#لارين_تحكي
حليت عينيا على صوت المرشي..نفخت بالشوي وهزيت لمخدة غطيت وجهي على اساس بش نرجع نرقد اما مانجمتش من صوت الراجل لقوي لي تحت راسي.. رميت لمخدة وغزرت لمايا لي مازالت راقدة مش حاسة بشي.. فركت عينيا وقمت من بلاصتي.. نزلت الريدو اكثر بش الضو مايقلقهاش وسكرت المروحة لي حطهالي جابر ف البيت ولي خليناها ليلة كاملة تخدم خاطر البيت سخونة برشة.. بقيت نمشي بخطوات خفيفة بش مانفيقش مايا من تو.. لبارح بقينا ساهرين نحكيو اكيد راي تعبت.. هزيت منشفتي وبيجاما أخرى وتروسي لي بش نستحقو وخرجت.. عديت بعينيا عالدار وين مقابلني حد.. قربت لتوالات دقيت الباب وحليتو ك مجاوبني حد..سكرت الباب وراياا وقربت لدوش نحيت حوايجي ودخلت تحت الماء عملت دوش خفيف وخرجت نشفت بدني ولبيت بيجامتي.. ريقلت أموري لكل وخرجت بعد مانظمت التوالات بعدي.. رجعت للبيت وين شفت مايا مازالت راقدة.. غزرة للوقت لقيتها 11:30.. حطيت لي ف يدي على جنب وخرجت.. تبسمت ك شفت عمتي داخلة وف يداها القفة.. قربت فيسع خذيتها من يداها نحكي
انا :" صباح الخير عمتي.. هات عليك "
عطاتهالي وتبسمت تحكي
غالية :" صباح النور رينو.. يقوي سعدك عيش بنتي"
دخلت حطيت القفة فوق الرخامة وعديت بعينيا عالكوجينة لي كانت فارغة.. تلفتت لعمتي كيف دخلت نحكي
انا :" ياخي الجماعة وينهم عمتي ؟"
قعدت عالكرسي وغزرتلي تحكي
غالية :" اعطيني كأس ماء ساعة خليني نرتاح "
هزيتلها براسي باهي وقربت سكبتلها كاسة ماء عطيتهالهاا.. خذاتها من يدي تحكي
غالية :" بوك مشى للورشة بش يصفي الخدمة ليوم يسلمها لعيسى بش يرتاح وسميحة مازالت ف المرشي تدور ف عقلها وانا تعبت.. خليتها وروحت "
ضحكت نحكي
انا :" خير ماعملت "
عدات بعيناها علياا تحكي
غالية :" ويني مايا ؟ مازالت راقدة؟"
انا :" اي خليتها راقدة.. مسكينة لبارح بقات فايقة من جرت الناموس "
غالية :" فكرني بعد تو نعطيك فليتكوس خليها عندكم ف البيت.. رشو منهاا "
حليت لفريجيدار جبدت لحليب نحكي
انا :" فطرت عمتي ولا نحضرلك قهوة معايا ؟"
قامت من بلاصتها تحكي
غالية :" لا عيش بنتي فطرت.. خليني نمشي نغسل يدي ونجي نركب لفطور.. قلي ماكش شاهية حاجة نطيبهالك؟"
قريت بستها من خدها نحكي
انا :" لا عمتي اي حاجة من يدك ناكلهاا "
تبسمت تحكي
غالية :" باهي رينو.. مالا تو نركب فم مقرونة أسهل حاجة بش نبداو ف القضية "
هزيتلها براسي باهي وقربت طفيت عالحليب.. سكبتو ف الكاس وخذيت طرف كيك وبقيت نفطر وحدي.. تلفتت لعمتي كيف رجعت حذايا..شمرت جبتها تحكي
غالية :"اي مدامنا وحدنا..احكيلي شعملتو فالسفرة؟ "
بلعت اللقمة وتبسمت بالسيف نحكي
انا :" شي ماو ف بالك عمتي كملنا المعرض وتعدينا كملنا خدمة جابر وكهو "
حطت الطنجرة وغزرتلي.. عدات بعيناها عليا وغزرتلي درا كيفاه تحكي
غالية :" يعني ماصار شي قلقك هكا ولاهكا ؟"
