#لارين_تحكي
تبسمت اول مااليخت وقف وغزرت لشمس لي بدأت تغرب.. عديت بعينيا عالبلاصة لي كانت محلاها وين لقيت روحي سرحت فيها غير امي حسيت روحي فرحانة عاللخر..خاطرني بلحق كنت بحاجة اني نجي بلاصة كيما هاذي بش نغير شوي جو..غير وجود عيسى معايا هناا لي حسيتو مفرحني اكثر خاطر معاه هو نحس روحي نعمل جو اكثر رغم تصرفاتو لي ساعات تفددني اما وليت نحس وجودو معايا يحلي كل لحظة ف حياتي.. يكفي اني نعمل جو ك نوترو وين نلقى روحي نتصرف قدامو على راحتي وكيما نحب خاطر نعرف ماهوش بش يتقلق مني بالعكس.. فقت من سرحتي على صوتو يحكي
عيسى :" هياا اهبط "
رمشت عينيا نحكي
انا :" بش تهبطني انت مش هكا ؟"
قحرلي يحكي
عيسى :" مازلتي ماتشليتش "
حليت فمي مصدومة من كلمتو نحكي
انا :" مش بكري قتلي باهي "
قربلي يحكي
عيسى:" لارين يزي بلا تفوريخ..شوفي الميناء كلها رجال.. اهبطي ك الناس تو نشدك "
بعدت عليه نحكي
انا :" ماتشدنيش نعرف نهبط "
كبست على ساكي وقربت شوي.. عضيت على شفايفي وغزرت منين بش نتعدا.. خذيت نفس طويل وقربت اكثر.. شديت ف الحديدة لي كانت بجنبي ونزلت وحدي.. ريتو ك نزل وراياا وف يديه الفاليزات.. قربتلو نحكي
انا :" هات نهز معاك"
هزلي براسو لا يحكي
عيسى :" لا امشي اطلع ف الكرهبة برك"
هزيتلو براسي باهي وغزرت لخالد لي واقف قدام كرهبة اخرى.. طلعت من تالي وبقيت نستنى فيهم حتى حطو الفاليزات وطلعوا.. اول ماخالد شد الثنية غزرتلو نحكي
انا :' بعيد برشة الشاليه ؟"
خالد:" لا درج من زمان ونوصلو.. اصلا كان مش الفاليزات رانا مشينا على ساقينا "
انا :' الشاليه حذا لبحر ؟"
خالد؛" مقابلو بالضبط "
تبسمت نحكي
انا :" و الريستو متاعك حذاهم ؟"
خالد:" اي الريستو عالشط بجنبهم "
ضحكت نحكي
انا :" يعني انجمو نسهرو فيه الليلة ؟"
وخرت لتالي ك ريتو تلفت قحرلي وغزر قدامو.. سمعن خالد يحكي
خالد:" اي خلينا نرتاحو شوي ونبدلو حوايجنا هاذم ونمشيو حتى ف الليل مخر "
انا :" ياخي لوقتاه يخدم الريستو ؟"
خالد :" 24ساعة على 24 "
جيت بش نضحك ياخي ضميت على شفايفي نحكي
انا :" ايا باهي "
صفقت على يدي بالشوي وقربت للشباك نغزر للطريق.. حليت البلار وبقيت نغزر للثنية لي كانت عبارة على جبل وغابات والبحر ظاهر من بعيد.. مسافة الطريق ووصلنا.. نزلت اول ماخالد وقف الكرهبة وغزرت للشاليه لكبير لي كان ظاهر من ضو الريستو لي كان منور لبلاصة لكل غير صوت لغناء لي كان بالقوي.. تلفتت وين شفتهم نزلو هوما زادة وقربولي.. غزرت لخالد يحكي
خالد:" هياا خلينا ندخلو "
