#لارين_تحكي
ترميت عالفوتاي وراياا نغزر للباب لي تسكر وين دمعة سخونة نزلت مني..للحظة حسيت روحي فقدت لقدرة لا نجمت نتحرك ولا نقوم..حتى صوتي حسيتو هرب عليا من وراء لي صار..اصلا للحظة هاذي مانيش منجمة نستوعب جرءتو كيفاه دخل علياا للبيت ووقف قدامي يحاسب فيا..كيفاه نجم ينسى ليعملوو بسهولة هكا وراجع عادي يحب يعرف ويتدخل فحياتي كأنو ماصار شي..للحظة حسيت روحي بلحق دخلت بعضي من كلاموو ليا معادش فاهمة هو شيحب مني.. علاش قاعد يحوم حواليا هكاا وقتلي هو لي طلب مني نبعد.. مسحت دمعتي فيسع وغزرت للباب لي تحل وين شفت مايا دخلت.. قربتلي فيسع تحكي
ماايا :" ياخي عيسى كان ف البيت حذاك ؟"
ضميت على شفايفي وهزيتلها براسي اي من غير حتى كلمة.. قعدت بجنبي وشدتني من يدي تحكي
مايا :" رينو شفما ؟ ريتو تو ك خرج يجري ووجهو مقلوب.. شصار بيناتكم ؟"
شهقت بالشوي نحكي
انا :" مانعرفش شفما والله لاعاد عارفة شي.. مانيش عارفة شنوة نقول خاطرني بلحق معادش فاهمة "
قامت من بلاصتها خذات كاسة الماء لي فوق التابل دونوي ورجعت حذايا.. عطاتهالي تحكي
ماايا :" شد اشرب واهدا قبل "
خذيتها من يداها وبقيت نشرب بالشوي ونرد ف النفس فرد وقت.. خذاتها من يدي اول ماكلمت تحكي
مايا :" احكيلي شصار من الاول "
عديت بيديا الزوز على وجهي وبلعت ريقي بالسيف نحكي
انا :" خالد طلبني..ولاخر شاف رقمو فتاليفوني ياخي خلط عليا للبيت يسأل فيا شنوة بيني انا وخالد وعلاش يطلب فيا.. عاد انا قتلو شيهمك ياخي بقى يحاسب فيا مافهمتش علاش..يعملي من حقي نعرف وانت تخصني..وانا لي نقرر شنوة بيناتنااا.. وتقف قدامي يصيح ويعيط..مايا انا معادش فاهمتو.. من جهة يقلي ابعد علياا ومن جهة يحاسب فياا.. هو شيحب مني بالضبط مافهمتش "
شدتني من يدي لي كانت ترعش وعدات بعيناها علياا تحكي
ماايا :"حسب لي فهمتو من كلامك..ممكن عيسى يكون غاير عليك من خالد "
حليت عينيا فيهاا وين حسيت بدقة قوية ف قلبي.. هزيتلها براسي لا نحكي
انا :" لا لا مش صحيح.. هو ماعندو علاش يغير..لي يغير على عبد يعني يحس فحاجة ناحيتو وهو مايحس فشي ناحيتي.. كان جا يحس فحاجة راو ماطلبش مني نبعد عليه..راو ماخلانيش..راو مارضاش يبكيني..هو يعمل ف هذا خاطر استانس يتحكم فيا..فبالو بش ننسى كيما كل مرة ونسامحو بسهولة ونقلو الله بالك "
كبست على يدي تحكي
ماايا :" وانت مش بش تعمل هكا.. خليه يعمل لي يحب.. يصيح يعيط.. يطلع يهبط.. ماعندو لوين يوصل انت بش تعمل لي يريحك من غير اذنو.. واول حاجة بش تعملها بش تقوم تو وبش تطلب خالد..بش تركز فحياتك رينو معادش نحب نشوفك هكا كل يوم وانت تبكي من جرتو "
هزيتلها براسي اي نحكي
انا :" اي هاني بش نقوم..ادعي برك نسمع خبر باهي خليني نخرج شوي من هناا"
حطت يداها على خدي وتبسمت تحكي
ماياا :" انا حاسة فما خبر باهي يستنى فيك "
قمت من بلاصتي وتبسمت نحكي
انا :" انشالله "
قامت معايا وعدات بعيناها علياا تحكي
مايا :" رينو كمل اطلب وبدل حوايجك بش نخرجو "
عقدت بحواجبي نحكي
انا :" وين خارجين ؟"
مايا :" عمتو غالية خارجة قالت فما مرا تبيع ماعون ماشية تشوفها شنوة جابت لرمضان "
انا :" برا انت معاها انا بش نرقد شوي "
هزتلي براسها لا تحكي
مايا :" لا كان انت مش خارجة انا مانخرجش "
انا :" مايا ياروحي برا تفرهد شوي يزيك من قعدة الدار وونس عمتي ماتخليهاش وحدها.. انا والله بش نرقد شوي.. تاعبة "
عضت على شفايفها تحكي
مايا :" باهي اطلب خالد ساعة.. خليني نطمن "
هزيتلها براسي باهي وقربت هزيت تاليفوني لي كان عالفرش.. عضيت على شفايفي ك لقيت خالد رجع طلبني مرتين.. خذيت نفس طويل وغزرت لمايا لي وقفت قدامي.. حطيت رقمو وطلبتو.. قعدت على طرف الفرش وبقيت نستنى فيه يجاوب.. كرشي وجعتني اول ماسمعت وصوتو يحكي
خالد :" لتوو راقدة ؟ عندي ساعتين نطلب فيك "
تبسمت نحكي
انا :" لا فقت من بكري..وريتك كطلبت اما مانجمتش نهز "
خالد :" لباس ماهو ؟"
تنهدت بالشوي نحكي
انا :" لآخر شاف رقمك عندي.. وبقى يسأل فيا خالد علاش طلب فيك.. مالا اهوكا ممكن يطلبك ويسألك خاطر انا ماحكيتلوش.. ومذابياا انت ماتحكيلوش خالد "
خالد :"فهمتك..تهنى مانيش بش نحكي..اصلا نتصورو بش ينسى حكاية تاليفوني جملاا وبش يتلهى فحكاية اخرى "
عقدت بحواجبي مستغربة نحكي
انا :" حكاية شنوة ؟"
خالد :" حكاية خدمتك مع مسيو نزار.. يعني كان انت مازلت ناوية بالطبيعة "
حليت عينيا على وسعهم نحكي
انا :" مدام قلت هكاا يعني عندك اخبار باهية مش هكاا ؟"
ضحك يحكي
خالد:"هههه واكثر من باهية زادة.. 4 ايام عديتهم خوك ماوراياا شي كان سي نزار عبد الهادي.. ووصيت لي نعرفهم لكل زادة ف باريس وتونس.. جابولي تقرير كامل مكمل عليه.. اسمع يا للا... "
قصيت عليه نحكي
انا :" استنى استنى خالد امان خليني نحط تاليفوني haut parleur بش مايا تسمع معاياا "
خالد :" هههه باهي "
تبسمت لمايا لي تتبع فيا بعيناها ونزلت التاليفون حطيتو يسمع بالقوي.. للحظة حسيت روحي نسيت لي صار بكري لكل وبقيت نخمم كان ف الخطوة لي بش نقدمهاا بعد مانسمع من خالد ونطمن.. كل يوم يتعدا نزيد نتأكد انو هاذي أصح خطوة حالياا بش انجم نبعد وننسى لآخر وفرد وقت نستقل ف حياتي ونتجنب كلام سميحة.. الخطوة هاذي هي لي تريحني منهم لكل..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
