#لارين_تحكي
غمضت عينيا وبقيت مستحلية ليديه لي كانت تمسح على شعري..للحظة تمنيت كان الوقت ياقف هنا والليلة هاذي تطوال اكثر.. رجعت حليت عينيا على صوتو يحكي
عيسى :" لارين رقدت؟"
انا :" لاا ماعنديش نوم "
عيسى :" شرايك ندخلو ؟"
بعدت عليه شوي وغزرتلو نحكي
انا :" قداه الوقت تو ؟"
شاف ف منقالتو ورجع غزرلي يحكي
عيسى :" 1:00 فاتت "
انا :" مازال بكري.. مش هكا ؟"
عدا بعينيه عليا وتبسم يحكي
عيسى :" اي هكاا "
ربعت ساقياا وغزرتلو نحكي
انا :" شرايك نلعبو ؟"
عيسى :" لعب شنوة تو ؟ ماتعبتش ؟"
انا :" لا ماتعبتش.. وزيد لعبة مش بش نجريو ونقزو.. لعبة هنا ف بلاصتنا "
عدا بيديه على وجهو يحكي
عيسى:" العب وحدك وانا تو نغزرلك "
عديت بعينيا عليه مستغربة نحكي
انا :" ياخي ف بالك بياا عمري عامين بلحق.. بش نبقى نحبي وانت تغزرلي"
عيسى:" لارين شتحب تو "
انا :" نحب نلعب "
كبس بصوابعو على عينيه شوي ورجع غزرلي يحكي
عيسى :" شنوة تحب تلعب "
ضيقت عينيا وبقيت نخمم شوي.. تبسمت نحكي
انا :" شرايك ف action vérité؟"
عيسى :" مانعرفهاش "
عوجت شفايفي نحكي
انا :" انت ماتعرف شي.. شوف هاذي سؤال أو تحدي.. يعني انت تختار.. إذا نسألك وانت تجاوب ولا نحكم عليك تعمل حاجة ولازم تنفذها "
عقد بحواجبو يحكي
عيسى :" حاجة كيما شنوة؟"
هزيت بكتافي نحكي
انا :" مانعرفش.. ك يجي دورك نخمملك ف حاجة باهية.. نلعبو ؟"
عيسى :" اما انا ماعندي مانسال "
انا :" مش مهم.. المهم انا نسأل وانت جاوب "
عيسى :" وماعندي مانجاوب زادة "
نفخت بالشوي نحكي
انا :" تي شبيك مسطتها.. ياسيدي جاوب حتى ب اي ولا.. باهي ؟"
تنهد بالقوي وهزلي براسو باهي من غير حتى كلمة.. تبسمت نحكي
انا :" اول سؤال.. 12/05 عيد ميلاد شكون ؟"
ضيق عينيه فيا يحكي
عيسى :" هذا مايتجاوبلوش ب اي ولا "
انا :" اي ميسالش.. السؤال هذا جاوب عليه عادي وبعدو تو نخمم ف حاجة متاع اي ولا "
تبسم على جنب يحكي
عيسى :" علاش مصرة تعرف ؟ ساعة لتو متفكرة كود تاليفوني"
عضيت على شفايفي نحكي
انا :" مش على حاجة راو..اما حبيت نعرف عيد ميلادك وقتاه.. وانا كنت بش نقلك على عيد ميلادي زادة "
عيسى :" اما انا نعرف عيد ميلادك.. 01/05 قبل الدات لي ف تاليفوني "
حليت عينيا على وسعهم نحكي
انا :" كيفاه عرفت؟"
عيسى :" من بسبورك "
انا :" باهي قلي 12 عيد شكون؟"
عيسى :" ماهوش عيد وبدل السؤال "
قحرتلو نحكي
انا :" باهي قلي انت عيد ميلادك وقتاه.. ولاناوي تخبي علياا "
عيسى :" 15/01 "
ضيقت عينيا شوي نخمم ساكتة.. تبسمت نحكي
انا :" يعني انت برج الجدي.. وانا برج الثور.. ف بالك احنا نتفاهمو "
عيسى :" مافيباليش..مانتبعش انا الخرم هذا مانصدقوش "
