#لارين_تحكي
طبست راسي وقدمت فيسع بش نتعداه.. ضغطت على يدي بالقوي ك ريتو وقف قدامي يحكي
عزيز :" لاا عااد هكاا تراني وماتسلمش علياا "
قحرتلو نحكي
انا :" وانا مانحبش نسلم عليك.. ميسالش "
ضيق عينيه فيا وقربلي شوي يحكي
عزيز :" تؤ مش ميسالش.. ساعة علاش ماتحبش ياخي مانيش ولد عمتك انا ؟"
نفخت بالشوي نحكي
انا :" عزيز ابعدني.. مانيش فاضية شغل بش نبقى واقفة نسمع فيك "
ضحك يحكي
عزيز :" هههه هاني بش نبعدك اما قلي قبل وين كنت.. تطلعش كنت غادي "
ريتو ك أشر بعينيه ناحية باب دارهم ورجع يحكي
عزيز :" رجعنا تو لطلوع والهبوط.. شنوة ماشبعتوش ببعضكم الايامات لي فاتو "
عديت بعينيا عليه مصدومة من كلامو غير نبرة صوتو لي كانت ماتعجبش.. هزيت يدي ف وجهو نحكي
انا :" شوف انت..راني مانيش بش نوسع بالي ياسر معاك.. ياتبعد من ثنيتي وتعتق سماياا ياتو نشكي بيك لجابر هو تو يتفاهم معاك.. باهي ولالا "
عدا بعينيه عليا وتبسم يحكي
عزيز :" شوف اا سيدي.. القطوسة كيفاه تخبش "
انا :" نخبش ونندب زادة..مالا احسنلك ابعدني خاطر مانيش ناقصتك انت ومخك الصغير هذاا.. برا شوف حد غيري العب معاه "
عزيز :" اما انت بلحق تخوفي.. ليوم عاملة عرض ف الحومة وتو هادة علياا هكاا.. كانو مشيت فرنساا قواتلك قلبك..رجعتي اكتفاك سخونة ولسانك مترين.. شصار غادي.. شبيكي متغششة ؟"
نفخت بالقوي نحكي
انا :" لا إله إلا الله..شوف يا تبعدني يا قسما بالله العلي العظيم مانقوم نصيح على طول صوتي مانخلي حومة كاملة تسمعني..خلي نشوفك شتعمل قدام جابر وعمتي"
عزيز :" مانيش بش نجاوبك خاطر مازلتي ك جيتي ووحشي ليك عماني.. هاني بش نبعد تو اما مرة أخرى مانظمنلكش.. خاطر بصراحة نشيخ عليك وانت على عصابك هكاا "
هزيتو وحطيتو بعينيا ودزيتو.. هبطت نجري فيسع بش نبعد عليه كاني ناقصتو هو كنت مرتاحة من وجهو مانعرفش علاش راجع السخطة.. اول مادخلت للدار عرضتني عمتي تحكي
غالية :" شبيك رجعت رينو ؟"
انا :" نسيت الكيت متاعي عمتي.. بش نهزو ونرجع "
دخلت نجري للبيت هزيت الكارط والكيت وخرجت فيسع.. طلعت نجري ساقياا أعلى من راسي بش مانرجع نرا حد منهم.. اول ماوصلت ريت ماياا تقلب ف التاليفون.. هزت راسها معاياا تحكي
مايا :" تي وينك لتوو ؟"
قعدت بجنبهاا ننهج ونحكي
انا :" هاني جيت.. وانا هابطة عرضني اكاسخطة عزيز بقى يسيب فبلادتو "
ماايا :" شبيه ؟ شيحب منك ؟"
انا :" شي قاعد يتمجلغ وحدو "
مايا :" باهي شيهمك فيه.. ايا اطلب فيسع "
خذيت نفس طويل وخذيت تاليفوني من يداها.. حطيت رقم خالد وطلبت بالوقت.. حطيتو haute parleur بش ماياا تسمع وبقينا نستناو فيه حتى يهز.. تبسمت ك سمعتو رد علياا يحكي
خالد :" قبيلا برك تفكرتك "
ضحكت نحكي
انا :" ك هكاا علاش ماكلمتنيش ؟"
