#لارين_تحكي
حطيت الساشيات من تالي وطلعت بجنبو.. ريتو ك دور المفاتح بش يكمل الثنية.. حليت الشكلاطة نحكي
انا :" عيشك عيسى عالشكلاطة وباقي الحاجات "
عيسى :" قتلك بش نبقاو نهارين.. ضاربة قضية شهر مافهمتش علاش "
انا:" شنوة بش تحاسبني على شوي ماكلة..الف مرة نقلك ماتحسبليش "
نفخ بالقوي يحكي
عيسى :"يابنتي ياخي انا حسبتلك تو؟ اما فما حاجات زايدة مافهمتش علاش تاخذي فيهم "
درتلو بكلي وعديت بعينيا عليه نحكي
انا :" شنوة الزايد قلي تراه "
عيسى :"فهميني الفارينة علاش ماخذتها؟النشاء علاش ماخذتو ؟؟ لعظم هذيكا لكل علاش ؟ الملسوقة علاش ؟ ناوية تعدي رمضان هنااا "
عضيت على شفايفي نحكي
انا :" الفارينة قلت نجرب نعمل بيتزا نذوقهالك.. لعظم والملسوقة قلت نجرب وصفة عمتي والنشاء بش نعمل بيه ماسك لوجهي.... "
ضميت على شفايفي ك ريتو قحرلي وحل عينيه فيا.. يحكي
عيسى :" موقفتي ساعة على ماسك لخليقتك ؟"
بلعت ريقي نحكي
انا :" لا وبش نعمل بيه نوع حلو زادة "
نفخ بالقوي وعدا بيديه على شعرو يحكي
عيسى :" شوفي آخر مرة توقفيني هكاكا قدام لعباد وتحرني كيما الصغار.. ك نقلك امشي تمشي "
انا :" باهي المرة جاية "
قحرلي ورجع غزر قدامو.. تنهدت بالشوي نحكي
انا :"عيسى ماتتغشش مني..والله انانيتي بش ماناكلوش من الشارع.. حبيت نذوقك ماكلتي "
تنهد بالشوي يحكي
عيسى:" باهي ميسالش "
انا :" تو تشوف ماكش بش تندم.. ك تذوق البيتزا متاعي تو تقول القضية جات ف الصلاح "
غزرلي على جنب يحكي
عيسى :" اي تو نشوف "
ضحكت وغزرت قدامي.. حليت الراديو وبقيت ناكل ونغزر للثنية.. تكيت بظهري لتالي نحكي
انا :" تعرف حاسة روحي فرحانة بالسفرة هاذي اكثر من لي قبلهاا "
عيسى :" هذيكا الفايدة "
انا :" مازال برشة بش نوصلو ؟"
عيسى :" لا.. درجين ونوصلو "
انا :" ياخي انت جيت قبل لهناا ؟؟"
عيسى :" لا "
انا :" مالا كيفاه بش تعرف الدار ؟ ياريت خالد جا معاناا لا ترصيلناا ضايعين ف الشارع.. كلمو كلمو قلو يخلط علينا.... "
تهزيت وتحطيت على صوتو يحكي
عيسى :" اسكتتتي..اسكتي شوي "
قحرتلو نحكي
انا :" ماتصيحش علياا.. ومانسكتش بش تضيعناا وتحبني نسكت "
رس على سنيه وقحرلي يحكي
عيسى :" كلمة اخرى مانهبطك هناا ونمشي "
حليت عينيا على وسعهم نحكي
انا :" تعملهاا فياا ؟؟ يعطيك قلبك تخليني وحدي وتمشي عيسى ؟ ترضى تعمل فياا هكا ؟"
عدا بيديه على وجهو من غير مايجاوبني.. درتلو بكلي وشديتو من مرفقو نحكي
انا :" اغزرلي وقول انك تفدلك "
عيسى :" مانيش نفدلك "
رجعت غزرت قدامي واشرتلو بيدي نحكي
انا :" أقف مالا وهبطني هناا.. هبطني.. اصلا شنوة متوقعة انا..على اساس ماعملتهاش قبل وخليتني "
غزرلي وعقد بحواجبو مستغرب يحكي
عيسى :" وقتاه عملتها انا ؟"
ربعت يدي نحكي
انا :" اسال روحك "
