#عيسى_يحكي
اول ماهبطت وقفت قدام باب العمارة نرد فالنفس.. كبست عالبونية متاعي من لعصب لي حسيتو خضني منهاا ومن كلامها..مانيش فاهمها كيفاه تخمم ولا على شنوة ناوية بتصرفاتها هاذم..رسيت على سنيا بالقوي وقت تفكرت كلامهاا لي متأكد انهاا تقصدني بيه..رغم اني عارف انا لي خليتهاا تقول هكاكا وهذاكا لي وصلتهولها اما لقيت روحي بلحق مش متحمل انها ترجع كيما اول مرة.. كيما لقيت روحي مستغرب طريقة حديثها وهجومهاا عالطاولة كاني تستنى ف حد يكلمها بش تدور عليه.. تنهدت بالشوي وقت تفكرت الجرح لي ف خدهاا وشنوة عاشت هي لبارح من جرت الكلبة لخرى.. للحظة حسيت روحي بلحق ندمت اني كملت علاها بالطريقة هاذيكا وقتلي هي كانت خايفة ومجروحة.. كيفاه غشي عماني لدرجة اني حتى ماخففتش علاهااا وخليتها هكاكا.. ف اللحظة هاذي حسيت انو ماعنديش الحق لا بش نلومهاا ولا نعاتبها على تصرفاتها متاع بكري خاطر انا لي خليتها تعمل هكا.. خذيت نفس طويل حاولت نهدي روحي شوي ومشيت للورشة وين شفت ادم قاعد هو وعبودة.. قربتلهم نحكي
انا :" شبيكم وحدكم؟"
هز راسو معايا وضحك يحكي
ادم :" قصدك كنا وحدناا.. ايجا ايجا"
وقف من بلاصتو وقربلي.. ضحكت كيف ريتو عنقني بالقوي يحكي
ادم:" توحشتك يا ساقط..هكا تخليني وحدي الايامات هاذم لكل "
دورت بيديا عليهاا على ظهرو نحكي
انا :" ياخي مش كل يوم نحكي معاك "
بعد علياا وقحرلي يحكي
ادم :" ماغلطتش ك قتلك ساقط "
ضحكت وغزرت لعبودة لي حط كرسي يحكي
عبودة :" تفضل ارتاح معلم "
ضربت على كتفو بالشوي نحكي
انا :" عيشو عبودة "
ادم :" عبودة تعمل مزية على خوك.. برا جيبلنا زوز كيسان تاي.. نحب نهضم كسكروت التن.. بقى واحل ف معدتي "
تبسمت وقعدت نحكي
انا :" شلزك تاكل فيه.. علاش ماروحتش تتعشى ف داركم "
قعد بجنبي وحط ساق على ساق يحكي
ادم :" امي متضيفة عند أميرة اختي.. عندها تو قرابت الجمعة مخليتني لشر "
تلفتتلو نحكي
انا :" شبيك مامشيتش حذا غالية.. ياخي انت براني "
عدا بيديه على شعرو يحكي
ادم:" مانيش براني وغاليوتة جابتلي الايامات لي فاتو فطوري للورشة..اما برجولية حشمت حسيت روحي كثرت علاها "
قحرتلو نحكي
انا :" ياخي بيناتنا احنا كلام ك هذاا.. امي كيما امك وامك كيما امي..من غدوة فطورك وعشاك معايا حتى ترجع خالتي فاطمة "
ضحك يحكي
ادم :" مدامك حلفت والله لا نرجع عليك.. بش نمرجك حتى فطوم ترجع "
تبسمت نحكي
انا :" ميسالش "
ريتو كيف تنهد بالشوي يحكي
ادم :" انا نويت نعرس "
عقدت بحواجبي مستغرب نحكي
انا :" شنوة ؟ تحكي بجدك ؟"
ادم :" اي نحكي بجدي.. ناوي نشوف بنية حلال تاخذني بش كتمشي امي حذا للا اختي نلقاها هي.. تطيبلي وتغسلي حوايجي "