كبست على كاسة لحليب نحكي
انا :" لا..علاش ؟ "
غالية :" لا نسأل خاطر حسيتك متبدلة.. ماكش كالعادة لبارح "
دوب تبسمت نحكي
انا :" لا عمتي انا كالعادة اما لبارح كنت تاعبة شوي ومتقلقة من السفر كهو "
غالية :" باهي المهم انت لباس رينو وافطر وبرا ارتاح كان تحب "
انا :" لا لا بش نعاونك.. وشوي وتو مايا تفيق بش نحضرلها فطورهاا "
هزتلي براسها باهي ورجعت تحضر ف الطنجرة.. عضيت على شفايفي وبقيت نفطر ونخمم ف غزرة عمتي مش فاهمة زعمة سألتني وحدها ولا لآخر حالها حاجة.. نفخت بالشوي وقمت من بلاصتي غسلت كاسي نحكي
انا :" عمتي اعطيني حاجة نعملها "
ريتها كيف قربت للشباك وجبدت فلفل احمر.. حطتو ف يدي تحكي
غالية:" شد هذا فلفل شايح.. نحبك تغسلو وتنشفو وتقعد غادي توسع بالك عليه تنحيلو الزريعة لي فوسطو.. فهمتي رينو "
تبسمت نحكي
انا :" اي اي فهمت "
قربت وين السبالة بالوقت وبقيت نغسل فيه ونحكي مع عمتي اول ماكلمت خذيت منديلة وقعدت عالطاولة بقيت نمسح فيه بالكعبة بالكعبة نحكي
انا :" عمتي وبعد مانحي الزريعة شنوة نعملو ؟"
غالية :" بعد بش نعطيك تقصي الثوم بش نفوحو بيه.. تو نعلمك كيفاه تحضر لهريسة هاذي خير من متاع الشارع "
هزيتلها براسي باهي وحطيت المنديلة بعد مانشفت.. غزرت لعمتي تحكي
غالية:" المقرونة قاعد تتسمط.. انا طالعة فيسع نسكر شبابك الدار ونرجع عينك على مقرونة "
انا :" هههه ياعمتي ناويتني نوحل وحدي "
قربت باستني من راسي تحكي
غالية :" بنتي صبية نعمل علاهاا "
انا :" باهي تهني "
هزتلي براسها باهي وخرجت.. بقيت وحدي انحي ف الزريعة وندندن.. شوي وقمت بش نتفقد المقرونة اول ماقربت وهزيت لغطاء بعدت كيف الماء طشني على وجهي..هزيت يدي ومسحت عينيا الزوز لحظتهاا من غير مانشعر صحت بالقوي عالحريقة لي شعلت ف عينيا.. غمضت عينيا بالقوي وبقيت نمروح علاهاا نحكي
انا :" اااي عينياا..تعميت يااربي.. يااا عمتي ياا ماياا الفلفل عماااني.. اااي ياربي تشووويت احححح"
ضميت على شفايفي شديت دمعتي وبقيت نمروح ونمشي بالشوي بش نخرج للبيت نفيق ماياا.. اول ماحليت عينيا بش نشوف الثنية رجعت سكرتها فيسع من قوة ماتحرق فياا.. شاديت ف الحيط بش مانطيحش وبقيت نمشي دبة دبة.. شهقت بالقوي وقت دخلت ف الجهامة لي كانت قدامي.. قلبي ضرب بقوة اول ماحسيت بيديه شدتني وسندتني.. رغم اني كنت مغمضة عينيا اما عرفتو هو لي قدامي من ريحتو لي خلات دقات قلبي تتمرد علياا وتقوا..
VOUS LISEZ
#مُتمردة_العيسى ❤️🔥 (الستاتي الثاني)
Romance#مُتمردة_العيسى ❤️🔥 عندما نتعمق في عشق الروح تصبح كل لحظة فصلاً، وكل دقيقة قصة، وكل ساعة لحناً، وكل يوماً عالما... إنه ذلك العشق الذي لا يشبه عشقًا... ذلك الذي يجعلنا نستشعر العشق ونحن بعيدين هو ذلك الشعور الذي لا يشبه مشاعرًا هو عندما نتنشق عطرهم...
