#رانية_تحكي
حطيت لمخدة وراء ظهري وبقيت نغزرلهم كيفاه يفدلكو ويحكيو قدامي.. عديت بعينيا عليها نغزرلها كيفاه متكية على ساق عمتي وصاحبتها بجنبهاا.. للحظة حسيت روحي غزلت منهم لكل كيفاه جاو ورماو رواحهم عليناا.. من لي كناا مرتاحين جات دخلت ف حياتنا قلبتهاا لكل وكانو مايكفيش هي زادة جابت معاها صاحبتها.. على قد ماحبيت المرة هاذي نسايسها كيما المرة لولى لقيت روحي مانجمتش خاطر المرة هاذي سايي عارفتها بش توطن عندنا.. من لي رجعت وانا حاسة روحي مخنوقة ساعات نحس فيها تبع فياا بعيناها كاني تعس عليااا من جرتهاا مش عارفة حتى ناخذ راحتي ف دارناا ونحكي كيما كنت.. كيما حسيت روحي خفت منهاا كان نهار تفيق بياا وتشكي لبابا ولا لعيسى لي نراهاا كيفاه قريبة منو.. حتى عمتي عرفت كيفاه تخليها ف صفهاا وتصير ديما معاهاا وين حسيت روحي غزلت اكثر منهاا خاصة كيفاه صارت تعمل ف مشاكل بين امي وبابا بتمثيل لي تعمل فيه عالطاولة غير قباحتهاا ف امي وطول لسانها.. اما كان بابا صدقهاا هو وعمتي انا مستحيل نصدقهاا خاطر كان جات بلحق تحب امهاا راهي قعدت وين عاشت معاهاا مش تجي هي وصاحبتها ويعيشو هناا.. اما مهماا كانت نيتها انا مستحيل نخلاهاا توصل للي تحب عليه.. غير خليني تو نفض مشكلتي مع حمزة بش مانخليهاش تشد اي حاجة ضدي ووقتها ساهل كان مانخليهاش تفد من الدار وتطير ترجع منين جات انا مش بنت سميحة.. فقت من سرحتي على صوت عمتي تحكي
غالية :" رنوشة شبيك ساكتة.. ماعجبتكش لخرافة ؟"
عديت بعينيا عليهم وتبسمت نحكي
انا :" لا عجبتني.. ياخي نسيت عمتي انت حكيتهالي قبل ك كنت انا صغيرة وحتى سموحة حكاتهالي زادة"
سميحة :" ياحسرة ك كانت رنوشة تبات بجنبي.. كنت كل ليلة نخرفلههاا "
قربت تكيت على صدرها نحكي
انا :" ربي يخليك لياا سموحتي يا احلى ام ف الدنياا "
تبسمت ك باستني من راسي تحكي
سميحة :" ويخليك لياا رنوشة قلبي "
انا :" شرايك كان الليلة تجي تبات حذاياا وخرفلي كيما قبل "
سميحة :" هذا لي بيك.. نجي نبات حذا بنتي مالا لا "
تبسمت وغزرت قدامي وين شفتها كيفاه عدات بعيناها علينا ودورت وجهها فيسع.. رسيت على سنيا بالقوي ك ريت عمتي مسحت على شعرها تحكي
غالية :" مالا انت خلي امك تخرفلك.. وانا خليني نخرف لبناتي الزوز "
ريتها ك قامت باست عمتي من خدها تحكي
لارين:" عيش عمتي.. ربي يخليك لينا "
قحرتلهاا وبعدت على امي وقت سمعت صوت تاليفوني.. قلبي ضرب بقوة ك ريت حمزة يطلب.. عديت بلساني على شفايفي وغزرت للامي نحكي
انا :" ماما هاذي رنيم صاحبتي.. خليني نقوم نحكي معاها شوي "
سميحة:" باهي رنوشة "
تبسمت وقمت نجري.. دخلت للبيت وسكرت الباب ورايا بالمفتاح.. خذيت نفس طويل ورديت عليه نحكي
