#مايا_تحكي
حطيت لمغرفة من يدي وهزيت راسي مع رينو كوقفت.. عديت بعينيا عليها نحكي
انا :" رينو كمل فطورك ؟"
لارين:" الحمدالله شبعت "
غالية :" شنوة شبعت ؟ اقعد كمل صحنك "
لارين:" والله شبعت عمتي.. نحب ندخل نرقد شوي.. راسي يوجع "
انا :" باهي برا ارتاح وبعد زيد قوم افطر "
هزتلي براسها باهي وعدات بعيناها علينا تحكي
لارين:" صحة ليكم "
تلفتت وبقيت نغزرلها حتى دخلت للبيت وين حسيت روحي تحيرت علاهاا.. من وقت لي قعدنا عالطاولة وهي سارحة حتى لفطور مافطرتش..غزرت لعمتو تحكي
غالية :" مايا ياخي لارين شبيها ؟ من البارح وهي مش عاجبتني "
ريت سميحة ك هزت راسها وبقات تغزرلي.. غزرتلها على جنب ورجعت غزرت لعمتو نحكي
انا :" مابيها شي..اما رينو هكا ك تسهر برشة تقوم تاعبة "
سميحة :" مالا قلي رمضان بش تعديه نوم ؟"
هزيت بحاجبي نحكي
انا :" اي خلاها تعديه نوم.. وين المشكل ؟"
سميحة :" المشكل انورمضان فيه حوسة وتو الخاطر برشة لازمنا يد يد نعاونو بعضنا "
نفخت بالشوي وغزرت لعمتو نحكي
انا :" عمتو تو انا نعاونك "
سمعتها ك ضحكت تحكي
سميحة :" والله تعمل مزية مدامك فاطرة مش كيفنا احنا الصيام يفشلناا "
ضغطت على يدي بالقوي وغزرت لعمتو ك قحرتلها تحكي
غالية :" يفشلك وحدك.. انا رمضان مايغلبنيش ونحب قضيتو ربي ينزل فيه البركة والصحة... "
رجعت غزرتلي وضحكت تحكي
غالية :" وانت ياماما يقوي سعدك.. اماارتاح ولعشية قوم عاوني "
تبسمت نحكي
انا :" باهي عمتو "
غالية :" ايا قوم بدل حوايجك خلينا نخرجو "
هزيتلها براسي باهي وقمت.. ريتها ك نفخت بالشوي تحكي
سميحة:" هاي الطاولة وحلت فياا هي والماعون "
غالية :" هذا ماعون تسمي فيه.. على زوز اصحنة "
قحرتلهاا ومشيت طول للبيت ماحبيتش نزيد نسمعها.. اول مادخلت عقدت بحواجبي مستغربة البيت كيفاه ظلمة تنهدت بالشوي وقربت للفرش طول تفقدت رينو وين لقيتها راقدة.. استويتلها مخدتهاا وطبست بستها من راسها..عديت بعينيا عليها نغزرلها كيفاه تململت
وين لقيت روحي نخمم فيها وفحكاية نزار كان ماتتمش وقتها اكيد بش تتعب أكثر.. كيما حسيت روحي غزلت من عيسى لي كل مرة وهو مخلاها تبكي هكاا.. كل مانخفف علاهاا ونخلاهاا تنسى شوي نلقاه رجع تعبها.. دوب غطيتها شوي بالملحفة وقربت وين الخزانة جبدت جبة لبستها وبقيت نخمم كان مش من الحشمة من عمتو لي راني ماخرجتش وبقيت حذا رينو..فردت شعري لتالي ورشيت شوي برفان وخرجت بعد مازدت تفقدت رينو.. غزرت لعمتو كِخرجت من البيت لمقابلة وين شفتها غيرت حوايجها هي زادة.. عدات بعيناها عليا وضحكت تحكي
غالية :" محلى زين بنتي ف الجبة "
تبسمت نحكي
انا :" عيشك عمتو "
غالية :" رينو رقدت ؟"
انا :" اي تفقدتها قبل مانخرج لقيتها رقدت "
