#عيسى_يحكي
اول ماخرج خالد وسكر الباب.. نحيت مريولي رميتو على جنب وقربت للفاليز حطيتها عالفرش جبدت حوايجي حطيتهم على جنب ودخلت طول لسالدوبان.. عملت دوش خفيف وخرجت لفيت نصي بالمنشفة وكملت ريقلت أموري ورجعت للبيت..قريت هزيت تاليفوني شفت الميساجات لي عندي ورميتو على جنب..لبست شورط خفيف وتسطحت بش ناخذ غمضة..اول ماغمضت عينيا رجعت حليتهم على صوت الميساج لي وصلني.. هزيت روحي شوي ومديت يدي خذيتو.. تكيت براسي لتالي وحليت بش نشوف شكون.. تبسمت ك ريت ميساج منها
لارين ( عيسى رقدت ؟ )
هزيت روحي اكثر وجاوبتها
انا ( لا مازلت )
حطيت التاليفون على جنب ورجعت تسطحت.. نفخت بالشوي ك رجعت سمعت صوت الميساج.. هزيت التاليفون وحليتو
لارين ( حتى انا مارقدتش.. عيسى هياا خلينا نخرجو شوي.. علاش حابسني ف البيت هكا )
نفخت بالشوي خاطر ندمت اني جاوبتها عارف بش تشد صحيح تو.. جاوبتها
انا ( لارين تو مازلنا ك وصلنا.. ارتاح شوي )
رميت التاليفون ورجعت تسطحت.. غمضت عينيا حاولت نغفى شوي.. كبست عالبونية متاعي ك سمعت التاليفون نوقز المرة هاذي.. الفر/خة لا خلاتني نرتاح.. قمت من بلاصتي ورديت علاها نحكي
انا :" شنوة لارين شنوووة "
لارين:" شبيك تصيح علياا ؟"
عضيت على شفايفي نحكي
انا :" مانيش نصيح.. اما قاعد نحاول نرقد "
لارين:" عيسى علاش تحاول.. مدام مارقدتش يعني ماعندكش نوم.. تحب تجيبو بالسيف "
رسيت على سنيا بالقوي نحكي
انا :" شتحبي؟؟ "
لارين:" نحب نخرج شوي.. قاعدة نتفرج ف الناس من البلكونة من بعيد كيفاه عاملين جو..وانا نسخف قاعدة نستنى فيك "
انا :" لارين الليل مازال طويل.. نخرجو حتى مخر "
تنهدت بالشوي ك لقيتها ساكتة ماجاوبتنيش وين تخيلت شكلها راي كشبرت وجهها كالعادة.. عديت بيديا على وجهي نحكي
انا :" درج ونجيك نخرجو "
تبسمت على صوتها لي صاح تحكي
لارين:" بلللللحق.. عيشك عيسى نستنااااك ماتفوتش درج "
انا :" باهي... "
نزلت التاليفون وشفتها كيفاه علقت ف وجهي.. رميت التاليفون على طول يدي وقمت بش نبدل حوايجي.. لبست شورط ف الباج وشوميز بيضاء خفيفة ومعاهم بسكات بيضاء..كملت ريقلت أموري فيسع وقربت هزيت تاليفوني وخرجت.. سكرت الباب وراياا وقربت وين بيتها..اول مادقيت الباب حلت بالوقت كاني واقفة وراه.. تبسمت تحكي
لارين :" عيسى "
عديت بعينيا عليها وهزيت بحاجبي نحكي
انا :" شبيك ماحضرتش روحك ؟"
طبست رأسها غزرت لروحها ورجعت غزرتلي..عضت على شفايفها ووطات ف صوتها تحكي
لارين:" لا انا حاضرة.. عيسى عاد شوف "
وخرت لتالي ورجعت تحكي
لارين:" الروبة طويلة تحت الركبة و ماهيش عريانة والله وزيد الدنياا ليل شكون بش يغزرلي وهاني معاك حد مايكلمني.. امان عيسى هاذم حوايج لبحر ياخي شنوة تحبني نلبس... "
