لي علمتني الشي هذاا.. قمت من بلاصتي بعد مالبست سلسلة نور ومشيت نبدل ف حوايجي اول ماكملت قربت وين لمرايا وعديت بعينيا على شكلي.. تبسمت اول ماغزرت لروحي كيفاه طلعت.. للحظة حسيت اني حتى انا رجعت لنسختي لقديمة لي تلغات وتنفات قدامو.. خذيت نفس طويل وقربت هزيت الشوميز لي كانت ف اللون الأخضر وخفيفة.. لبستها فوق التوب الأبيض والشورط لقصير لي كان تابعو.. طبست لبست بسكاتي وحضرت ساكي حطيت تاليفوني وبرفان متاع نور بعد مارشيت منها.. اول ماكلمت كل شي بقيت نلم ف البيت.. تلفتت بالوقت على صوت الباب لي دق وين سمعت صوت خالد يحكي
خالد :"لارين ؟ لارين فقت ؟"
خذيت نفس طويل حاولت نهدي بيه روحي ونحافظ على قوتي هاذي.. نحكي
انا :" دقيقة ونجي خالد..استناني "
هزيت ساكي وقربت وين لمرايا عديت بعينيا على روحي للاخر مرة وتبسمت.. قربت هزيت فاليزتي وساكي لكبيرة وخرجت وين شفت خالد قدامي.. قربتلو شوي نحكي
انا :" bonjour "
عدا بعينيه عليا وتبسم يحكي
خالد :" اب اب اب شنوة هذا لارين.. ماعقلتكش "
ضحكت نحكي
انا :" merci pour le compliment mr khaled "
قربلي شوي يحكي
خالد :" والله لاهي مجاملة.. اللوك الجديد خرج عليك صحة "
عديت بصوابعي على قصتي وضحكت نحكي
انا :" كملت لي بداتو جيهان "
اول ماتلفتت لمحتو كيفاه كان واقف وعينيه علياا.. لحظتهاا دورت وجهي فيسع وقربت لخالد خاطر آخر حاجة نتمناها تو هي شوفتو قدامي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
