#لارين_تحكي
بقيت نمشي ساكتة تفكيري لكل فكلام خالد..كان جيت نهمو بلحق راو يهمو غشي زادة.. اما هو مايهمو شي كان انو كلمتو تمشي عالكل.. غمضت عينيا بالقوي ورجعت حلتهم على ريحتو لي بقات عالقة فياا لحظتهاا رجعت تفكرت كلامو كيفاه طلب السماح مني وانو مايحملش دموعي.. للحظة حسيت روحي معادش فاهمتو خاطر كلامو شي وتصرفاتو شي وانا مش عارفة شكون نصدق.. نخاف كان نسامحو يرجع يعمل هكاا..بقيت نمشي مش حاسة بالثنية الطويلة شوي..طبست يدي على يد خالد لي شدتني يحكي
خالد:" لارين أقف.. لكراهب متعدية شبيك "
انا :" كنت سارحة "
هزلي براسو باهي وكملنا الثنية..قلبي ضرب بقوة على تلفيتي وين شفتو وراياا بالكرهبة.. رجعت دورت وجهي عليه بش مانراهوش.. اصلا مش عارفة علاش مامشاش شنوة مازال يحب مني.. حطيت يدي على كرشي لي جاعت وين حسيت روحي تنرفزت عليه اكثر خاطرو ديما مررلي حياتي..مسافة الطريق ووصلنا للفيلا.. اول مادخلت ريتو كسبقنا ومراكي الكرهبة واقف متكي علاها يستنى فينا.. نفخت بالشوي وغزرت لخالد نحكي
انا :" انا بش ندخل "
هزلي براسو باهي.. قدمت بخطوات سريعة وثابتة من غير مانغزرلو..ضغطت على يدي بالقوي كوصلت ناحيتو وتعديت قدامو وين حسيت روحي تربثت.. بلعت ريقي وتعديتو فيسع.. خذيت نفس اول مابعدت عليه ودخلت.. طلعت فيسع للبيت قبل مايدخل.. سكرت الباب وراياا وقدمت للفرش.. طبست نحيت بسكاتي وترميت عالفرش بحوايجي.. حشيت راسي فتلمخدة حاولت نرقد شوي بش ننسى لي صار ونعدي نهار ليوم..حتى لعشاء ماحبيتش نهبط بش مانشوفوش.. رجعت هزيت روحي كتفكرت ساكي مش عارفة وينو اخر مرة خليتهم .. وقفت بش نخرج حتى نسأل خالد اما تراجعت خاطر اكيد راو معاه.. رجعت تكيت وغمضت عينيا.. مانعرفش قداه تعدا علياا وقت حتى رجعت حليت عينيا وين شفت الدنياا ظلامت..قمت من بلاصتي بس ندخل لسالدوبان نعمل دوش ياخي وقفت على صوت الباب لي دق..عديت بعينيا عليه نخمم زعمة هو.. عضيت على شفايفي ك سمعتو دق مرة اخرى.. قربت فيسع حليتو وين شفتو قدامي..هز راسو معايا وغزرلي درا كيفاه يحكي
عيسى :" كنت راقدة؟"
رديت الباب شوي نحكي
انا :" شتحب ؟"
عيسى:" جبتلك عشاك "
قلبي دق اول ماغزرت للطبق لي كان فيديه كيما حسيت روحي جعت اكثر.. رجعت غزرتلو نحكي
انا :" احم.. ماعينيش... "
قص علياا يحكي
عيسى :" لارين انت من الصباح ماكليت شي.. شد تعشى "
دورت وجهي عليه نحكي
انا:" قتلك مانحبش.. ياريت تمشي من هنا "
حليت عينيا على وسعهم كريتو حط يديه عالباب دزو ودخل.. ضغطت على يدي وتلفتتلو نحكي
انا :" عيسى اخرج من بيتي "
حط الطبق عالطاولة وترمى عالفوتاي يحكي
عيسى :" تتعشى نخرج "
لطخت الباب ورايا وقربتلو نحكي
انا :" وانا قتلك مانيش بش نتعشى..شنوة بش توكلني بالسيف "
