#عيسى_يحكي
كبست عالسبحة لي ف يدي وقمت من بلاصتي بعد ماكملت صلاة.. طبست عاونت خالي لي كان بجنبي بش يوقف نحكي
انا :" تقبل الله خالي "
وقف قدامي وطبطب على كتفي يحكي
جابر :" منا ومنك صالح الأعمال ولدي "
ريت ادم ك قرب ناحيتنا ووقف بجنبي يحكي
ادم :" تقبل الله عم جابر.. تقبل الله عيسى "
جابر :" منا ومنك صالح الاعمال عيش ولدي "
ضربت على ظهرو بالشوي نحكي
انا :" منا ومنك صالح الاعمال "
ادم :" هياا خلينا نروحو.. خوك شوي ويرقد على روحو وزيد بديت نعطش "
ضحكت نحكي
انا :" حط ربي ف بالك.. مازلت حتى ساعة ماتعدتش"
قحرلي وخرجناا.. وقفنا قدام الجامع وغزرت لخالي ك تلفت للادم يحكي
جابر :" برا روح ارقد اما رد بالك تعدي نهارك نوم.. ماكمش صغار تو الزوز.. فيق صلي صلواتك و اخرج شوي "
ضيقت عينيا فيه ك سمعتو يحكي
ادم :" اي من غير ماتوصي عم جابر "
غزرت لخالي ك تبسم يحكي
جابر :" ربي يستر.. المهم غدوة شقان فطرك حذاناا رد بالك تقول لا.. بش نستناك "
ضحك يحكي
ادم :" لا هكا بلحق من غير ماتوصي.. قبل أذان المغرب تلقاني عالطاولة "
ضحك يحكي
جابر :" هههه مرحبا بولدي الغالي "
عدا بعينيه علينا يحكي
ادم:"ايا تصبحو على خير..وانت عيسى بيناتنا تاليفون "
هزيتلو براسي باهي نحكي
انا :" باهي.. تصبح على خير "
جابر :" تصبح على خير "
ريتو ك عطانا بظهرو وشد ثنية دارهم.. غزرت لخالي يحكي
جابر :" هياا خلينا احنا زادة نروحو "
هزيتلو براسي باهي بش نحكي اما وقفت عالصوت لي نادى ورانا بأسم خالي.. رسيت على سنيا بالقوي اول ماتلفتت وريت نبيل وولدو صابر ك وقفو قدامناا.. عدا بعينيه علينا وغزر لخالي يحكي
نبيل :" تقبل الله ياحج جابر "
جابر :" منا ومنك صالح الاعمال "
غزرلي يحكي
نبيل :" تقبل الله معلم عيسى.. شحالك ؟"
عديت بعينيا عليه وغزرت لولدو لي كان ساكت نحكي
انا :" الحمدالله "
غزرت لولدو ك مد يديه يسلم على خالي يحكي
صابر :" تقبل الله حج جابر "
جابر :" منا ومنك عيش ولدي "
رجع غزر لخالي يحكي
نبيل :" سامحني وقفتكم هكاا اما تعديت لعشية وين الورشة حبيت نهنيك برمضان اما مالقيتكش.. ك شفتك تو ماحبيتش نضيع الفرصة "
جابر :" اي صحيح مانيش غادي لعشية..ويعطيك الصحه فيك الخير "
نبيل :" هذا واجب علياا.. انت كبيرناا يا حج جابر وبلاصتك عالية عناا "
جابر :" عيشك نبيل.. يعلي مقدارك "
ضيقت عينيا فيه نغزرلو كيفاه مازال واقف وولدو بجنبو مش فاهمهم شمازالو يحبو.. اصلا حسيت كلامو هذا مش داخل لمخي حتى بشعرة.. هزيت بحاجبي ك ريتو تبسم يحكي
نبيل :" تو وين طمنت انك ماكش متغشش من لي صار.. حتى انا قلت الحج جابر يقدر العشرة ومهما يصير نبقاو خوات ياحج جابر.. وعلى رأيي المثل الواحد ماينجمش ينحي خشمو من وجهو "
ضغطت على يدي بالقوي من لعصب لي حسيتو من كلامو خاطر خالي مافيبالوش.. ريت خالي ك عدا بعينيه علينا يحكي
جابر :" مفهمتكش.. علاش بش نتغشش شصار ؟"
قحرت لنبيل وولدو وغزرت لخالي نحكي
انا :" ماصار شي خالي..."
رسيت على سنيا بالقوي ك ريت ولدو قص علياا يحكي
صابر :" لا صار عم جابر.. وانا كنت جايك اما بابا ماخلانيش "
حليت عينيا على وسعهم فيه نحكي
انا :" ياخي وقتووو لكلام هذاا.. وزيد علاش جاي انت شمدخلك ف حديث النساااء؟"
صابر :" يدخلني خاطر لحكاية فيهاا امي "
قربتلو وهزيت يدي ف وجهو نحكي
انا :" هززز بووك وبرااا روووح"
تلفتت على صوت خالي يحكي
جابر :" ماعندو وين يروح حتى نفهم لحكاية.. نبيل شصار "
قحرتلهم الزوز ووخرت لتالي..دمي فور مني ك سمعتو يحكي
نبيل :" سامحني حج جابر والله ف بالي ف علمك.. الايامات لي فاتو بنتك عرضت لمرا متاعي عاد وقفتها على اساس بش تسلم علاهاا ياخي بنتك شعلت فيهاا ف الشارع قدام الناس لكل وعيسى خلط ف عوض يهدي لحكاية قام يعلي ف صوتو علاهاا.. والله لمرا روحت ف حالة وكانت بش تجي لدار تشكي للاختي غالية اما انا منعتها.... "
قصيت عليه وقت حسيت سايي عصابي فلتت مني ومعادش انجم نتحمل أكثر.. عليت ف صوتي شوي نحكي
انا :" المرة الجاااي قبل ماتجي تعاود لحديث قول لمرتك تعاودلك بالصحيح.. عيب تاقف قدامي وتكذب عيني ف عينك.. خاااطرني اناا كنت حاااضر.. والمثل يقول اكذب عالميت مش عالحي "
رس على سنيه لين وجهو حمار.. غزرت لخالي نحكي
انا :" خالي هذا لكل تقشقيش حناك وحديث نساء.. اما ميسالش هاني بش نرتحكم.. اولا مرتك هي وقفت بنت خالي ف نص الشارع وسمعتها كلام يسم لبدن.. ثاني انا نبهت علاهاا من قبل تبعدها.. اما هي باقي وراهاا ومدام انت تحكي بالجيرة نبه على مرتك أولى.. خلاهاا تبعد على بنت خالي خاطر راني مازلت مقدر "
قحرلي وغزر لخالي يحكي
نبيل :" عاجبك لحديث هذا يا حج جابر "
غزرت لخالي ك كبس على عكازو وقحر لنبيل يحكي
جابر :" نبيل هوما كلمتين.. خلي مرتك بعيدة على بنتي.. حتى السلام مش لازم منو.. خليناا مقدرين الجيرة والعشرة.. والمرة جاية مش لازم توقفني هكاا بش تعاودلي حديث مرتك خاطر انا كلام النساء مانسمعوش "
غزرلي واشرلي بعينيه يحكي
جابر :" هياا عيسى.. النهار طلع "
هزيتلو براسي باهي وقحرتلهم كيفاه باقي واقفين.. ريت ولدو ك غزرلي درا كيفاه ماركزتش معاه ومشيت مع خالي لي يمشي بجنبي ساكت كان صوت النفس متاعو مسموع..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