انا :" وي حمزة ؟"
حمزة :" رنوشتي توحشتك "
تبسمت وقربت للفوتاي قعدت نحكي
انا :'" حتى انا توحشتك برشة "
حمزة :" وقتله بش نشوفك حبي ؟"
تنهدت بالشوي نحكي
انا :" مانعرفش والله.. العطلة قربت وتو رمضان مانجمش نخرج ف الليل "
حمزة :" تي قلهم ماشية حذا صاحبتك بعد شقان الفطر.. خليني نشوفك حتى دقيقة "
انا :" والله مانجم ياحمزة.. بابا وعيسى يهبطو لجامع ويحلو الورشة نخاف يراوني "
حمزة :" باهي مالا بعد خلينا نحكيو فيديو نحب نشوفك رنوشتي.. توحشتك حبي "
ضحكت نحكي
انا :" باهي بعد ك يرقدو لكل تو نكلمك "
حمزة :" باهي "
عضيت على شفايفي نحكي
انا :" حمزة مفما شي جديد ؟"
سمعتو كيف نفخ بالقوي يحكي
حمزة :" بلاهي ماتفكرنيش خاطر راني مكرز من ربي"
قمت من بلاصتي وحليت عينيا نحكي
انا :" علاش شصار زادة؟"
حمزة :" بكري قلت لعزيز يسلفني 3 ملايين..بش نكمل شوي قطايع ونحل الورشة.. قلي لا مانعطيكش "
عضيت على شفايفي نحكي
انا :" بلحق ؟ وانت ماعندك كان عزيز تطلب منو "
حمزة ؛" كان عندك غيرو قلي رنوشة.. لي نعرفهم لكل حالهم أعظم من حالي.. شكون بش يسلفني مبلغ ك هذا "
نفخت بالشوي نحكي
انا :" وانت لازمك 3 ملايين؟ حقك طلبت حتى مليون "
حمزة :" ياخي 3 ملايين تسمي فيهم فلوس.. سي عزيز يصرفهم ف قعدة و جاي تو يقلي ماعنديش.. نسى اني صاحبو "
عديت بيدي على وجهي ورجعت قعدت نحكي
انا :" حمزة امان ماتعملش مشكل مع عزيز.. يزينا عيسى تو.. معادش تجبدلو حكاية لفلوس جملا "
حمزة :" باهي حبي تهنى.. اما يكون ف علمك حكاية الورشة مازالت تبطى و الوضع بش يبقى هكاا مالا "
شديت دمعتي بالسيف نحكي
انا :" مفماش حل آخر؟"
حمزة :" والله انا عملت لي عليااا كان انت عندك حل الحقني بيه "
تنهدت بالشوي نحكي
انا :" خليني نخمم وتو نكلمك.. لازمناا نلقاو حل حمزة مانجمش نزيد نبقى هكاا.. كنت واحلة ف عيسى جاتني لارين متاع وذني "
حمزة ؛" مازالت وراك ؟"
رسيت على سنيا بالقوي نحكي
انا :" اييي.. مانيش عارفة كيفاه بش نتخلص منهاا.. نحس فيها ك الحبل على رقبتي "
حمزة :" طفيها.. تو يجي وقت وترتاحي منهاا حبي.. نوعدك "
تبسمت نحكي
انا :" باهي انا لازمني نعلق تو.. امي تو تستبطاني "
حمزة :" باهي حبي.. وبعد كلمني ك تتفاضى.. نحبك رنوشة "
ضحكت نحكي
انا :" حتى انا نحبك "
علقت عليه وعنقت التاليفون.. تكيت بظهري لتالي وبقيت نغزر قدامي نخمم ف حل بش نعاون بيه حمزة ونتحرر من لحكاية هاذي بش نرتاح.. لازمني نتصرف انا زادة خاطر مانجمش نتحمل عام آخر وانا ف الوضع هذا خاصة مع ظهور لارين لي نعرف بحكايتي..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
