#لارين_تحكي
حليت عينيا وقربت للحرف متاع اليخت.. خذيت نفس طويل من ريحة لبحر لي عندي قداه ماعفستوش.. اصلا بلحق نسيت وقتاه آخر مرة مشيت للبحر.. يمكن عندي 8 سنين كان مش اكثر.. تنهدت بالشوي كتفكرت نور كيفاه كانت تحب تهزني اما خاطر الثنية طويلة وتتكلف ماتنجمش وقتها نولي انا نقولها ماعينيش بش هي ماتحسش وماتتقلقش خاطر كنت نشوفها قداه كانت تتعب وقداه من خدمت من حاجة بش توفرلي حاجات انا نحبهم.. عديت بصوابعي على عينيا وغزرتلو ك وقف بجنبي يحكي
عيسى :" لارين ابعد ماتقربش برشة كان تطيح "
دوب تبسمت ورجعت غزرت قدامي.. طبست راسي وغزرت للماء نحكي
انا :" تعرف قداه عندي مامشيتش للبحر ؟"
قربلي ووقف بجنبي يحكي
عيسى :" قداه ؟"
تبسمت نحكي
انا :" من عمري 13 ولا14 سنة.. كل صيف نور كانت تقلي تو نهزك.. اما انا نقلها لاا مانحبش.. من لي كنت صغيرة كنت نرا نور كيفاه تخدم وتجري وحدها بش توفرلي فلوس..ك بديت نفهم شوي وليت نراعي فيهاا.. نقلها مانحبش نمشي..ماعينيش.. رغم اني كنت نحب.. اما وقتها بالنسبة لياا نور وراحتها اهم من شنوة انا نحب..حتى لرحلات لي كانو تابعين للايكول ماكنتش نمشي.. خاطر يتكلفو برشة.. حياتي لكل عديتها بجنب نور.. ك وصلت 17سنة وليت نعاونها ساعات نخدم انا ومايا هي تبيع الفخار وانا نبيع تصاميم ك نور.. كنت نقول ك نكبر بش نعوض لنور تعبها.. بش نكمل قرايتي ونخدم ونخلي نور ترتاح.. حبيت نرجعلها حتي شوي.. اما انا مارجعت شي.. يمكن اكثر حاجة واجعتني لتو انها ماتت وهي تاعبة للاخر لحظة.. طول حياتها مارتاحتش وماشافت شي من حياتها.. ساعات نقول يمكن مرضت خاطر انا تعبتها "
مسحت دمعتي الي نزلت وغزرتلو ك قربلي يحكي
عيسى :" هي ماتت خاطر هذاكا حد عمرها.. ماتلومش روحك.. اصلا انت رجعتلها شوي وقت حليت المعرض وخليت الناس لكل تشوف رسوماتهاا وخليت اسمها يتعرف اكثر.. ومازلت تنجم ترجع.. مازال لعمر قدامك تنجم تقرأ وتخدم وتعمل كل شي نور كانت تحلم بيه.. وهي بش تحس بيك "
تبسمت نحكي
انا :" ياريت بلحق تحس بياا.. ياريتها تكون فرحانة ومرتاحة "
عيسى :" متأكد انها مرتاحة "
هزيتلو براسي اي من غير حتى كلمة.. عديت بيديا الزوز على وجهي وخذيت نفس.. غزرتلو وين شفتو سارح قدامو وليت سكتت.. تلفتت وراياا على صوت خالد يحكي
خالد:" شبيكم قاعدين هنا ؟"
عيسى :" مالا وين تحبنا نمشيو ؟"
خالد:" ايجاو نطلعو الفوق.. خلي لارين تشوف لبلاصة"
تبسمت نحكي
انا :" عادي نطلعوا ؟"
خالد:" اي عادي بالطبيعة..تصرف على راحتك يابنتي"
غزرت لعيسى نحكي
انا :" عيسى خلينا نطلعوا امان شوي "
عيسى :" باهي ايجا "
