#لارين_تحكي
غمضت عينيا بالقوي و رجعت حليتهم على صوت عمتي وكلامهاا لي زادو علياا خاطر يذكروني بنور.. تحكي
غالية :" رينو شبيك ماكش قاعدة تاكل.. شد بريكتك بردت.... "
قصيت علاهاا وغزرتلها نحكي
انا :" عمتي ماعينيش تو "
عدات بعيناها علياا وعقدت بحواجبها تحكي
غالية :" لارين شبي بنتي ؟ متقلقة من حاجة؟"
هزيتلها براسي لا وتبسمت بالسيف نحكي
انا :" لا عمتي "
تلفتت على صوتها تحكي
سميحة :" علاش بش تتقلق.. ليوم عداتو نهار كامل نوم.. وزيد هذا اول رمضان تعديه ف بلادهاا بيناتنااا بين أهلها وماليهاا مش متغربة.. حقها تفرح باللمة هاذي مش تتقلق "
كبست عالمغرفة لي كانت ف يدي وين حسيت دقات قلبي ضربت من لعصب لي حسيتو منهاا.. قحرتلها وعليت ف صوتي شوي نحكي
انا :" ردي بالك نهار يكذب عليك مخك ويقلك لي انا حاسبتك من أهلي وماليااا.. والبلاد واللمة لي انت تحكي علاهم افرحي انت بيهم وحدك.. انا بلادي هي فرنساا وين نور ولمتي الحقيقة نور.. مش لمة انت موجودة فيهاا "
ريتهم كيف هزو ريوسهم معايا لكل وغزرولي ساكتين..رسيت على سنيا بالقوي على يديه لي تحطت فوق كتفي يحكي
جابر :" رينو شبيك صارت حاجة قلقتك ليوم... "
قصيت عليه ك حطيت لمغرفة من يدي نحكي
انا :" مابياا شي.. انا ماكلمتكمش ساكتة من بكري هي لي جبدتني وحدهااا "
قحرلها ورجع غزرلي يحكي
جابر :" نعرف ياروحي وهي ماتجاوبهاش.. اما انا نحكي من بكري نرا فيك ساكتة وماكش تاكل "
ضميت على شفايفي شديت دمعتي بالسيف نحكي
انا :" خليوني على راحتي وقت نحب ناكل تو ناكل مانيش صغيرة.. ماتبقاوش تسالوني شبيك شبيك.. ماتضغطوووش علياا "
عدا بعينيه عليا يحكي
جابر :" باهي بنتي تصرف على راحتك وحد مايقلقك "
مسحت دمعتي لي طاحت وقمت من بلاصتي نحكي
انا :" انا شبعت.. تو ناكل بعد "
شدني من يدي يحكي
جابر :" كمل صحفتك عالاقل.... "
قصيت عليه ك جبدت يدي منو نحكي
انا :" الحمدالله "
غزرت لمايا ك وقفت زادة وغزرتلي تحكي
مايا :" خليني نجي معاك "
تبسمت بالسيف نحكي
انا :" لا كمل عشاك..نحب نبقى وحدي شوي "
عدات بعيناها علياا وهزتلي براسها باهي.. عطيتهم بظهري ودخلت نجري للبيت..اول ماسكرت الباب ورايا طرشقت بالبكاء..حسيت روحي تضغطت ومعادش انجم نتحمل أكثر من هكاا.. ف اللحظة هاذي كان لقيت راني عملت جوانح وطرت لقبر لنور.. تمنيت كان جات حذاياا بش كل مانتوجع نمشي نبكي عندها.. نمشي نحكيلها قداه توحشتها وقداه خلات بلاصة علياا..فكرة اني تحرمت حتى من قبرها خلاتني نحس قلبي تقطع.. كيفاه بش نتحمل البعد والفراق هذا مش عارفة وقتلي نحس فيهم عمال يكبرو اكثر مع الوقت.. كل نهار وكل لحظة تتعدا علياا نحس وجيعتني قاعدة تزيد ومش لاقية حتى حد ولا حتى حاجة تخفف علياا.. حتى ذكرياتي معاها لي نهربلهم وقت نتوحشها نحسهم يزيدو يشعلولي ناري خاطرهم ياكدولي أكثر انو نور ماتت وخلاتني.. اني صرت يتيمة الام والبو من بعدها.. وانو مهما الدنياا تحط قدامي عباد مفما حد ينجم يعوضلي حتى شوي من نور..قربت قعدت على طرف الفرش وبقيت نغزر قدامي كان دموعي نازلين.. مسحتهم فيسع وقت ريت الباب تحل.. ضميت على شفايفي ك ريتو هو دخل.. عدا بعينيه علياا يحكي
جابر :" ميسالش ندخل؟"
عديت بيديا الزوز على وجهي وهزيتلو براسي باهي.. سكر الباب وراه وقرب ناحيتي.. قعد بجنبي وشدني من يدي يحكي
جابر :" رينو شبي بنتي ؟ احكيلي مش انا بوك "
عديت بعينيا عليه وتنهدت بالشوي نحكي
انا :" مابيا شي جابر... "
قص علياا ك شدني من زنودي دورني قدامو وعدا بعينيه عليا يحكي
جابر :" ماتخبيش علياا..قلي شنوة لي بكى بنتي هكا "
ضميت على شفايفي وين دموعي رجعو نزلو اكثر نحكي
انا :" جابر انا توحشت نور.. توحشتها برشة ومانيش عارفة كيفاه بش نعمل من غيرها..كيفاه بش نكمل حياتي بلا بيها "
حط يديه على خدي ومسحلي دموعي.. عدا بعينيه علياا وغزرلي درا كيفاه يحكي
جابر :" نعرف وراس بنتي وحاسس بيك زادة.. نعرف فراقها صعيب عليك وحد ماينجم يعوضلك نور خاطر نور ماتتعوضش وعلى خاطرها هي انت بش تكمل حياتك وبش تكون قوية.. ماتبكيش هكا وتخلاها متحيرة عليك.. احنا ف ايامات فضيلة تو ادعيلهاا بالرحمة "
انا :" ندعيلها ديما.. اما مانجمش مانبكيش خاصة ك نتفكر كيفاه هي بعيدة علياا تو.. ماتت وتدفنت ف بلاد اخرى واني عايشة مع لي كانو السبب ف هذاا.. انا زادة عبد وعندي طاقة ولي صار ف حياتي هذا فوق طاقتي.. انت ماتنجمش تحس بياا خاطرك بلحق بين اهلك وماليك عكسي انا.. قد مانحاول نحس روحي أهلى لكل ماتو بموت نور "
طبس راسو وعدا بيديه على وجهو.. رجع غزرلي يحكي
جابر :" عارف انو صعيب نعوضلك نور حتى شوي..اما انا بوك لارين.. انا اهلك تو وحضني مفتوحلك ديما.. ياريت كان جا فيديا نرجع الوقت بالتوالي راني خليت هذا لكل مايصيرش.. اما انا بيدي عاجز وماعندي شي تو كان اني نحاول نعوضلك شوي..غير انت اعطيني فرصة..عالاقل اسمحلي نشاركك حتى دموعك ماتبكيش وحدك هكاا..خليني نخفف عليك خاطرني والله حاسس بيك..لوجيعة الي انت حاستها 5شهور مرافقتني 22سنة "
عديت بعينيا عليه من غير حتى كلمة.. لقيت روحي مش عارفة شنوة نجاوبو خاطر مهما يقول ف اللحظة هاذي شي ماينجم يخفف علياا..
VOUS LISEZ
#مُتمردة_العيسى ❤️🔥 (الستاتي الثاني)
Romantik#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
