كرونيك#الظل

#الظل_الحلقة[1]

[ ] يمشي هايم فالشارع المظلم البارد ماتسمع غير صفير الريح و نباح الكلاب و ضحك شباب الحي دايرين على بتية شاعلة بالنار صوتهم واصل لاخر الشارع لي هاز قارو زطلة و لي هاز سيجارة و لي هاز قرعة شراب كل واحد فيهم ينسى همو بطريقتو لكن كلهم متفقين على حاجة وحدة يخرجو من هاد البلاد الحرقة مبقاتش حلم فقط ولاتلهم أشبه بهلوسة يرقدو عليها و يفيقو عليها فات عليهم و هو مهبط كابيش المعطف رمى عليهم السلام و دخل لبيتو أو بالأحرى كوخو لانو يفتقر لأبسط الأشياء لتخلينا نسميوه كوخ الشباب كانو حايرين فهاد الشاب كان كتلة من الغموض غامض لدرجة واحد مايعرف شكلو كيفاه عامل ديما مهبط راسو ومغطيه حتى واحد ما يعرف أصله و لا فصله و حتى واحد مايجرأ يسأله رغم الفضول دافعهم باه يعرفوه لكن خوفهم منو كان مانعهم مينكروش أنو حدو حد روحو ميأذي حتى واحد فالحي و هاد الشي لمخليهم محترمينو معروف بإسم الظل ماتميز من شكلو غير طولو الفارع رغم جسمو الضعيف. دخل لدار و راح ديراكت لدوش حل العين لقاها مكانش تنفس بغضب أكيد البلدية قطعت عليه لما هز بيدون كبير شوية و راح للعين الكبيرة لجاية فآخر الشارع عمر الماء و رجع لدارو نحى قشو كامل و صب على روحو الماء البارد مافيه ما يسخن كي كمل لف روحو بمنشفة مسح المرايا لي مكسر نصها بيدو تنحى البخار وبان وجهو تبسم إبتاسمة طويلة مليانة استهزاء:ههههههه وش حاب تشوف حاب تكذب على روحك حاب تنسى بلي هادا هو وجهك متهربش من الواقع هذي حقيقتك لراح تبقى لاحقاتك طول حياتك و على هاذ الكلمة زاد شبع ضحك وشمن حياة راني نحكي حياة لمافيها لماضي لامستقبل لحياة لعياشها باه ناكل و نتنفس أنت و الكلب كيف كيف لا الكلب أحسن منك على الاقل الكلب ميحشمش بروحو معروف عند الكل بلي هو كلب أما أنت أنت مجرد ظل عايش على الهامش أنت نكرة صفر على اليسار راح تبقى عايش فالظل و تموت و أنت فالظل .
الحلقة الثانية: نمشيو بعيد على الحي نفوتو على بقية أحياء المدينة الموسخة لتعتبرهم الدولة وكر للمجرمين و مروجي المخدرات مش مكان يعيشو فيه بشر كيفهم كيف بقية الناس كل ما نوصلو لوسط المدينة كل ما الشوارع تبدا تنظاف و الطرقات تبدا تتعدل نفوتو وسط المدينة بشوي و ندخلو على عالم آخر عالم محرم على الكثير عالم حكر على لي عندو فوق المليار مش مليار دينار لا هذو الناس ميتعاملوش بيه يعرفو غير الأورو و الدولار ميعرفوش وش معنتها متلقاش وش تاكل ميعرفوش بلي كي تمرض لازم تخمم وين داوي ميخموش على مستقبل ولادهم لانو مستقبلهم مضمون يقراو غير في هارفد و السربون و يركبوا غير فالجاغوار و اللمبرغيني رانا وصلنا لدار بلمختاري ههههه اسمحولي غلطت هادي مش دار هادا قصر كي تشوف بابو برك تتزعزع فمابلاك لوكان تدخل لداخل نضربو طلة على ناسو و نشوفو كيفاه عايشين . فضيلة كبيرة الخدم واقفة عند روس الخدامات تعس فالكبيرة و الصغيرة ناضت تعيط على وحدة منهم سهيلة يعطيك لعمى قولي إن شاء الله شحال من خطرة نقولك كي تعود جاية لالة الصغيرة أجبدي طقم الفضة مش هادا يخي علابالاك يجيو العايلة كامل يحمدولها السلامة تحوسي لالة نصيرة تغسلني أخدمي خدمتك مسقم و لاطيري كاين آلاف يتمناو بلاصتك جاوبتها سهيلة بخضوع و استسلام حاضر اسمحيلي . فضيلة: بفف طيري برك من وجهي راحت كي السوسة تجري عند لالاها و قعدو الخدامات يريشو فيها نطقت وحدة فيهم قاعدة كيف الكلب تتملحس لسيادها نطقت لخرى تتملحس بالسيف حنونة مشفتيش الكادوات لي يجوها من الخارج لاه كي حالتنا .