#لارين_تحكي
عديت بعينيا عليه من غير حتى كلمة.. هز بحاجبو يحكي
نزار :" وين سرحت ؟"
عديت بيديا الزوز على وجهي وتكيت بكتفي عالكرسي نحكي
انا :" لا ماسرحتش.. اما بقيت نخمم ف سؤالك "
نزار :" ولقيت اجابة ؟"
تنهدت بالشوي نحكي
انا :" لاا.. يعني انا مش كيفك.. انت كنت مهيئ روحك لظروف لي واجهتهم.. انا لا كل شي جا فجأة ووراء بعضو.. لقيت حياتي تقلبت ف ليلة ونهار وقتلي كانت stable "
نزار :" كلامك صحيح.. وزيد انت مازلت صغيرة مازال قدامك الوقت بش ترسم خطط جديدة ف حياتك المهم ماتبقاش واقفة لارين تتحصر على الظروف "
عديت بعينيا عليه وين لقيت روحي استرجعت لي صار لكل كيما تفكرت كلام خالد لي كان يشبه لكلامو.. تنهدت بالشوي نحكي
انا :" اي انشالله..احكيلي انت شنوة الخطة متاعك؟ يعني شنوة ناوي تعمل ف تونس ؟"
حك على جبينو يحكي
نزار :" انا مازلت كيف كملت تحضير شركة ازياء واعلانات متاعي..مانكذبش عليك حاجة صغيرة مازلت ف اولها..بش نبدأ بالشوي ولقيت شكون يشاركني من فرنساا.ناوي نخدم بين تونس وباريس "
هزيت حواجبي وتبسمت نحكي
انا :" فكرة حلوة والله.. بقدرة ربي مع الوقت تو تكبر الشركة ومدامك تحب خدمتك اكيد بش تنجح "
تبسملي يحكي
نزار :" انشالله هاني قاعد نخدم ولي كاتب يستنى "
هزيتلو براسي اي من غير حتى كلمة..تكا بظهرو لتالي يحكي
نزار :" قلي انت مازالت تقرأ؟"
انا :" لا وقفت الفترة هاذي..انا كنت مستقرة ففرنسا وتو نقلت لتونس.. انشالله مع العام الجديد بش نسجل ف جامعة ونكمل قرايتي "
عقد بحواجبو يحكي
نزار :" بش تقرا beaux-arts مش هكا؟"
انا :" اي اكيد "
نزار :" مالا ناوية تقرأ خاص ؟"
عديت بعينيا عليه مستغربة نحكي
انا :" لاا علاش ؟"
استواء ف قعدتو يحكي
نزار :"حسب مانعرف جامعات ال beaux-arts فتونس كلهم خاص..العموم موجودين كان فولايات غير العاصمة "
انا :" بلحق ؟ وشنوة الولايات هاذم ؟"
نزار :" والله نسيت اما حسب مانتفكر ف وقتي انا.. فما ف المهدية وسوسة غادي "
عضيت على شفايفي من غير حتى كلمة.. عدا بعينيه علياا يحكي
نزار :" اقرا خاص وكهو كان ماتحبش تبعد على داركم"
عوجت شفايفي نحكي
انا :" مش حكاية دارناا ولا بعد.. اما صعيب انو نقرأ خاص.. يعني مانكذبش عليك انا زادة.. ظروفي ماتسمحش "
عدا بعينيه عليا يحكي
نزار :" فهمتك.. والمرة هاذي انا لي عذرتك خاطرت تعديت بالحكاية هاذي.. انا من 10 سنين مانجمتش نقرأ خاطر ظروف بابا مكانتش تسمحلي.. يعني احنا كنا ومازلنا عايلة بسيطة "
تبسمت نحكي
انا :" وشنوة عملت حتى وصلت لهنا ؟"
نزار :" عملت على روحي.. خدمت لي تتصور ف مخك.. سرفور ف القهاوي.. صانع ميكانيكي.. بناي.. كنت نخدم ونقرا.. وحتى ك سافرت لفرنسا بقيت هكاا.. بقيت 3 سنين نغسل ف الماعون ف مطعم.. لي يحب يوصل لحاجة يضحي ويتعب..هاذي نصيحتي ليك لارين "
