#لارين_تحكي
كركرت ساقياا بالسيف ودخلت لبيتي.. سكرت الباب وراياا وتكيت بظهري عليه.. بقيت نغزر قدامي من غير مانرمش عينيا كان دموعي نازلين وراء بعضهم على خدي.. حسيت قلبي تقسم من كلامو لياا..للحظة هاذي مانيش مصدقة انو عيسى بكري قدامي كيفاه هنت عليه يوجعني بالطريقة هاذيكا على خاطرهاا.. عديت بيديا على رقبتي حاولت نتنفس اما مانجمتش كانو لهواء تقطع علياا.. حركت ساقياا بالسيف ودخلت لسالدوبان.. حليت الماء البارد ودخلت لدوش بحوايجي.. استندت بيديا عالحيط قدامي وطبست راسي نتحسس ف الماء لي نازل فوقي.. رغم برودة الماء كنت حاسة ك النار شاعلة داخلي تحرق وتاكل فياا.. غمضت عينيا بالقوي وطرشقت بالبكاء..بقيت نبكي بالصوت على حالتي لي كل مرة نوصللها معاه.. كيفاه كل مرة يوجعني اكثر من المرة لي قبلها..كيفاه نهون عليه بالساهل ويجرحني.. تكيت بجبيني عالحيط قدامي وبقيت نبكي بالغصة لحظتهاا كان لقيت نضرب روحي خاطر انا لي وصلت روحي هكاا.. غلطتي انا لي خليتو كل مرة يتمادى اكثر وقت سمحتلو يتدخل فياا وقت سمحتلو يحكم فياا.. غلطتي انا ك دخلت روحي ف حياتو.. شهقت بالقوي وقت حسيت وجيعة شدتني فقلبي ك تفكرت كلامهاا وكلامو غير منظرهم الزوز..رغم اني عارفة هذا الشي هذا مايخصنيش كيما قال هو اما شي أقوى مني حاسة كيما الحاجة قاعدة تقطع ف قلبي طروف.. هزيت راسي وين حسيت بالماء ف وجهي.. عديت بيديا على وجهي مسحت دموعي لي تخلطو بالماء وسكرت السبالة.. نزلت روبتي ف الدوش وخرجت لبست الكابدوبان متاعي ورجعت للبيت.. بقيت نمشي كاني ف عالم آخر.. للحظة تمنيت كان نهرب من هناا ونبعد خاطر بعد لي صار وسمعتو مستحيل كان مازلت بش نتحمل نشوف وجهو ونسمعو.. دموعي رجعو نزلو وقت تفكرت كلامو لياا الايامات لي فاتو.. مسحتهم فيسع وقربت للفاليز جبدت روبة خفيفة لبستها فيسع وقربت للشباك بش ناخذ نفس.. غصة شدتني ف حلقي اول مالمحتو من بعيد ركب ف الكرهبة مع خالد.. تبسمت وحدي على حالي وين حسيت اني سخفت على روحي.. وخرت بخطواتي لتالي ورجعت للبيت.. سكرت الشباك ورجعت الريدو وين البيت ظلامت.. طفيت ضو وقربت للفرش تسطحت وحضنت روحي.. بقيت نغزر قدامي نخمم شنوة بش نعمل تو.. وين بش نمشي وكيفاه بش نمشي..حشيت راسي ف المخدة ورجعت نبكي من احساس الوحدة لي يخليني نحسو كل مرة.. للحظة حسيت روحي ندمت على كل شي.. ياريتني ماجيت معاه..ياريتني مادخلتو لحياتي هكا.. الف ياريت وياريت.. تغطيت بكلي وحضمنت عروسة نور..غمضت عينيا على أمل اني نرقد ونقوم نلقى انو هذا كابوس ووفى.. تبسمت بين دموعي وقت لمحت خيال نور وقت غمضت عينيا وقتها تمنيت كان جات معاياا تو وحذاياا.. لزيت عروستها لصدري وخذيت نفس طويل من ريحتهاا لي فيها نحكي
انا :" ياريتك ترجع وتهزني من هناا.. ياريتك تجي تهربني من البلاصة هاذي.. ياريت كان انجم نجيك تو ونشدك كيما قبل ونشكيلك من لي صار لكل.. نور امان ايجا هزني حذاك.. امان ايجا بعدني عليه وعلاهم لكل.. ياريت كان انا متت ف بلاصتك بش ماتخلينيش وحدي ف الدنيا هاذي.... "
هزيت روحي وتكيت بظهري عالفرش.. مسحت دموعي وبقيت نغزر ف الفراغ قدامي نخمم كيفاه بش نمشي خاطر مانيش متحملة وجودي هناا تو.. قمت من بلاصتي وهزيت فاليزتي فيسع.. حطيتها عالفرش وبقيت نلم ف حوايجي من غير مانخمم ف حتى شي كان اني نخرج من الدار هاذي خاطر مع كل دقيقة تزيد تتعدا كل مانزيد نحس بالخنقة تزيد فياا.. سكرت الفاليز حطيتها على جنب وبقيت نحضر ف ساكي لخرى.. حطيت عروستي وخبيت كل شي كان عالكوافوز ف الساك لكبيرة.. حطيتها بجنب الفاليز قدام الباب وقربت وين لمراياا وين شفت وجهي كيفاه كان احمر وعينيا منفوخين.. لميت شعري لفوق وقعدت لبست صندالي وقمت..هزيت تاليفوني وحطيت رقم ماياا بش نكلمها تقلي شنعمل وكيفاه تعرضني.. حليت عينيا على وسعهم اول ماهزيت راسي وغزرت للباب لي تحل وشفتها هي قدامي.. لحظتهاا مانعرفش كيفاه هديت علاهاا وصحت على علو صوتي نحكي
انا :" اخرررررج.. اخرررررج من بييييتي "
عدات بعيناها علياا تحكي
جيهان:" شبيك على عصابك صغرونة.. ساعة انا جيت نتفقد فيك.. سمعتك تبكي... "
ميلت راسها وضحكت تحكي
جيهان :" ماتقليييش عيسى سبب دموعك هاذم "
ضغطت على يدي بالقوي من الغزول لي ركبني للحظة حسيت روحي كاني نشوف ف شيطان قدامي.. قربتلها ودزيتهاا على قوة جهدي بالقوي نحكي
انا :" ابعدددنييي.. ياااخي شتحببب منيي انتتت.. ابعدددنييييي "
حلت عيناها فيا وقربتلي شدتني من مرفقي بالقوي وهزت يداها لخرى شدتني من شعري وين صحت من لوجيعة لي حسيتها.. كبست علياا بالقوي تحكي
جيهان :" مازااال بيناتنااا حساب آخر ماوفاااش "
حطيت يدي فوق يداها لي على شعري حاولت نفكها نحكي
انا :" سييييننني.. اااا نححيي ييييدك "
نزلت علياا اكثر وجبدتني بالقوي وراها ويداهاا باقي ف شعري.. بقيت نفااارع فيهاا وشي مانجمتشش حسيت جهدي وفى ومانجمتش نبعدها عليا.. حليت عينيا على وسعهم ك شفتها هزت لمقص لي كان عالطاولة تحكي
جيهان:" مدامناا وحدناا شرايك نعملك كوب جديدة.. احلى من الكوب لي عملتهالي انت "
اطرافي نملت وانا نشوف ف المقص لي تحل قدامي.. للحظة حسيت روحي ترعبت منها ماعرفتش كيفاه بش نبعدهاا علياا وهي كابسة علياا هكاا بالقوي...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