غالية :" ياروحي على بنتي.. اكيد مازالت متقلقة من لي صار لبارح مع سميحة "
انا :" بصراحة اي.. رينو تقلقت عاللخر "
غالية :" نعرف..تو نزيد انبه علاها سميحة بش تبعدها..اصلا بعد لي عملو سيدي خوياا مانظنش تزيد تقلقهاا "
انا :" هيا عمتو خلينا نمشيو ونرجعو فيسع قبل ماريتو تفيق "
هزتلي براسها باهي وخرجناا طول.. اول مانزلناا عديت بعينيا عالحومة وين شفتها كيفاه معبية على غير العادة.. غزرت لعمتي نحكي
انا :" ياخي لمرا بعيدة ؟"
غالية :" لا مش برشة "
هزيتلها براسي باهي وشدينا الثنية.. تلفتنا عالصوت لي نادى وراانا وين شفت سميحة خلطت عليناا.. عقدت بحواجبي مستغربة شمجيبهاا.. غزرت لعمتو ك قربتلها تحكي
غالية:" سميحة شبيك؟"
عدات بعيناها علينا وغزرت لعمتو تحكي
سميحة :" شي قلت نجي معاكم وفرد وقت تفكرت اني لازم نتعدا نشري شوي حاجات "
غالية :" هات تو نشريلك انا وانت اطلع ماتخليش رينو وحدها "
سميحة :" شنوة بش يصيرلها اهيكا فبيتها راقدة "
قحرتلها وغزرت لعمتو ك هزتلها براسها باهي.. بقيت نمشي معاهم ونسمع فيهم يحكيو وتفكيري ف رينو كيفاه وحدها.. شوي وقت ووصلنا قدام لمحل.. دخلت معاهم وبقيت واقفة على جنب نتفرج ف الماعون لي كان من فخار.. تنهدت بالشوي وقت تفكرت لمحل متاعي والماعون لي كنت نحضر فيه وين لقيت روحي فقدت هذا لكل ومش عارفة كيفاه بش نرجع نخدم ولا وقتاه.. فقت من سرحتي على صوت سميحة تحكي
سميحة :" مايا شد لفلوس هاذم وبرا للكوشة لي ف راس النهج جيب 3 خبزات "
انا :" اما انا مانعرفش الكوشة وين ؟"
حليت عينيا على وسعهم ك ريتها شدتني من مرفقي وخرجتني لبرا.. اشرتلي بيداها لخرى تحكي
سميحة:" كمل ف طويل دور مع ثاني نهج على يدك ليسار "
غزرت للطريق نحكي
انا :" علاش ماتكملش انت وتمشي تشري وحدك ؟"
سميحة :" احنا مازلنا نبطاو ونخاف الخبز يوفى.. برا مايصيرلك شي "
غزرت لعمتو ك خلطت علينا تحكي
غالية :" سميحة سيبها تو نمشي انا "
تنهدت بالشوي وخذيت من يداها لفلوس نحكي
انا :" لا عمتو ارتاح انت تو نمشي فيسع "
غالية :" باهي ياماما وساسي روحك "
هزيتلها براسي باهي وشديت ثنية النهج الطويل وفرد وقت نتفكر هي منين قتلي ندور..حسيت روحي دخلت بعضي من الحضبة لي كانت ومن الناس الماشيين جايين.. وقفت على بلاصتي نغزر للنهوجات ماعرفت منين ندور.. نفخت بالشوي ودورت مع اول نهج عرضني على يدي ليسار.. وقفت فبلاصتي ندور فعينيا نشوف فالكوشة.. عصابي توترت ك مالقيتهاش وين رجعت بالتوالي وباقي نلوج بعينيا.. شهقت بالقوي عالموتور لي شد فران قدامي وين لفلوس طاحو من يدي من الفجعة.. هزيت راسي ننهج ونغزر لراجل لي مغطي وجهو بالكاسك كيفاه مازال قدامي ماتحركش وين حسيت روحي غزلت منو كيفاه ماخلانيش نتعدا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
