#عيسى_يحكي
غمضت عينيا بالقوي على كلمة نكرهك لي خرجت منها..رغم انها مش اول مرة تقولها اما المرة هاذي حسيتها قلقتني..كبست علاها وخليتها تبكي من غير مانكلمهاا.. نعرف روحي كثرت علاها ومش عارف كيفاه نتصرف بش نرضيهاا.. طبست راسي وغزرتلها ك حسيتها هدات شوي نحكي
انا :" لارين ميسالش نحكيو شوي؟"
حطت يداها على صدري وذزتني تحكي
لارين:" ماعندي مانحكي معاك..ابعدني "
تنهدت بالشوي وبعدت علاهاا.. عديت بعينيا عليها نحكي
انا :" باهي اسمعني وبعد تونبعدك... "
قص علياا صوت تاليفوني لي نوقز..جبدتو وين شفت خالد.. رديت عليه نحكي
انا :" وي خالد؟"
خالد:" عيسى وينك..راني مالقيتش لارين... "
قصيت عليه نحكي
انا :" لارين معاياا "
خالد:" شبي سماك ماتكلمتش..مخليني ندور هكاا.. وينكم تو؟"
عديت بيديا على وجهي نحكي
انا :" احنا وين place bellecour "
خالد :" باهي نجيب كرهبتي ونجيكم..المهم قلي لارين سافا "
غزرتلها وين شفتها عاطيتني بظهرها.. تنهدت بالشوي نحكي
انا :" اي سافا.. انا بش نعلق توماتبطاش "
علقت عليه التاليفون خبيتو وقربتلها شوي نحكي
انا :" هاو خالد جاي.. شرايك نهزك تفطر فبلاصة أخرى؟"
ريتها ك دورت وجهها بلا ماتجاوبني..عديت بيديا الزوز على وجهي وبقيت ساكت ماحبيتش نزيد نقلقها.. مانعرفش قداه بقينا هكاا ساكتين وهي عاطيتني بظهرها.. شوي وشفت خالد ك جاء.. قرب ناحيتنا وغزرلها يحكي
خالد:" لارين لباس ؟"
غزرتلو وهزتلو براسها اي تحكي
لارين :" اي "
خالد:" باهي هياا خلينا نمشيو "
ريتها ك ربعت يداها تحكي
لارين :" انا ماعندي وين نمشي بش نبقى هناا "
نفخت بالشوي نحكي
انا :" لارين يهديك ربي وين عندك تبقى هناا ؟"
قحرتلي تحكي
لارين:" ماتحكيييش معايااا "
دورتلها بكلي وهزيتلها براسي باهي نحكي
انا :" باهي مانيش بش نحكي معاك.. هياا قوم "
دورت وجهها وغزرت لخالد لي قربلها تحكي
لارين:" مانيش بش نقوووم..حد ماقلكم تخلطو علياا"
رسيت على سنيا ك ريتو طبس على ركايبو قدامها يحكي
خالد:" لارين كيفاه تحبنا مانخلطوش عليك.. ساعة انت كيفاه تخرج هكاا بلا ماتقوللنا..حيرتنا عليك "
لارين:" مانيش صغيرة حتى تتحيرو علياا "
خالد :" نعرف ماكش صغيرة..اما حقك قلتلنا.. المهم تو شرايك تقوم خلينا نروحو وتونحكيو ف الدار "
هزتلو براسها لا تحكي
لارين:" لااا مانحب نمشي لحتى بلاصة "
خالد :" لارين لبلاصة هاذي خايبة مايجيش تبقى هنا.. الدنيا قريب تظلام "
ريتها ك عضت على شفايفها وين عيناها زغللو من غير ماتجاوبو.. تنهدت بالشوي نحكي
انا :" لارين نعرف انك متغششة.. اما مايجيش تبقى هنا "
غزرت لخالد تحكي
لارين:" باهي خالد تو نمشي معاك اما بشرط "
تبسم يحكي
خالد:" اشرط كيما تحب "