قدمت معاهم وطلعت.. حليت عينيا على وسعهم ك شفت المنظر لي كان قدامي.. لبحر ظهر اكثر غير الجبل والغابة لي لمحتهم من بعيد.. خليتهم ورايا وقدمت شوي وانا مش مصدقة اني تو ف نص الماء.. لهواء كان داير بياا من كل اتجاه وريحة لبحر مالية الدنياا.. ضحكت اول ماهزيت راسي وشفت القالق لي كانت تطير فوقنا.. تلفتت ورايا وين شفت عيسى واقف يغزرلي.. ضحكت نحكي
انا :" عيسى شوف.. محلاها الدنياا "
عدا بعينيه عليا يحكي
عيسى :" اي محلاها "
قعدت عالحرف ودرجحت ساقياا.. غزرتلو نحكي
انا :" اقعد "
هزلي براسو باهي وقعد.. غزر قدامو وبقى ساكت.. غزرتلو نحكي
انا:" احنا بش نوصلو مع 18 هكاكا؟"
عيسى :" اي "
عوجت شفايفي نحكي
انا :" ياخي نهار ليوم محسوب من 4 ايام "
غزرلي ورجع غزر قدامو يحكي
عيسى :" لا "
ضحكت نحكي
انا :" جو.. يعني بش نبقاو 4 ايام ونص "
عيسى :" اي هكاكا "
انا :" و ك نوصلو شنوة بش نعملو اليوم ؟"
عيسى:" مانعرفش.. اليوم خلينا نرتاحو "
هزيتلو براسي باهي وبقيت نغزر قدامي.. تلفت ورايا على صوت خالد يحكي
خالد :" عيسى ماتحبش تسوق شوي ف عوض سام؟"
حليت عينيا على وسعهم نحكي
انا :" ياخي تعرف تسوق اليخت ؟"
عيسى :" شوي "
انا :" هياا اهبط سوق خليني نهبط معاك "
وقف من بلاصتو واشرلي بعينيه يحكي
عيسى :" باهي هياا "
خالد:" سوق شوي مدام انا وسام حضرنا كعبات حوت"
عيسى :" باهي "
قدمت معاه وشديتو من يديه نحكي
انا :" اصبر خليني نهبط بالشوي لا نطيح "
شدني وهبطني معاه.. قدمنا لغرفة القيادة ودخلناا.. عديت بعينيا عليها نحكي
انا :" مانيش مصدقة انك تعرف تسوق يخت والله "
ريتو ك قرب وين المقود وضغط على زر كبير وبقى يدور ف المقود.. وقفت بجنبو وبقيت نغزرلو.. غضيت على شفايفي نحكي
انا :" ميسالش ندور شوي معاك "
غزرلي على جنب يحكي
عيسى:" لارين ماهيش لعبة هاذي "
انا :' لعبة شنوة ؟ ياخي ترا فياا صغيرة "
عيسى :" ماكش صغيرة.. اما مش كل شي يتمس "
انا :" هاك انت بجنبي امان عيسى نجرب شوي كهو"
عدا بعينيه عليا وشدني من مرفقي.. قربني ناحيتو ووقفني قدام المقود..يحكي
عيسى :" حط يدك "
ضحكت وحطيت يدي كيما هو كان عامل.. قلبي ضرب بقوة اول ماحسيت بيه وقف وراياا وقربلي وين حسيت بصدرو مس فظهري وراسي..جمدت فبلاصتي كريتو مد يديه وحطهم فوق يدي وبقى يدور فالمقود.. للحظة حسيت روحي مش مركزة فشي..كان فيديه لي كابسة على يدي غير ريحتو لي سكنت فياا وداعبت كل حواسي..غزرت قدامي وبقيت مستحلية ليديه لي كانت محاوطتني.. للحظة تمنيت كان نبقى هكا ب أزيد وقت.. مانحبش نبعد عليه خاطر حسيت كانو راحتي سايي صارت تتلخص ف وجودو هو...
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