فركت يديا ف بعضهم نحكي
انا :" المشكل اني مانعرفش تونس مليح انا.. انا زادة خدمت ف فرنسا.. بعت فخار ورسومات اما ف تونس مانعرفش "
عدا بعينيه عليا وغزرلي درا كيفاه يحكي
نزار :" شرايك نقدملك عرض صغير متأكد انو بش يعاونك وفرد وقت انت بش تعاوني بيه "
هزيت بحاجبي نحكي
انا :" عرض شنوة ؟"
نزار :" تكون انت مصممة الازياء فشركة متاعي.. انا لتو مازلت نعمل فمقابلات العمل.. وبلحق ماصادفت حتى وحدة ف ربع موهبتك.. والخدمة مافيهاش ضغط تنجم تخدم حتى فداركم وتجي للشركة مرة ولا ثنين ف الجمعة كهو بش تجيبلي التصاميم ولا بش نتفاهمو عالخدمة.. هكا انت تلم فلوس بش تنجم تقرأ "
عديت بعينيا عليه نخمم ف كلامو.. عضيت على شفايفي نحكي
انا :" مانعرفش.. يعني انا مانيش مصممة انا رسامة اي اما التصاميم مازلت قاعدة نتعلم.. نخاف لا نقلك اي ونوافق نلقى روحي مانيش قد الخدمة ونعطلك "
تبسم يحكي
نزار :" قتلك انا لياا 10 سنين ف المجال هذاا وريت تصاميم أشكال والوان يعني نفهم مليح شنوة شفت تو وفاش قاعد نقول.. انت بلحق محترفة ماكش قاعدة تتعلم..غير اعطي فرصة لروحك "
رجعت قصتي لتالي نحكي
انا :" بلحق مانعرفش.. يعني عرضك جاء فجأة... "
قص علياا يحكي
نزار :" لارين فكر ف الصدفة هاذي.. ممكن من حظك انك قعدت بجنبي وشفت تصميمك بش تاخذ الخطوة هاذي وتنجح.. خلي عرضي هو ل plan b متاعك..انت مازلت صغيرة اخدم على روحك وخلي اسمك يتعرف وانا مستعد نعاونك "
ريتو ك حط يديه فجيبو وجبد حاجة..عديت بعينيا عليه وطبست راسي غزرت للكارت فيزيت لي كانت ف يديه قدامي يحكي
نزار :" من غير ماتقرر تو.. عندك الوقت الكافي بش تخمم فكلامي..العرض لي قدمتهولك تو فرصة خاصة لطفلة كيفك.. فكر مليح لارين "
عضيت على شفايفي ومديت يدي.. خذيت الكارت من يديه وعديت بعينيا عليهاا.. خذيت نفس طويل ورجعت غزرتلو نحكي
انا :" نوعدك بش نخمم وبش نكلمك ف أقرب وقت زادة.. ممكن العرض هذا جا ف وقتو "
عدا بعينيه عليا وغزرلي درا كيفاه.. تبسم يحك
نزار :" بش نستناك.. ونوعدك انك مستحيل تندم.. انا وانت بش نتفاهمو مليح "
كبست عالكارت اكثر وتبسمت نحكي
انا :" انا زادة حاسة هكا مسيو نزار"
تبسم يحكي
نزار :" نزار.. من غير القاب "
هزيتلو براسي باهي ورجعت غزرت للكارط متاعو نخمم ف العرض متاعو.. ممكن هاذي فرصتي بش نكوّن شخصيتي ونتحرر من الدار هذيكا ونبعد علاهم لكل.. كيما تكون فرصتي بش نوصل موهبتي لي علمتهالي نور ونخليها تكون فخورة بياا أكثر..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