قصيت علاهاا نحكي
انا :" اسكت..اسكتتت..لواحد يندم خاطر قال كلمة "
قربتلي وضحكت تحكي
لارين:" يعني عادي نخرج بيها "
ضيقت عينيا فيها ومديت يدي طلعت لكتاف الطايحة نحكي
انا :" هكا عادي "
ضحكت تحكي
لارين:" رغم انو شكلها فسد اما ميسالش على خاطرك نخلاهاا هكا "
اشرتلها بعينيا نحكي
انا :" قدامي "
لارين :" دقيقة نجيب تاليفوني وساكي "
هزيتلها براسي باهي وجبدت تاليفوني بعثت ميساج لخالد خبرتو انو نزلناا ماحبيتش نطلبو لايكون راقد.. ريتها ك خرجت وسكرت باب بيتها..وقفت قدامي تحكي
لارين:" هياا "
هزيتلها براسي باهي ونزلنا مع بعضنا..غزرتلي تحكي
لارين :" وين بش نقعدو ؟"
انا :" مانعرفش تو نشوفو "
تبسمت تحكي
لارين:" تعرف من بكري وانا ف البلكونة نتفرج.. ريستو خالد محلاه.. فيه جو وغناء والناس تشطح "
انا :" اي المطلوب؟"
لارين :" نمشيو نبقاو شوي فيه "
حليت الباب وخرجنا لبرا.. طبست راسي وغزرتلها تحكي
لارين :" انجمو نتعداو من الثنية هاذي خلينا نمشيو عالرمل "
تنهدت بالشوي نحكي
انا :" انجمو "
ريتها ك ضحكت وطبست تنحي ف صندالها.. هزت راسها وغزرتلي تحكي
لارين :" نحي بسكاتك انت زادة "
عديت بيديا الزوز على وجهي وطبست نحيتها وهزيتها.. ريتها ك وقفت وعدات بعيناها علياا تحكي
لارين:" تعرف محلاك ب اللبسة الكاجول "
تبسمت نحكي
انا :" عيشك "
لارين :" هياا خلينا نمشيو "
هزيتلها براسي باهي وبقينا نتمشاو حتى وصلنا للرمل..ريتها ك جرات وسبقتني.. بقيت نغزرلها كيفاه تحرك ف ساقيها وتضحك..لقيت روحي شايخ وانا نغزرلها كيفاه فرحانة ك الصغار.. رجعت قربتلي وشدتني من يدي تحكي
لارين:" شوف الرمل قداه دافي محلاه "
هزيتلها براسي اي من غير حتى كلمة.. بقينا نتمشاو حتى وصلناا لريستو.. غزرتلها نحكي
انا :" خلينا نقعدو ف الطاولة هاذي لبرا من غير ما ندخلو "
لارين:" اي اي مانحبش ندخل اصلا.. هنا خير "
جبدتلها الكرسي نحكي
انا :" اقعد "
ريتها ك حطت صندالها وقعدت.. قعدت بجنبهاا وتكيت بظهري لتالي.. عديت بيديا على وجهي وكبست على جبيني.. ريتها ك قربتلي تحكي
لارين :" راسك يوجع؟"
انا :" شوي "
عدات بعيناها علياا وغزرتلي درا كيفاه تحكي
لارين :" نبقاو ساعة كهوو ونرجعو.. امشي ارقد "
دوب تبسمت نحكي
انا :" باهي "
هزيت راسي على صوت خالد لي خلط عليناا يحكي
خالد:" شوف السقاط.. خلوني راقد وجاو وحدهم "
قحرتلو نحكي
انا :" ايجا اقعد "
خالد:"نمشي نجيبلكم حاجات تتشرب وتتاكل ونجي "
هزيتلو براسي باهي ورجعت غزرتلها وين شفتها كيفاه تعدي فعيناها مرة عالبحر مرة عالناس لي ف ريستو وتتبسم وحدها.. تكيت بظهري لتالي وبقيت نغزرلها ساكت لقيت روحي عامل جو علاهاا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