انا :" انا زادة مانصدقهمش اما نحب نقراهم عالجو "
عيسى :" باهي كان كملت خلينا نقومو "
انا :" لا لا.. مازال عندي سؤال اخير "
عيسى :" اسال فيسع "
شبكت يديا ف بعضهم وعديت بلساني على شفايفي نحكي
انا :" ياخي قاعد تحكي مع لي ف تونس ؟"
عدا بعينيه عليا وعقد بحواجبو يحكي
عيسى :" اي علاش ؟"
انا :" لا حبيت نعرف..يعني من وقت ماكنا ف باريس لتو مع شكون حكيت ؟"
عيسى :" مع خالي وامي وادم و...استنى ساعة علاش تسأل ؟"
حكيت على جبيني وتبسمت نحكي
انا :" لا حبيت نعرف.. قلت بالك نسيت تكلم الصانع متاعك على خدمتك "
هزيت الصحن فيسع نحكي
انا :" هياا قوم... "
قص علياا ك شدني من مرفقي وقعدني..جبدني قدامو لين وجهي قابل وجهو.. عدا بعينيه علياا يحكي
عيسى:"ماكش بش تقوم حتي تقلي على شكون تسأل ؟"
عديت بعينيا عليه ساكتة..حسيت روحي تربثت ودخلت بعضي ماعرفتش شنوة نجاوب..اصلا مانيش فاهمة انا علاش سألت هكاا.. هز بحاجبو يحكي
عيسى :" نستنى فيك تجاوب "
خذيت نفس طويل نحكي
انا :" عيسى خليني نقوم امان "
كبس على مرفقي وزاد جبدني ليه حتى انعدمت المسافة بيناتنااا لحظتهاا حسيت قلبي بش يخرج من بلاصتو وشوي وندوخ من قربو مني هكا.. ضميت على شفايفي نحكي
انا :" سألت.. سألت على عزيز قلت خوك زعمة تسال عليه "
قربلي شوي وعدا بعينيه عليا يحكي
عيسى :" ف بالي بيك ماتكذبش "
عديت بعينيا على وجهو نحكي
انا :" مانيش نكذب؟ياخي هو فماحد اخر غير هاذم ؟"
عيسى :" والله هكاا انت لي تسأل وانت ادرى"
عديت بلساني على شفايفي وين حسيت بريقي نشف نحكي
انا :" باهي قلي انت..خاطر انا نسيت "
طبس عليا وغزرلي درا كيفاه يحكي
عيسى :" عزيز خوياا حكيت معاه لبارح.. وبش نطمنك اكثر انا ماحكيت مع حد من غير لي سميتهملك..واضح "
انا :" علاش ماحكيتوش... "
ضميت على شفايفي وحليت عينيا فيه ك عرفت لساني البوهالي زلق بالكلام.. ضيق عينيه فيا وتبسم يحكي
عيسى :" ماحكيتش مع شكون ؟"
خذيت نفس من ريحتو لي كانت قريبتلي نحكي
انا :" عيسى "
عيسى :" نعم "
انا :" خليني نقوم امان.. حاسة روحي بش نبكي "
عيسى :" بش تدخل ترقد "
هزيتلو براسي اي من غير حتى كلمة.. تبسم درا كيفاه وسيبلي يدي.. لحظتهاا قمت نجري من حذاه ودخلت طول للشاليه..غزرتلو من لبلار وين شفتو مازال فبلاصتو.. حطيت يدي على صدري وبقيت نرد ف النفس لي تقطع علياا من الربثة..عضيت على شفايفي ك تفكرت كلامو وين بقيت نخمم زعمة علاش ماحكاش معاها.. اصلا انا مش فاهمة علاش تفكرتهاا وعلاش نسأل علاهاا..رجعت غزرتلو وبقيت سارحة معاه رغم اني حبيت نرجع حذاه اما حشمتي ماخلاتنيش..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