قحرتلو نحكي
انا :" وانت يديك وين؟ ماخذ بنت ناس تخدمك "
ضحك يحكي
ادم:" يدي فجيبي انا "
قحرتلو وغزرت قدامي..ضغطت على يدي بالقوي وقت لمحتها قدامي..يعني هي وهي وخرجت الفر_خة الوقت هذا..دمي فور مني ك ريتها غزرتلي ودورت وجهها.. نفخت بالقوي ك سمعت ادم يحكي
ادم :" مش هذيكا بنت خالك ؟"
انا :" اي "
ادم :" شكون هذيكا لي معاها ؟ "
انا :" صاحبتها "
ادم :" وصاحبتها علاش جاية؟"
نفخت بالقوي نحكي
انا :" جات بش تبقى حذاهاا "
ضحك يحكي
ادم :" يافرحت سموحة.. هي وجهها ك بوكشاش من ربي وتزيد تلقى حذاها توريست "
قحرتلو ورجعت غزرتلها وين شفتها بعدت علياا.. للحظة كان لقيت راني مشيت طلعتها بالسيف علاهاا بش تعرف كيفاه خارجة الوقت هذاا تقابل يوسف.. فقت من سرحتي على عبودة لي رجع.. حط الكاس قدامي وقعد.. هزيتو عملت رشفة وبقيت نسمع ف ادم وعبودة يحكيو وانا مش معاهم مخي لكل فيهاا.. بقيت ضربة ضربتين نعس على راس النهج بش نشوفها رجعت ولالا.. تلفت على صوت ادم يحكي
ادم :" غدوة بش تهبط شد خدمتك؟"
انا :" اي بقدرة ربي "
ادم :"هيا خير خليني انا نرجع نشد ورشة باب منارة "
درتلو بكلي نحكي
انا :" عملت كيما وصيتك ف غيابي مش هكا ؟"
حط الكاسة من يديه وغزرلي يحكي
ادم:" اي تهنى.. عزيز بقى تحت عيني.. ماغفلتش عليه لحظة "
انا :" اي وكان ماشي مريڤل "
عدا بيديه على وجهو يحكي
ادم:" بصراحة عزيز اي مريڤل وحتى سبحان الله صار يسمع كلام خالك.. اما اكا الم**** حمزة تعارك مع جبران "
حليت عينيا على وسعهم نحكي
انا :" شنوة ؟ علاش ماقتليش ك سألتك؟"
قحرلي يحكي
ادم:" بلاهي كيفاه بش نقلك وانت ف السماء السابعة.. اصلا سايي انا فضيتها وقتها من غير حتى مايسمع خالك "
نفخت بالقوي نحكي
انا :" علاش تعاركو؟"
ادم :" فك علينا من الخدمة تو.. ياسيدي غدوة تو نحكيلك كل شي.. الليلة خلينا ساهرين عاملين كيف "
هزيتلو براسي باهي نحكي
انا :" باهي غدوة الصباح قبل ماتمشي لورشتك تعادالي نحكيو "
ادم :" تدلل يا مدلل "
دوب تبسمت ورجعت غزرت قدامي.. مانعرفش قداه تعدا وقت وانا مازلت ساهر هكاا رغم التعب لي حسيتو ماحبيتش نروح قبلها.. دمي فور ولعصب ضربني ك ريتهاا راجعة بعد أكثر من ساعة تضحك ولا على بالهاا بالوقت ولا الناس لي تغزر.. نزلت عالكاسة بالقوي حاولت نشد روحي بش مانقومش نفش فيهاا غيضي خاصة من غزرتهاا كيفاه قحرتلي.. خذيت نفس طويل وبقيت ساهر مع لولاد حسيت روحي نغلي لدرجة اني ماحبيتش نطلع تو بش مانزيدش نشوفهاا..
VOUS LISEZ
#مُتمردة_العيسى ❤️🔥 (الستاتي الثاني)
Romantizm#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
