#لارين_تحكي
حليت عينيا على ضو الشمس لي ضرب فياا.. تململت شوي وهزيت روحي..تكيت بظهري لتالي وعديت بعينيا عالبيت وين تفكرت اني راقدة حذاه.. عقدت بحواجبي مستغربة ك مالقيتوش مش عارفة وينو.. بعدت الملحفة من فوقي وقمت.. دخلت طول لسالدوبان غسلت حالتي وريقلت أموري ورجعت للبيت وين شفتو دخل.. عديت بعينيا عليه مستغربة لبسو كانو كان لبرا.. قربلي يحكي
عيسى :" صباح الخير "
انا :" صباح النور.. ياخي كنت لبرا ؟"
هزلي براسو لا وقرب للشباك حلو وين النسمة دخلت.. غزرلي يحكي
عيسى :" لاا ماكنتش لبرا.. اما بش نخرجو تو "
عقدت بحواجبي نحكي
انا :" وين عنا نخرجو ؟عيسى مش قتلك مانحبش نخرج ليوم "
قرب ناحيتي ووقف قدامي..عدا بعينيه علياا يحكي
عيسى :" ميسالش تسمع لكلام..وتمشي تبدل دبشك "
نفخت بالشوي وقعدت على طرف السرير..رجعت شعري لتالي وغزرتلو نحكي
انا :" علاش مش انت لي تسمع كلامي المرة هاذي ؟ عيسى انا مانحبش نخرج للشط.. ومانحب نرا حد.. خاصة اكا جيهان خاطر منهاا هي بدأ هذا لكل.. مانحبش نتوتر امان ولا نغزل خليني "
قعد بجنبي وغزرلي يحكي
عيسى :" شكون قلك انت بش تراها اصلا ؟"
انا :" هي مشات ؟"
عيسى :" مانعرفش.. مشات ولا قعدت أمورها "
عوجت شفايفي نحكي
انا :" يعني مازالت.. وتو تقابلنا ف الريستو.. اففف راني نكرهها..وخلاتني نكره لبلاصة لكل هي والسخطة لآخر "
دوب تبسم يحكي
عيسى :" كملت طرح التنڤنڤ متاعك.. قوم البس تو "
انا :" باهي خليني تو.. تو فليل نخرجو "
هز بحاجبو يحكي
عيسى :" كان نخرجو ف ليل بش نوصلو مخر "
حليت عينيا على وسعهم ودرتلو بكلي نحكي
انا :" عيسى احنا مروحين ؟؟؟"
هزلي براسو لا يحكي
عيسى :" لاا "
انا :" ياعيسى تكلم امان.. علاش هكاا "
تنهد بالشوي يحكي
عيسى :" ماشين لTamaricciu "
انا :" شمهزنا غادي "
عدا بعينيه عليا وغزرلي درا كيفاه يحكي
عيسى :" ماشين بش نعديو نهارين..خاطر انت ماكش مرتاحة هناا ومتقلقة كنت بش نهزك ونمشيو لوتيل.. ياخي خالد اقترح علياا Tamaricciu.. هو عندو دار صغيرة غادي قلي امشيوا ابقاو غادي "
عديت بعينيا عليه وتبمست نحكي
انا :" عيسى انت خممت تهزني لوتيل خاطر انا مش مرتاحة هناا؟"
عدا بعينيه عليا وعقد بحواجبو يحكي
عيسى:" يعني انت سمعتي كان الجملة هاذي ؟"
ضحكت نحكي
انا :" ههه لا سمعت لكل.. اما فرحت خاطرك خممت ف راحتي هكاا "
تبسم يحكي
عيسى :" باهي شقلت تحب نمشيو لدار خالد ولا لوتيل؟"
عضيت على شفايفي نحكي
انا :" بالنسبة لياا كيفكيف..المهم انت معايا "
عدا بعينيه عليا وغزرلي درا كيفاه يحكي
عيسى :" وانا ديما معاك "
تبسمت نحكي
انا:" قلي احنا ماشين وحدنا لدار خالد ولا هو معانا؟"
هزلي براسو لا يحكي
عيسى :"لا وحدناا..خالد بش يبقى هناا مع صحابو "
عديت بعينيا عليه نحكي