بعدت عليه اول ماهز يديه ف وجهي يحكي
عيسى :" بش تحلي فمك ولا نهدهولك "
قحرتلو نحكي
انا :" خليتني ف الحلمة.. وقت قتلك لكلاب وراياا وانت مشيت.. ريت ك نموت ماننساهاش.. نحكاها لحفار قبري ياعيسى "
كبس عالفولون يحكي
عيسى:" ياخي متخلفة انت ؟؟ مطروشة ؟؟ مهبولة بلاني بيها ربي"
ضحكت نحكي
انا :" ههههه ريت ك نخليك تدخل بعضك.. بش المرة جاي تعرف شتحكي معاياا.. وزيد حط ف بالك انت مش بش تخليني انا بش نبقى وراك.. ربي بلاك بياا.. شوف عاد انت شعامل شر ف حياتك حتى ربي يعطيك بلوى "
غزرلي وعدا بعينيه عليا باهت.. تبسمت نحكي
انا :" اغزر قدامك لا تدخلنا ف حيط "
عيسى :" باهي اعملي تو كيما تحبي تو هاني نلملك فيهم بش ك نهبل عليك نهبل على قاعدة "
استويت ف قعدتي وكليت شوي من الشكلاطة نحكي
انا :" محلاها الثنية.. انشالله الدار تكون بلاصتها مزيانة "
قحرلي ورجع غزر قدامو.. تبسمت وبقيت ساكتة يزي ماعملت فيه.. شوي وقت وراكا الكرهبة..تبسمت اول ماهزيت راسي وغزرت للبلاصة.. نزلت فيسع وعديت بعينيا عالدار لي كانت وحيدة هناا ومقابلة لبحر بالضبط..ووراها جبل كبير وكلو شجر..تبسمت وتلفتت لعيسى لي كان ينزل ف القضية.. قربتلو نحكي
انا :" عيسى تهبل لبلاصة "
عطاني الساشيات يحكي
عيسى :" ايا باهي ك عجبتك "
انا :" عاللخر.. عيشك خاطر جبتني هنا "
سكر الكرهبة وقرب هبط الفاليزات يحكي
عيسى :" ادخل خليني نرجع ندخل هاذم "
هزيتلو براسي باهي وبقيت نمشي بجنبو ونغزر للبحر لي كان يلمع.. اول ماوصلنا حل الباب وخلاني ندخل انا لولى.. عديت بعينيا عالدار الصغرونة لي كانت على طاقين.. حطيت الساشيات عالطاولة وغزرتلو نحكي.
انا :" مانيش مصدقة انو بش نبقاو هناا "
قربت فيسع للشباك لكبير وحليتو وين ظهر قدامي لبحر بالضبط.. خذيت نفس من ريحتو وتلفتت نحكي
انا:" تهبل الدار "
عيسى :" ايجاا دخل هاذم خليني نمشي الفاليز لخرى"
هزيتلو براسي باهي وجريت هزيت لي كانو قدام الباب دخلتهم ورجعت ندور ف الدار ونتفرج فيهاا.. هكاكا وسمعتو ك دخل.. قربتلو نحكي
انا :" الكوجينة فيها كل شي..يعني انجم نطيب "
قحرلي يحكي
عيسى :" هذا وقتو ؟؟ "
عوجت شفايفي وقربت خذيت فاليزتي من يديه نحكي
انا :" ديما على عصابك..ديما على عصابك "
هز الفاليزة والساك ودخل..خلطيت عليه وين وصلنا للبيوت.. غزرلي يحكي
عيسى:" اختار بيت "
بقيت نحل ف البيبان ونتفرج ف البيوت.. تهزيت وتحطيت على صوتو ورايا يحكي
عيسى :" عام بش تختاري بيت ؟"
نفخت بالقوي نحكي
انا :" خترت..خترت.. بش ناخذ هاذي.. وانت خوذ هاذيكا "
عيسى :" تلهي ف روحك "
بعدت من قدامو وخليتو يتعدا بش يحط الفاليزات.. عديت بعينيا عالبيت لي كانت اكبر وحدة ومنظمة مليح غير طلتها لي كانت عالبحر والشباك لآخر عالجبل..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
