كرونيك#الظل

#الظل_الحلقة 133

الحلقة 133:كان راكب فالسيارة يتكيف فالدخان قارو ورا خوه رغم الي مانعو عليه الطبيب لكن أعصابو تحرقت و ما يهديه غير هو مش قادر يتخيل أنو بعدما لقاها عايشة ترجع تفلت من يدو مرة أخرى يديه مربطة و مش عارف وين يلقاها سمع بورطابلو صونا هزو لقا نصيرة تعيطلو نفخ بغش ناقصو غير هي كان راح يكوبي عليها لكن خاف لتكون كاش مصيبة جديدة رجع هز عليها: وش كاين؟؟
-لازم تروح عند هشام و الا نسيت اتفاقنا.
-لا منسيتش و هاني رايح عندو غير متخافيش كوبا في وجها قبل متزيد تحكي مش حاملها و مش حامل يحكي معاها.
-بعد دقايق وصل لشركة بلمختاري للانشاءات نزل بكل هيبة و طلع ديراكت لمكتب ولد خوه.
-غير دخل و شافو هشام عينيه حمارو و عروق رقبتو برزو لكن تمالك روحو و تحكم في أعصابو تكلم باستهزاء: خير يا عمي جاي تكمل لي عملاتو بنتك و لا جاي باش تشوف نتيجة أفعالكم فولد خوك ولد خوك لي طعنتو و مرحمتوش.
-لهادي وجهو حمار و الدم طلعلو تكلم بحزن مزيف: أنا عارف يا ولدي بلي غلطت و غلطتي كبيرة لكن صدقني والله ما كنت نعرف بلي راح نوصلو لهاذ المواصل و لا أنك تدخل للحبس بسبة هاذ الشي.
-حتى و لو هاذ مش مبرر لفعلتك.
-عارف مش مبرر لكن حط روحك مكاني الطفلة جاتني تبكي و تشكي و تقولي ولد خوك كل يوم يهين فيا و يجرح في كرامتي يعاملني على أساس عدوة ليه مش مرتو وش راح تكون ردة فعلك.
-مهما كان ميوصلش دير لي درتو و إذا على بنتك فأنت لي حطيتها فهاذ الموقف مش مرة و مش زوج قتلك بنتك متلزمنيش لكن أنت أصريت و هاذي نتيجة إصرارك.
-عارف يا هشام عارف بكلشي قلتو لكن نقولها و نزيد نكررها و الله مقصدت نأذيك لما جاتني هند تبكي قاتلي نعطوه قرصة خفيفة برك أنا حسبت حابة تخسرك في صفقة و لا زوج لكن مش لدرجة تدخلك للسجن و تسبب في تشويه سمعتك لو عرفت بلي راح ديرو كنت أنا الاول لي نوقف في وجها.
-ندمك يا عمي ما رحش يعوضني لا في اسمي لي تشوه و لا فالمليارات لي خسرتها.
- و أنا على هاذ الشي جيتك حبيت نعاونك و نفتحو صفحة جديدة وش قلت؟
-بقا يشوف فيه و ساكت تفكر كلام يونس ليه و الله وطلع كلامو صح مالا حبيت تلعب يا عمي خلي نشوفو لعبك وين يوصلك.
-سامحني يا عمي بصح بعد لي جرا الثقة لي بيني و بينكم تقطعت و كنت راح نكلمك باش نقطعو علاقة الشراكة لي بينا و كل واحد يروح فحال سبيله.
-لا يا ولدي أنعل بليس و متحبسش كلشي بنيناه من وقت المرحوم باباك الشيطان حضر بيناتنا حنا ننعلوه و نخزيوه و منخليوهش يزيد يفرقنا أكثر أنا جاي نعرض عليك هاذ العرض باه نصفيو لقلوب و ننساو كلشي فات و نبداو من أول وجديد ها وش قلت.
-و الله يا عمي منعرف وش نقولك لكن على وجهك راح نحاول ننسى لي فات و نبداو صفحة جديدة أنا موافق على عرضك.
-لهادي أخيرا رجع الدم يمشي في عروقو كان حاكم قلبو خايفو يرفض و ساعتها كلشي يطيحلو فالماء قرب منو بسرعة و ضمو بود مصنطع بادلو هشام العناق و ضحك في داخلو ضحكة خبث أنو لي حب عليه وصلو.