#لارين_تحكي
قمت من بلاصتي بعد ماسمعت النداء متاع رحلتنا.. هزيت ساكي وقربت لخالد لي غزرلي بعد ماسلم عليه نحكي
انا :" عيشك خالد على كل شي.. صدقني فرحت برشة اني عرفتك "
عدا بعينيه عليا يحكي
خالد:" انا زادة فرحت لى عرفتك.. وكيما وصيتك خلينا على تواصل "
هزيتلو براسي اي ومديت يدي سلمت عليه نحكي
انا :" اكيد.. نشوف وجهك على خير "
خالد :" رد بالك على روحك "
هزيتلو براسي باهي وتبسمت.. وخرت بخطواتي لتالي وبقيت نغزرلو كيف قرب لمايا يحكي
خالد:" تشرفت بمعرفتك مايا.. مانوصيكش على لارين.. ردو بالكم على بعضكم "
مايا :" تهنى علاها.. رينو ف عينيا"
خذيت فاليزتي من يديه وهزيت ساكي لخرى على كتفي.. خذيت نفس طويل وقربت مع مايا ناحية باب الخروج.. بقيت نمشي وهو قدامنا.. للحظة حسيت روحي نمشي خطوة لقدام وعشرة لتالي.. حطيت الفاليز متاعي ودخلت لثنية الطيارة بعد ماكملت أجراءات مع العون.. شديت ف مرفق ماياا حبيت نتسند علاهاا.. غزرتلها ك تلفتتلي تحكي
مايا :" رينو شبي يدك ترعش ؟"
ريتو ك غزرلي بالوقت وعدا بعينيه عليا.. تلفتت لمايا ضحكت نحكي
انا :" لا مانيش نرعش..اما تعرفني نخاف من الطيارة اول مرة"
مايا :" ماتخافش هاك معايا "
هزيتلهاا براسي باهي وطلعنا فالطيارة..وقفت وعديت بعينيا نشوف فكرسياا وين..ضغطت على يدي بالقوي ك ريتو مشى ناحية الكرسي لي كان من الجهة ليمين ولي طلع بجنب كرسياا.. لحظتهاا حسيت روحي غزلت فكرة اني نبقى بجنبو اكثر من ساعتين خلاتني نفد ونتخنق.. غزرت لمايا لي تلفتتلي تحكي
مايا :" رينو شبيك واقفة..ابعد خلي الناس تتعدا "
بلعت ريقي وقربتلها شوي.. غزرت لكرسياا ورجعت غزرت لمايا نحكي
انا :" مايا ميسالش نطلب منك حاجة ؟"
مايا :" اي قلي "
خذيت نفس طويل وقربتلهاا وين هو واقف بجنبي يحط فساكو نحكي
انا :" ميسالش نبدلو بلكراسي..ابقى انت فبلاصتي امان "
عدات بعيناها علياا وغزرت لعيسى لي تلفتلي ودور وجهو فيسع.. تحكي
مايا :" اي ميسالش "
انا :" مرسي "
ريتو كيف قعد وغزر قدامو ساكت..كبست على ساكي وقربت لكرسي مايا لي كان من الجهة ليسار فنفس الصف متاع كرسيه.. عوجت شفايفي ك ريت شكون قاعد عالكرسي لي وين شباك.. هز راسو معايا وغزرلي درا كيفاه..تنهدت بالشوي وكبست على ساكي طلعت على طراطيش صوابعي بش نحطها لفوق.. نفخت بالقوي وقت حسيت روحي ماخلطتش ومانجمتش وحدي.. بقيت نحاول ونفارع فيها حتى تحطت.. اول طبست راسي بش نهبط كرسيا ونقعد..شهقت بالشوي عاليد لي جبدتني فيسع يحكي
نزار :" رد بالك "
غمضت عينيا بالقوي وقت حسيت روحي تضربت ف صدرو..رجعت حليت عينيا وغزرت لساكي لي تلطخت فالقاعة ومعاها ساك اخرى.. عضيت على شفايفي وهزيت راسي ننهج ونحكي
