#لارين_تحكي
حطيت التاليفون على جنب بعد ماكملت تفرجت ف الإعلانات لقديمة لي تخص ماركة العطور.. تلفتت لماايا تحكي
مايا :" بصراحة خدمتهم حلوة "
عضيت على شفايفي نحكي
انا :" اي نعرف.. وهذا زاد صعبها علياا تو "
عدات بعيناها علياا تحكي
مايا :" علاش ؟ ساعة هاك خذيت فكرة مليحة.. تو تنجم تخمم "
انا :" مانعرفش هاني من بكري شادة لقلم وماعملت شي "
شدتني من يدي تحكي
ماايا :" رينو حاجة عادية راك مازلت ف الاول.. الليلة ابقى خمم وتفرج فالإعلانات والتصاميم وغدوة نمشيو للمدينة العربي خوذ فكرة كاملة وبعدها ابدا "
خذيت نفس طويل وهزيتلها براسي اي نحكي
انا :" اي انشالله لازم غدوة نمشيو مانحبش نضيع وقت "
تبسمت تحكي
مايا :" وكلم Joseph يجي معانا "
ضحكت نحكي
انا :"طلبتو لبارح نلقاه داهش من الصيام والريفيزيون قلي بش ندوخ.. تو غدوة نكلمو نشوفو كان ينجم يخرج "
ضحكت تحكي
مايا :" هههه مسكين ربي ينجحو "
تبسمت وخذيت لقلم.. طبست راسي وبديت نخربش كيما يجي محاولة مني نوصل لفكرة ولا اي حاجة تنجم تخليني نبدأ رغم اني عارفة مازالت هاذي اول ليلة لياا اما حبيت نعمل فيهاا حاجة ولو صغيرة بش نزيد نتشجع اكثر وننسى والربثة لي حاستها.. فقت من سرحتي على صوت مايا تحكي
مايا :" رينو انا بش نهبط نجيب دبوزة ماء.. تحب حاجة ؟"
انا :" جيبلي معاك تفاحتين امان "
تبسمت تحكي
مايا :" باهي رينو "
ريتها ك عطاتني بظهرها ومشات.. تنهدت بالشوي ورجعت طبست راسي بش نكمل لي بديت فيه..
هزيت راسي فيسع وغزرت للامبوبة لي طفات.. عقدت بحواجبي مستغربة نحكي
انا :" شبيها هاذي زادة ؟ ناقص تتحرق تو "
نفخت بالشوي وخذيت تاليفوني شعلت تورش وقمت من بلاصتي بش نشوفهاا.. اول ماقدمت ريت مايا ك رجعت.. غزرتلها ورجعت غزرت للامبوبة نحكي
انا :" مايا الامبوبة تحرقت "
تلفتت وين شفتها جرات ناحيتي.. عقدت بحواجبي مستغربة ك ريتها تلهث وماجابت شي معاها نحكي
انا :" مايا شبيك ؟"
عدات بعيناها علياا وغزرتلي درا كيفاه تحكي
مايا :" لارين الامبوبة ماتحرقتش.. فما شكون اللوطة هو لي قص عليناا الضو "
حليت عينيا على وسعهم نحكي
انا :" شنوة ؟ شكون هذاا ؟"
قربتلي اكثر تحكي
مايا :" مانعرفش والله..ريت خياال واحد طالع.. حاولت نشوفو اما مانجمتش الضو مقصوص عالعمار لكل "
عديت بعينيا عليها من غير حتى كلمة للحظة حسيت روحي جمدت فبلاصتي من الخوف كان دقات قلبي هي لي قوات.. تهزيت وتحطيت على صوت خبط الباب لقوي لي كان جاي من تحت لحظتهاا وخرت بخطواتي لتالي وبقيت نتنفض مع كل خبطة ولي خلاوني نسترجع نفس صوت الخبطات لي كان يضربهم " إلياس ".. هزيت يدي بالوقت غطيت وذنياا وغزرت لمايا ك قربتلي.. شدتني من مرفقي تحكي