خالد :" والله كنت ناوي نكلمك اما قلت نزيد نهارين آخرين.. خفت تكون مع عايلتك ونقلقك "
انا :" مفما حتى قلق والله كلمني ف كل وقت "
خالد :" باهي مريڤل.. قلي انت شعاملة جوك باهي غادي ؟"
تنهدت بالشوي نحكي
انا :" انا سافا.. هاني فوق السطح تو ساهرة انا وماياا "
خالد :" سلم علاهاا "
ماياا :" سلامك وصل "
خالد:" هههه صار انت معانا عالخط زادة.. شحالك ياطفلة ؟"
ضحكت تحكي
ماايا :" لباس.. هاني انا ورينو ساهرين عاملين جو "
خالد :" خير.. ونسو بعضكم.. اي رينوو شفما جديد ؟"
انا :" هو بصراحة انا طلبتك خاطر فما جديد..ومحتاجة انك تعاوني "
خالد:" اي قلي على مانقدر "
خذيت نفس طويل وبقيت نحكيلو لي صار فالطيارة بالتفصيل وشنوة حكيت مع نزار وهو يسمع فيااا ومركز معاياا..ا ل ماكلمت سمعتو يحكي
خالد :" وانت تحب تخدم فالدومان هذا ولا جيست خاطرك محتاجة خدمة؟.. كان هكاا قلي وانا تو نشوفلك من هناا أعز خدمة "
انا :" لا لا نحب اكيد..نور كان حلمها انو تصاميمها يتشهرو..وانا كيفها تو..نحب نوصل خدمتي وخدمتها يعني كان بلحق نزار ماهوش يكذب ويكون انسان باهي ونلقى ظروف الخدمة معاه باهية انا موافقة على عرضو "
خالد :" باهي ك هكاا صورلي الكارط فزيت متاعو.. وابعثلي تفاصيل لي حكاهملك لكل ف ميساج بش ماننسى شي وانا تو نكلم شكون يجيبلي تاريخو لكل ف ال10 سنين هاذم "
تبسمت نحكي
انا :" بلحق ؟؟ عيشك خالد مرسي "
خالد :" من غير مزية يابنتي.. ساعة والله فرحت انك نويت تأخذ الخطوة هاذي.. كان مشات الأمور مريڤلة وبديت خدمة نحبك تركز فيها وبعد تقرأ على روحك.. رد بالك توخر لتالي لارين "
انا :" اي تهنى.. انا مازلت متفكرة كلامك لكل وناوية نعمل بيه "
خالد :" اي هكا نحبك..قلي امورك مع عيسى ماتصلحتش ؟"
غمضت عينيا بالقوي ورجعت حليت عينيا نحكي
انا :" لا اصلا معاد فما شي يتصلح.. خلينا هكا كل حد على روحو خير "
خالد:" ميسالش.. المهم انت مرتاحة وخمم فمستقبلك تو اهم "
انا :" اي انشالله "
خالد:" مايا لكلام هذا ليك انت زادة..مدامك مغرومة بالفخار شوف خدمة فدومانك "
مايا :" اي انشالله ناوية هكاا "
خالد:" اي صحيتو الزوز.. وكان استحقيتو اي حاجة كلموني "
انا :" عيشك خالد ربي يخليك "
خالد:" من غير مزية.. وانشالله نهارين ونكلمك نقلك شعملت "
انا:" باهي نستناك "
خالد:" نخليكم تو ساهرين.. ايا بونوي "
انا ومايا:" بونوي "
علقت عليه وغزرت لمايا نحكي
انا :" ادعي نسمعو خبر باهي "
مايا :" حاسة بش نسمعو خبر باهي "
تبسمت وخذيت كاسة التاي.. بقينا ساهرين لقريب الفجر ماحسيناش بالوقت بقينا من موضوع لموضوع.. وين خففنا على بعضنا ونسيناا لي صار بكري مع سميحة.. تفكيرنا لكل كان ف عرض نزار وشنوة ناوين نعملو..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
