#لارين_تحكي
فقت من سرحتي فيه اول مالغناية وفات.. بعدت عليه شوي وتبسمت نحكي
انا :" نفعدو شوي عالملحفة؟"
هزلي براسو باهي وقعدنا.. عطيتو الديسار متاعو نحكي
انا :" انا حضرت هذا زادة "
خذاها من يدي وتبسم يحكي
عيسى :" يعطيك الصحة "
عديت بعينيا عالبلاصة وبقيت ناكل ساكتة.. شوي وتلفتلو نحكي
انا :" ياخي غادي شفما ؟"
اشرتلو بيدي على حافة الجبل لي كانت مقابلتناا.. هز راسو وغزرلها يحكي
عيسى :" مفما شي.. بلاصة عالية يبقاو فيها "
تبسمت نحكي
انا :" تهزني غادي ؟"
عدا بعينيه عليا وغزرلي مستغرب يحكي
عيسى :" تو ؟"
هزيتلو براسي اي برشة مرات نحكي
انا :" اي امان.. خلينا نمشيو اهيكا مش بعيدة عليناا "
عيسى :" لارين خلي غدوة... "
قصيت عليه نحكي
انا :" مانحبش نستنى لغدوة.. نحب نعمل كل شي الليلة امان عيسى امان "
حط الكاسة من يديه ونفخ بالقوي يحكي
عيسى :"لارين يهديك ربي شوف الدنيا ظلمة وفارغة"
انا :" اي عادي..شي مايصير وانت معايا.. امان عيسى.. خلينا نطلعو مدام فما برشة نجوم الليلة "
عدا بعينيه على الطاولة والشمع يحكي
عيسى :" باهي وهذا لكل ناوية تخليه هنا ؟"
انا :" اي ياخي شكون بش يجي يهزو؟ ونوعدك مانبطاوش امان عيسى..ياسيدي اعتبر هذا اخر طلب مني ليك "
هز بحاجبو يحكي
عيسى :" اخر طلب ؟"
عديت بعينيا عليه مستغربة روحي خاطر ماحبيتش ناكدهاا الجملة.. بلعت ريقي نحكي
انا :" اي اخر طلب "
تنهد بالشوي ووقف.. مد يديه قدامي وين شديت فيه وقمت.. غزرلي يحكي
عيسى :" خلينا نمشيو بالكرهبة فيسع "
انا :" باهي مالا خليني ندخل نلبس صندالي وانت جيب مفاتح الكرهبة "
هزلي براسو باهي من غير حتى كلمة ورجعنا فيسع للدار.. دخلت نجري لبيتي غسلت حالتي ولبيت صندالي وخرجت وين شفتو يسكر فالبيبان والشبابك.. قربتلو شوي نحكي
انا :" علاش تسكر فيهم ؟ شوي ونرجعو "
عيسى :" ولو مايجيش نخليو دار الناس محلولة "
كمل سكر اخر شباك وقربلي.. حل الباب وخرجنا للكرهبة.. طلعت بجنبو وشدينا الثنية.. حليت الشباك وخرجت راسي شوي نستحلى فالنسمة وفرد وقت نغزر للمنطقة لي طلعت محلاها وندمت اني ماخرجتش درت فيها شوي اما ميسالش عيسى قلي غدوة تو نخرجو.. تخظيت مع الكرهبة لي قاعدة تطلع مع الصعدة متاع المنحدر.. سمعتو ك نفخ بالقوي يحكي
عيسى :" عاجبك هكاا كرهبة الناس تو تفسد "
غزرتلو نحكي
انا :" انا حبيت نجيو على ساقينا انت حبيت كرهبة "
قحرلي يحكي
عيسى :" فهمني على ساقيك كيفاه بش تطلع هناا.. الغلطة مني لي سمعت كلامك "
انا :" ياخي على بعدها وزيد هاي مش عالية برشة.. اما انت لي مايعجبك شي "
عوجت شفايفي ك ريتو قحرلي ورجعت نغزر للطريق.. تبسمت اول ما الكرهبة وقفت وغزرت لحافة الجبل لي وقفنا قدامهاا.. نزلت فيسع وجريت وين الحافة.. سمعتو ورايا يحكي