مايا :" لارين ماتخافش... "
قصيت علاهاا وقت شهقت بالقوي وين دموعي نزلو بالوقت نحكي
انا :" ماياا هذاا إلياس جا.. إلياس لقاني "
هزتلي براسها لا تحكي
مايا :" لارين فيق.. هذا مش إلياس.. ممكن سارق.. فيق وخمم معايا شنوة بش نعملوو تو"
هزيتلها براسي لا ووخرت بخطواتي اكثر لين تضربت ف الحيط وراياا لحظتهاا طحت ف القاعة من ورايا اطرافي لي نملت ورعشت ويدياا باقي على وذنياا بش مانزيديش نسمع صوت خبط الباب لي ماوقفش لحظة وحدة.. حسيت بمايا ك طبست حذاياا تحكي
مايا :" لارين هذاا مش الياااس... "
قصيت علاهاا وقت هزيت عينيا وغزرت ناحية باب السطح كاني نستنى فيه بش يظهر قدامي.. نحكي
انا :" هو.. هو.. هو كذب ورجع من تو.. هو قلي بش نرجع ماياا وهاو رجع.. هو كان يضرب علياا الباب هكاا "
شهقت بالقوي وقت شدتني من زنودي وخضتني.. قربتلي وهمست تحكي
مايا :" لااارين فيق.. إلياس معااادش بش يرجع.. هذا سااارق خمم معاياا شنعملو قبل مايطلع "
عديت بعينيا عليها نحكي
انا :" مايا إلياس رجع هو..هو بعثلي جواب "
حلت عيناها فيا بش تجاوبني اما سكتت على صوت ضرب الباب لي قرب فالطابق الثالث.. ريتها ك حطت صبعها على فمها تحكي
ماايا :" اشش رد بالك تتكلم وهات تاليفونك"
عطيتهولها وحطيت يدي على فمي وين دموعي نزلو اكثر من الخوف لي رجع تغلغل فياا من وراء الشي لي تفكرتو ولي حسيت روحي رجعت فلحظة وحدة نعيش فيه..غمضت عينيا بالقوي وقت تفكرت الجواب لي بعثهولي للحظة حسيت سايي مخي وقف معادش أنجم نخمم فشي كان ف إلياس وتصويرتو لي رجعت هدت علياا والشي لي خلاني نعيشو.. سمعت صوت مايا بجنبي تحكي
ماايا :" عم جابر مايهزش.... "
حليت عينيا فيسع ومانعرفش كيفاه من غير مانشعر جاوبتها نحكي
انا :" كلم عيسى يجيني امان "
قلبي ضرب بقوة على الخطوات لي كانت طالعة لسطح.. ريت مايا ك وقفت فيسع وشدتني من يدي تحكي
ماايا :" قوم قووم"
اول ماقمت شدتني من يدي وجبدتني معاهاا لتركينة وين كان جابر حاط شوي خردة متاعو.. حطتني وراء باب لوح كان محطوط على جنب ووقفت بجنبي.. بدني رعش على يداها لي دارت عليا.. همست تحكي
مايا :" اشش رد بالك تتكلم..هاني معاك شي مايصيرلك "
هزيتلها براسي باهي وحطيت يدي على فمي نكتم ف صوت شهقتي لي غلبتني.. غمضت عينيا بالقوي وبقيت مركزة مع صوت الحثلة واليد لي تضرب عالحيط وين حسيت روحي سايي معادش أنجم نتحمل هذاا لكل وقلبي شوي وياقف.. رجعت حليت عينيا على صوت مايا لي توشوش بجنبي
مايا :" عيسى امان ايجاا فيسع فما شكون معاناا قص علينا الضو وقاعد يخوف فيناا "
رديت نفس على فرد ضربة وقت سمعت اسمو وين حسيت روحي هديت شوي وقت عرفت عيسى جاي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