انا :" مالا نمشيو غادي..القعدة ف الاوتال نكرهها انا "
وقف من بلاصتو وغزرلي يحكي
عيسى:" مالا برا بدل دبشك وحضر فاليزتك بش نمشيو..وحط ف بالك رانا مروحين من غادي طول يعني ماتنسى شي "
قمت من بلاصتي وتبسمت نحكي
انا:" اي خير.. قداه بش نقعدو احنا غادي؟"
عيسى :" مانعرفش لارين.. مش حبيت تروح خاطر انت هناا ؟ مالا هانا بعدنا وقت لي نروحو تو نروحو "
هزيتلو براسي باهي نحكي
انا :" اي وقت لي نروحو تو نروحو.. خليني نمشي لبيتي "
عيسى :" باهي وماتبطاش "
خليتو واقف وخرجت فيسع.. دخلت لبيتي وسكرت الباب ورايا.. ضحكت وحدي من الفرحة لي حسيتها.. مانيش مصدقة انو عيسى خمم فياا هكاا وانو بش نبقاو وحدنا بعيد على هناا وين حسيت روحي ارتحت حتى قبل مانمشي.. قربت فيسع للفاليز حطيتها عالفرش وجبدت روبة خفيفة كانت طويلة شوي ف اللون الأزرق.. لبستها فيسع وقربت وين لمرايا ريقلت أموري ورجعت للبيت لميت كل شي وهزيت ساكي والفاليزات وخرجت وين شفتو هو زادة خرج.. قربلي يحكي
عيسى:" هات عليك "
عطيتهملو وضحكت..هز راسو معايا وغزرلي يحكي
عيسى :" شبيك تضحك ؟"
انا :" غاضوني الفاليزات.. بقاو مسافرين من بلاصة لبلاصة "
غزرلي على جنب يحكي
عيسى :" ربي يهدي لي كان السبب "
عوجت شفايفي وتلفتت سكرت باب البيت ونزلت معاه وين شفت خالد يفطر.. قربتلو نحكي
انا :" بونجور خالد "
هز راسو معاياا وتبسم يحكي
خالد:" بونجور.. لا ظاهر ليوم لباس وين كنا ووين صبحنا "
انا :" اي الحمدلله ليوم خير "
وقف من بلاصتو يحكي
خالد:" ماشين تو؟"
عيسى :" اي "
قربت للطاولة خذيت كعبة كرواسون نحكي
انا :" دقيقة نفطر "
عيسى :" تو تفطر ك نوصلو..اصبر شوي "
هزيت الكعبة وكليت منها شوي.. قحرلي وغزر لخالد يحكي
عيسى :" ماتنساش تكلمني.. مانوصيكش "
خالد :" اي تهنى.. من هناا لغدوة ف ليل نكلمك "
عيسى:" باهي نستناك "
حطيت الكعبة من يدي وين حسيت روحي تسقمت وقت سمعتهم وفهمت كلامهم.. ريتو ك خذا مفاتح من يد خالد وغزرلي يحكي
عيسى :" هيا "
هزيتلو براسي باهي وقربت لخالد.. تبسمت نحكي
انا :" عيشك خالد على كل شي.. وسامحني كان فسدتلكم الجية "
خالد :" اولا ماعملت شي.. ثانياا انت سامحني على لي صار وانت ف محلي "
انا :" وانا سامحتك "
ضحك يحكي
خالد:" هياا اطمنت تو "
خرجت مع عيسى بعد ماسلم هو زادة عليه وطلعنا ف الكرهبة بعد ماحط الفاليزات.. غزرتلو نحكي
انا :" ادعي الرحلة هاذي تتعدا سلامات "
دوب تبسم يحكي
عيسى :" ادعي تكون آخر رحلة خلينا نروحو "
ضحكت وغزرت لثنية.. حليت الشباك بجنبي وخذيت نفس من النسمة وين هديت اكثر.. مانعرفش علاش حاسة روحي فرحانة هكاا كاني ف لحظة نسيت لي صار لبارح وهذا بفضل عيسى..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