عيسى :" رد بالك "
تلفتتلو وحليت يديا نتحسس ف النسمة نحكي
انا :" ماتخافش علياا..ايجاا.... "
قص علياا صوت تاليفونو لي نوقز.. قربتلو شوي نحكي
انا :" شكون يكلم فيك تو ؟"
حك على جبينو وغزرلي يحكي
عيسى :" دقيقة ونرجع "
هزيتلو براسي باهي وبقيت نغزرلو مستغربة كيف بعد برشة علياا بش يرد على تاليفونو.. عوجت شفايفي وقربت وين الحافة خذيت نفس طويل وطبست راسي نغزر للبحر لي كان تحتي وبعيد علياا بمسافة باهية.. للحظة هاذي مانيش مصدقة اني عايشة هذاا لكل كاني ف حلم محلاه وخايفة نفيق منو..تبسمت ك تفكرت رقصتي بكري مع عيسى وكلامو معايا.. نفخت بالشوي ك حسيت بيه تأخر مانعرفش شكون لي طلبو تو وخلاه يحكي الوقت هذا لكل..حضنت روحي اول ماحسيت بدني رعش من نسمة لي دغدغتني.. هزيت راسي وسرحت مع النجوم والڤمرة لي كانو قراب مني.. فقت من سرحتي على الكاب لي تحط فوق كتافي..تلفتت وين شفتو هورجع وواقف قدامي يغزرلي.. عديت بعينيا عليه نحكي
انا :" كنت نخمم فيك "
تبسم وقربلي اكثر..بعدلي خصلات شعري لي تطايرت مع النسمة يحكي
عيسى :" ف شنوة كنت تخمم فيا ؟"
عديت بعينيا عليه نحكي
انا :" قلت ياريت عيسى يرجع فيسع ويكون بجنبي تو.. رانا قعدنا عالحافة وبقينا نغزرو لنجوم مع بعضنا"
تبسم يحكي
عيسى :" وعيسى بجنبك تو "
كبست عالكاب وتبسمت.. غزرت للبحر ورجعت غزرتلو نحكي
انا :" عيسى تهبل لبلاصة..كنت ديما نحلم نجي كيما هاذي.. تبدأ السماء قريبة مني والنجوم دايرين بياا كانهم بجنبي.. "
عدا بعينيه عليا يحكي
عيسى:" أي حاجة تحلم بيهاا قلي علاها "
هزيت بحاجبي نحكي
انا :" وبش تحققهالي؟"
تبسم وهزلي براسو اي يحكي
عيسى:" اي بش نحققهالك "
عضيت على شفايفي وطبست راسي.. شديتو من يديه وقربتلو.. هزيت راسي معاه نحكي
انا :" ك هكاا انا نحلم تو انك تبقى حذاياا "
كبس على يدي يحكي
عيسى :" هاني حذاك... "
قصيت عليه نحكي
انا :" نقصد ماترجعش تجاوب على حتى تاليفون.. ونقصد نبقاو للصباح هناا.. خلينا نتفرجو ف السماء ممكن يتعدا étoile Filante ونتمناو حاجات مع بعضنا وزادة نبقاو نستناو الشمس حتى تطلع "
عدا بعينيه عليا يحكي
عيسى :" هذا هو حلمك ؟"
تبسمت نحكي
انا :" اي.. انت ممكن تراه بسيط ولا تافه.. اما انا نراه حاجة كبيرة بش تفرحني.. يكفي انك جزء منو "
غمضت عينيا على يديه لي دارت علياا.. جبدني عندو وعنقني يحكي
عيسى :" اي حاجة تفرحك انا بش نعملها.. انت اطلب كهو "
تكيت براسي على صدور ودورت بيديا عليه.. حليت عينيا وبقيت نغزر للسماء ونسمع ف دقات قلبو لقوية لي ماتبعدش برشة على دقات قلبي لي قاعدة تضرب ف صدري من الفرحة..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
