#لارين_تحكي
حطيت الاصحنة فوق الملحفة لي فرشتها عالرمل مقابل الشط ورجعت لدار..عديت بعينيا عليها وين لقيتو مازال فبيتو..دخلت فيسع للكوجينة هزيت البيتزا والفريت وخرجت بش نكمل نحضر كل شي قبل مايخرج.. حطيت كل شي فبلاصتو وبعدت شوي..عديت بعينيا عالتحضيرات لي كانت كيما تخيلت انا.. تلفتت على صوتو ورايا يحكي
عيسى :" كملت ؟"
بعدت شوي واشرتلو بيدي نحكي
انا :" شرايك ففكرتي؟ مش خير من الطاولة ؟"
قرب ناحيتي وعدا بعينيه عالقعدة.. رجع غزرلي وتبسم يحكي
عيسى :" اي خير "
انا :" خلينا نقعدو.. لعشاء برد "
هزلي براسو باهي وقعد.. تبسمت ك ريتو مدلي يدو.. شديت فيها وقعدت بجنبو.. عضيت على شفايفي ك ريتو يغزرلي وين حسيت روحي حشمت.. خذيت نفس طويل نحكي
انا :" محلاها القعدة..ميسالش مدامنا هنا نتعشاو كل ليلة هكا ؟"
عدا بعينيه عليا يحكي
عيسى :" بالطبيعة ميسالش "
تبسمت وطبست راسي.. عطيتو صحنو نحكي
انا :" تراه ذوق وقلي رايك ؟"
خذا الصحن من يدي يحكي
عيسى:" يعطيك الصحة "
درتلو بكلي وبقيت نتبع فيه بعينيا وهو ياكل نستنى ف رايو.. نحكي
انا :" بنينة مش هكا ؟ كان لاميسالش برا اعمل عجة معادش بش نتغشش "
عيسى :"ماعندي علاش نعمل عجة..والله ناوي نتعشى البيتزا متاعك "
انا :" يعني عجبتك ؟"
هزلي براسو اي يحكي
عيسى :" عجبتني برشة "
ضحكت وطبست راسي خذيت صحني وذقت شوي منهاا.. غمضت عينيا ورجعت حليتهم نحكي
انا :" اممم يعطيني الصحة.. ريت وانت كنت حاقرني"
عيسى:"انا عمري لاحقرتك..اما مافيباليش بيك تعرف "
انا :" انا لحق البيتزا جربتها وحدي مرة كهو..مرة على خاطر نور والمرة هاذي على خاطرك انت "
عدا بعينيه عليا وغزرلي درا كيفاه يحكي
عيسى :" وهاذي ابن بيتزا انا كليتها "
انا :" ك هكا تو نعود ديما نحضرلك.. اصلا انا قاعدة نتعلم ف برشة حاجات..كل مرة تو نذوقك حاجة "
تبسم يحكي
عيسى :" باهي تفاهمناا "
طبست راسي ورجعت ناكل وفرد وقت نغزرلو كيفاه ياكل معاياا وين حسيت روحي فرحانة وكأني طايرة.. عديت بعينيا عالبحر لي كان يلمع مع ضو القمرة نحكي
انا :" محلاه الطقس.. كان نلقى نرقد هنا "
عيسى :" كان ماتخافش ارقد "
غزرتلو وقربتلو شوي نحكي
انا :" مدامك معايا مانخافش "
عدا بعينيه عليا وغزرلي درا كيفاه ساكت.. استويت ف قعدتي وضحكت.. غزرلي يحكي
عيسى:" شبيك تضحك؟"
مسحت يدي وغزرتلو نحكي
انا :" نضحك خاطر تفكرت كيفاه كنت نخاف منك "
هز بحاجبو يحكي
عيسى:" كنت ؟ يعني تو معادش تخاف مني ؟"
انا :" لا معادش.. يعني معادش نخاف منك كيما اول مرة ريتك فيهاا..وقتها كنت كان نلقى معادش نشوفك جملاا..كنت نبعد من الثنية لي انت تكون فيها..اماتو معادش بالعكس وليت نحب نشوفك ديما..ونحب نكون موجودة فالثنية متاعك خاطر فيها نحس روحي مطمنة وفرحانة "