هزيتلو براسي باهي وبقيت نمشي بجنب عيسى ونتفرج ف البلاصة..رغم الدنيا بدأت تظلام اما منورة بكلهاا وين كل شي كان ظاهر.. تبسمت اول ماقربناا للبحر وغزرت للموجة لي ضربت ف الصخرة لكبيرة لي كانت على جنب..غير الرمل لي اشتهيت نحط فيه ساقياا ونجري.. وقفت اول ماوصلنا للشاليه ودخلناا.. عديت بعينيا عليه نغزرلو قداه كبير ومذخم.. كلو شبابك كبار وين كل شي مقابلنااا كاننا مازلنا لبراا.. تلفتت لخالد يحكي
خالد:" عيسى انت بيتك هي هي.. نعرفك ماتحبش نبدلهالك.. وانت لارين بيتك مقابلة بيت عيسى.. ايجا نوريك منين "
كبست على ساكي طلعت معاهم..وقفت اول ماوصلنا قدام البيت غزرت لخالد كيف اشرلي بيديه يحكي
خالد:" هاذي بيتك "
انا :" عيشك خالد "
غزرت لعيسى كيف قرب حلي الباب يحكي
عيسى :" ايا ادخل "
ريتو ك سبقني وحط الفاليز متاعي والساك يحكي
عيسى:" رد بالك تخرج ولاتمشي لبلاصة بلا ماتخبرني"
دخلت وراه نحكي
انا :" لا تهنى والله..المهم قلي انت بش ترقد؟"
عيسى:"اي بش ناخذ غمضة صغيرة "
انا :" باهي "
ريتو ك خرج ودخل للبيت لي مقابلتني هو وخالد.. سكرت الباب ورايا وعديت بعينيا عالبيت.. تبسمت وقربت فيسع للشباك لكبير.. حليتو وخرجت بالوقت.. حليت عينيا على وسعهم اول ماشفت لبحر لي كان مقابلني بالضبط ووراه جبل كل غابات.. بقيت واقفة نغزر للبنات لي يعومو مع بعضهم وين تفكرت ماياا تمنيت كان جات معايا هي زادة وشافت للبلاصة اذي. راي فرحت كيفي.. عديت بعينيا وغزرت لريستو لكبير تبسمت ك شفت الناس تشطح وعاملة جو مع الغناء.. عوجت شفايفي وقت تفكرت عيسى وين خممت زعمة بش يخليني نعوم كيما لبنات ولا بش يخليني نعمل جو هكاا.. نفخت بالشوي ودخلت.. هزيت الفاليز حطيتها فوق الفرش وحليتهاا.. عديت بعينيا على حوايجي وين قابلتني روبة صفراء تحت الركبة بشوي واكتافها طايحة.. هزيتها وبقيت نغزرلها إذا هي مستورة ولا لا.. زعمة كان نلبسها مايقول شي.. حطيتها على جنب وجبدت الكاب دوبان متاعي هزيتو ودخلت لسالدوبان نحيت حوايجي وحليت الماء السخون ودخلت تحتو بالوقت.. عملت دوش تنعوشت بيه وخرجت ريقلت أموري لكل ورجعت للبيت.. حطيت تاليفوني والكيت ف الشارج ورجعت قربت للفرش بش نحضر روحي.. قررت نلبسها الروبة هاي الدنياا ظلمة شكون بش يراني.. نحيت الكابدوبان وبقيت نلبس فيهاا.. اول ماكملت لميت كل شي وقربت وين المرايا عملت مكياج خفيف وفردت شعري ورجعت خرجت للبلكونة خاطر ماعنديش نوم.. حبيت نستناه هي حتى يفيق.. قعدت عالكرسي لي يدرجح وبقيت نغزر للناس قدامي كيفاه شايخين.. تبسمت ك شفت الزوز لي قاعدين على جنب عالشط يضحكو..للحظة مانعرفش علاش تخيلت روحي ف بلاصتهم مع عيسى..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