مسحت دمعتها وقحرتلي..رجعت غزرتلو تحكي
لارين:" نمشي معاك وحدي..صاحبك مايمشيش معانا "
عقدت بحواجبي مستغرب نحكي
انا :" شمعناها مانمشيش معاكم؟"
حلت عيناها فيا تحكي
لارين:" يعني تبعدني.. خير ما والله ياعيسى مانمشي من هناا ومعادش تلقاني جملااا "
عليت ف صوتي شوي نحكي
انا :" لارررين... "
قصت عليا ك وقفت تحكي
لارين :" ماتعيطش عليااا.. لي عندي قلتتوو.. مانيش بش نمشي معاك لحتى بلاصة..افهمم مانحبش لا نرااك ولا نسمعك "
نفخت بالقوي وقمت.. وقفت قدامها نحكي
انا :" باهي خليني نوصلك ونطمن عليك وتو نمشي معادش تراني "
رجعت قعدت وربعت يداها تحكي
لارين:" ورحمة نور ساقي لاتعفس مع ساقك "
عديت بيديا الزوز على وجهي حاولت نهدي روحي بش مانعليش فصوتي ونكمل نعقد الأمور اكثر من هكاا.. نعرفها متغششة وعندها لحق على هذاكا ماحبيتش نزيد نعمل حاجة اخرى تغششها اكثر من هاك..ريت خالد ك وقف قدامي يحكي
خالد :" عيسى برا انت..هي متغشة تو خلاها تهدى وتبرد شوي وبعد احكيو..كان انت بش تشد صحيح هي بش تشد صحيح اكثر منك "
غزرتلها وين شفتها رجعت عطاتني بظهرها.. رجعت غزرت لخالد نحكي
انا :" فاش تحكي خالد..كيفاه بش نخلاها هناا وحدها ؟"
خالد :" ماهيش وحدها.. هاني انا معاهاا.. شد هاذم مفاتح كرهبتي..برا اعمل دورةولا روح وانا تو نكلمك"
كبست عالبونية متاعي من لعصب لي حسيتو من صحة راسهاا غير انها بش تبقى هناا معاه وحدهم خلاتني نفور اكثر.. كيما حسيت روحي بلحق تخنقت من فكرة انها مش حاملة وجودي لهدرجة اما فرد وقت ماحبيتش نزيد علاها خاطر هكا بش تعند اكثر.. خذيت لمفاتح من عند خالد وقربتلها.. قلبي وجعني ك ريت دموعها على خدها.. طبست على ركايبي قدامها نحكي
انا :" يزي ماتبكي هاني بش نمشي..خليك مع خالد أهدى وروح.. وبعد تو نحكيو "
دورت وجهها علياا تحكي
لارين:" ماعنا مانحكيو.. لي عندي قلتو.. معادش نحب نشوفك "
غمضت عينيا بالقوي و رجعت حليتهم.. قمت من حذاها وغزرت لخالد نحكي
انا :" عينك علاها "
خليتهم ومشيت طول للكرهبة..مانجمتش نزيد نبقى اكثر..شوفتها كيفاه نافرتني خلاتني نلعن غشي لي خلاني نوصلها هكاا..كيما لقيت روحي مش منجم نتحمل غزرتهاا لي تلوم فياا بيهاا وكلامها كيفاه تبعد فياا..للاول مرة مانتغشش من طريقة كلامها معايا خاطر المرة هاذي حسيت عندها الحق.. ك خممت انا كيفاه حشمتها قدام الناس لقيت روحي غالط..طلعت وبقيت نغزرلها من بعيد.. لقيت روحي مانجمتش نتحرك ونبعد..حبيتها تبقى تحت عيني حتى كان من بعيد خاطر مانجم نأمن علاها مع حتى عبد.. حليت الشباك بجنبي وخذيت نفس حسيت روحي بلحق تخنقت وانا نشوف فيها كيفاه تحكي معاه وانا نغزر هكا من بعيد..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