انا :" مرسي مسيو "
بعد علياا وطبس هز السيكان الزوز يرجع فيهم.. حطيت يدي على صدري لي بقى يتهز ويتحط من الفجعة وتلفتت على صوت مايا من لكرسي لي مقابلني تحكي
ماايا :" رينو سافا ؟"
هزيتلها براسي اي وغزرتلو وين شفتو يعدي فعينيه بيني انا وراجل.. دورت وجهي وتلفتت على صوتو يحكي
نزار :" تنجم تقعد ف بلاصتي "
انا :" لا ميسالش... "
قص علياا يحكي وتبسم يحكي
نزار :" انا مانحبش القعدة حذا الشباك..وخفت نبقى هناا صاحب الكرسي يتقلق.. اما نظن انت ماكش بش تقلق "
تبسمت نحكي
انا :" بصراحة لا..انا عكسك نحب القعدة وين الشباك"
اشرلي بيديه عالكرسي يحكي
نزار :" كنت متأكد "
قعدت وغزرتلو كيف قعد بجنبي.. ضيقت عينيا فيه نحكي
انا :" شمعناها كنت متأكد؟ "
عدا بيديه على شعرو وضحك يحكي
نزار :" يعني لبنات لكل هكا..يحبو القعدة وين الشباك.. بش تتصور وهاو ستوريات واكا الريق هذاكا"
حطيت ساكي فوق حجري وغزرتلو نحكي
انا :" مش لبنات لكل هكاا.. مثلا انا مانحبش الريق هذا.. انا تعجبني القعدة وين الشباك بش نغزر للسماء كهو "
هز بحاجبو يحكي
نزار :" اي علاش لا "
هزيتلو براسي اي واستويت فقعدتي.. جبدت الكيت من ساكي وحطيتو ف وذنيا..قلبي ضرب بقوة اول ماسمعت انو الطيارة بش تتحرك..نزلت بيديا على ساكي وغمضت عينيا اول ماحسيتها بدأت تتحرك.. مانعرفش كيفاه هزيت يدي فيسع وحطيتها ف يديه اول ماحسيت بالخضة متاع الطيارة لي نخاف منها.. بقيت نازلة عليه هكاكا ومغمضة عينيا حتى حسيتها ركحت ف الجو.. رجعت حليت عينيا وخذيت نفس طويل.. تكيت براسي لتالي وبقيت نتنفس.. طبست راسي اول ماحسيت بصوابعو لي تحركو بين يديا..
حليت عينيا على وسعهم ك شفت يدي لي ضاغطة بقوة على يدين لي بجنبي..رجعت هزيت راسي وغزرتلو وين شفتو يغزرلي ساكت..للحظة ماعرفتش روحي انا كيفاه تصرفت هكا من غير مانخمم ممكن خاطرني فكل مرة نطلع فيها فالطيارة تعودت عالحركة هاذي مع لاخر وقت خوفي.. عضيت على شفايفي وجبدت يدي بالوقت.. شهقت بالشوي ك شفت تراس ظوافري ف يديه لي كانت حمراء.. بلعت ريقي بالسيف وغزرتلو نحكي
انا :" désolé..ماقصدتش والله..انا نخاف من الطيارة ك تطلع ومش بلعاني شديتك..."
قص علياا وضحك يحكي
نزار :" باهي باهي ماصار شي..ماعندك علاش تفسرلي خاطرني فاهمك "
دوب تبسمت من الحشمة لي حسيتها وماعرفتش شنوة نقول.. اول ماحركت عينيا ريتو كيف باقي يغزرلي كيما بكري ومركز معايا.. لحظتهاا بعدت عينيا فيسع ورجعت تكيت بظهري لتالي بش مانرجعش نشوفو.. اصلا مش فاهمة علاش كل مانتلفت نلقاه يغزرلي مش عارفة شنوة مازال يحب مني...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