هز بحاجبو يحكي
عيسى:" كان تصحح راسك اكثر من هكاا صدقني نعملها "
انا :" عيسى اخرج نحب نرقد "
عيسى :" ايجا اقعد "
قربتلو اكثر ووقفت قدامو نحكي
انا :" ياخي ماتفهمش كقتلك ماعينيش ومانحبش نراك ومانحبش نحكي معاك برا... "
شهقت بالقوي كِشدني مني وجبدني قعدني بجنبو.. عدا بعينيه علياا يحكي
عيسى:" شبيك تحكي ياسر "
بلعت ريقي وبعدت عليه شوي نحكي
انا :" خاطر انت ماتفهمش "
عيسى :" لا فاهم.. اما كل حاجة فبلاصتها.. حط غشك على جنب وتعشى "
قحرتلو نحكي
انا :" على اساس نهمك انا "
تبسم يحكي
عيسى:" حسب رايك انت ؟"
ربعت يدي وغزرت قدامي نحكي
انا:" مانعرفش "
بدني رعش على يديه لي شدتني من زنودي.. دورني قدامو وقربلي.. عدا بعينيه علياا يحكي
عيسى:" كان ماجيتش تهمني راني مانيش حذاك تو.. كان ماجيتش تهمني راني ماخفتش عليك بكري ومالوجتش عليك... "
قصيت عليه نحكي
انا :" انت تعمل فهذا خاطر انا أمانة بعثها جابر معاك مش خاطر نهمك..كان جيت نهمك بلحق راك ماعملتش فياا هكا ليوم "
تنهد بالشوي يحكي
عيسى :" شوف لارين انا عمري لابررت تصرفاتي لعبد.. اما معاك انت هاني بش نبرر حتى تفهمني.. لي صار الصباح انت تعرف مليح انك غالطة فيه.. لارين فهمني انت كيفاه تحب تخرج هكاكا؟ ترضى الناس تراك بروبة هذيكا؟ كان انت ترضى انا مانرضاش..الله غالب انا هكاا..ك شفتك الصباح قدامي ورحمة بابا لاكنت بش نقلك ماتمشيش بالعكس اما ك لقيتك ناوية تخرج هكاكا تنرفزت.. من لي كنا فتونس وانانقلك ماتلبسش عريان.. نعرف انك كنت عايشة فبيئة غير بيئتي.. وانك متعودة بنظام غير نظامي..اما بالنسبة ليا انا العيب عيب ف البلايص لكل..قتلهالك قبل ونرجع نقولهالك كان ماجيتش نراك حاجة غالية مانكلمكش نقول شيهمني فيهاا خلي تلبس كيما تحب وخلي يغزرولها "
ضميت على شفايفي شديت دمعتي بالسيف نحكي
انا :" ديما نقلك احكي معايا بالسياسة..والله كنت بش نفهمك كيما تو "
حط يديه على خدي مسحلي دمعتي يحكي
عيسى :" نوعدك تو نولي نحكي بالسياسة "
انا :" باهي على لبستي وفهمتك..ولي صار فالريستو ؟"
عدا بيديه على وجهو يحكي
عيسى:" لي صار ف الريستو لحظة غش مانجمتش نتحكم فعصابي "
انا :" شنوة لي خلاك تتغشش هكاكا؟ شنوة فيها كان قتلك نمشيو ؟"
عدا بعينيه عليا وغزرلي درا كيفاه يحكي
عيسى :" مافيها شي.. هياا تعشى "
ريتو ك طبس راسو وقربلي الطبق.. عدا بعينيه علياا يحكي
عيسى:" تعشى وحدك خير مانوكلك انا بالسيف "
قحرتلو وطبست راسي ناكل.. ريتو كتبسم وتكا بظهرو لتالي يغزرلي.. بقيت نتعشى من غير مانغزرلو ولا نحكي معاه..مهما يقول المرة هاذي حاسة روحي باقي متغششة...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