دارلي بكلو وعدا بصوابعو على خصلات شعري يحكي
عيسى:"وانا مانحبكش تخاف مني.. مهما يصير رد بالك تخاف "
انا :" مالا معادش تتغشش علياا"
عدا بعينيه عليا وغزرلي درا كيفاه يحكي
عيسى:" حتى ك نتغشش ماتخافش..خاطر مانيش بش نضرك "
تبسمت نحكي
انا :" نقلك حاجة ؟"
تبسم يحكي
عيسى :" قلي حاجة "
انا :"ليوم حسيت روحي فرحانة اكثر من السفرة لولى..وحسيت بنفس الراحة لي كنت حاستها ف باريس وقت انت معايا..يعني طلعت مش لبلاصة لي مهمة "
عدا بعينيه عليا وغزرلي درا كيفاه.. تبسم يحكي
عيسى :" مالا شنوة لي طلع مهم "
عضيت على شفايفي نحكي
انا :" المهم انك تكون انت موجود ف البلاصة "
قربلي شوي وعدا بعينيه على وجهي يحكي
عيسى:" اي بلاصة تكون انت موجودة فيها بش تلقاني "
انا :" توعدني ؟"
عيسى:" نوعدك..إذا هذا لي يريحك ويفرحك انا نوعدك بيه "
انا :" وانت مرتاح ك تكون موجود معايا ؟ يعني انا مانحبش نجبرك ونخمم كان ف راحتي "
حك على جبينو وتبسم يحكي
عيسى :" تهنى مانيش مجبور..و ك تكون انت مرتاحة انا نبدأ مرتاح "
تبسمت وغزرت قدامي.. حسيت قلبي يدق بالقوي من الفرحة لي حسيتها من كلامو.. للحظة ماحبيتش نخمم ولا نسأل روحي انا علاش حاسة هكا.. كل لي حبيتو اني نعيش اللحظات هاذم خاطرني حاسة فيهم حاجات حلوين.. تلفتت على صوتو يحكي
عيسى :" فاش سارحة؟"
عضيت على شفايفي نحكي
انا :" لا مانيش سارحة.. خليني نقوم نلم هذا ونحضرلك التاي متاعك "
شدني من يدي اول ماقمت.. قعدني بجنبو يحكي
عيسى :" اقعد ارتاح.. تو نلموها بعد مع بعضنا وانا تو مانحب شي "
غزرت ليديه لي بقات كابسة على يدي وين حسيت بدقات قلبي قوات.. بلعت ريقي وهزيت راسي معاه نحكي
انا :" باهي كيما تحب "
عيسى :" قلي غدوة شنوة تحب تعمل؟ شرايك نخرجو؟"
انا :" ميسالش نأجلوها الخرجة؟"
عيسى :" اي بالطبيعة.. انا عليك انت قلت ممكن تحب تشوف لبلاصة "
انا :" لا مانحبش..خلينا نبقاو ف الدار خير "
عيسى :" باهي نبقاو ف الدار "
تكيت براسي على كتفو وغزرت للسماء..تبسمت نحكي
انا :" الليلة لقمر بدر "
عيسى :" اي "
هزيت راسي معاه وغزرتلو.. عديت بعينيا عليه وركزتهم مع لون عينيه الازرق لي كان واضح مع ضو القمرة..نحكي
انا :" غدوة ممكن نحط نرسم شوي "
عيسى :" شنوة بش ترسم ؟"
انا :" مانعرفش..اي حاجة المهم فيها اللون لي نحبو "
عيسى :" الازرق ؟ هاو قدامك برشة حاجات.. بحر وسماء.. تفنن "
قصيت عليه نحكي
انا :" لا انا ف بالي حاجة أخرى "
عيسى:" شنوة هي ؟"
انا :" مانقولش "
تبسمت ورجعت غزرت قدامي.. مانعرفش قداه تعدا وقت واحنا ساكتين اصلا كل مانخمم نقول كلمة نحس كلامي ضاع كاني مالقيتش وصف يوصف لي حاسة بيه تو..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
