كرونيك#الظل

#الظل_الحلقة 87

الحلقة 87:وصلت عند هند لي كانت رايحة جاية فالكولوار و الغش يهز فيها و يحط أكره حاجة عندها أنهم يحطوها قدام الأمر الواقع يفرضو رايهم و يلغيو شخصيتها شافت فامها جاية ناحيتها تقدمت منها:كنتي مخططة لهاذ الشيء قولي كنتي حابة تزوجيني بهشام بعدما نتخلصو من مريم و أنا ساعدتك في خطتك قولي أحكي
-حكمتها نصيرة من ذراعها و جرتها وراها مش هنا الهدرة و الناس تشوف خلي حتى نوصلو للدار.
- غير وصلو للقصر توجهت نصيرة ناحية غرفتها و هند تابعتها أول مادخلو:تكلمت هند ممكن تفهميني.
-شافت فيها نصيرة ممكن أنتي لي تفهميني مش هاذا لي قلتي نحبو و نعشق فيه و لما سمعتي بيه خطب مريم جن جنونك و ما هنالك بال حتى فرقتيهم و فسدتي العرس متقوليليش خاطش نكرهو و حابة ننتقم أكذبي هاذ الكذبة على روحك و على وحد أخرى مش عليا أنا
-ايه خاطر نكرهو و كره سيرتو و كل حاجة تتعلق بيه و مستحيل نقبل بهاذ الزواج.
-آآآه يا هند تعرفي وش هي مشكلتك مشكلتك أنك مغرورة و عندك كبريائك فوق كل شيء أنا و أنتي نعرفو أنو لي غاضك انك راح تباني كعروس بديلة قبل بسمانة كان راجلها خاطب أخرى و فرحان بيها خدمي عقلك مليح مش انتي حابة تنتقمي منو خلاص انتقمي لكن وانتي مرتو و وهو ملكك هكذا راح تكبليه أكثر و تراقبي كل خطواتو.
-لكن...قاطعتها نصيرة لكن واش أنتي تتخيلي أنو هشام راح يحزن على مريم طول حياتو أكيد يجي نهار و يعاود يتزوج ساعتها وش راح ديري راح تبقاي في كل مرة تفسديلو الزواج تذكري أنو مش كل مرة تسلم الجرة. هيا هدي روحك و افرحي هشام أخيرا ولا ملكك و تقدري ديري فيه وش حبيتي و أنا راني معاك.
-كانت مقتنعة بكلام أمها لكنها محبتش تبين و عملت روحها موافقة فوق من قلبها خلاص موافقة ديرو الشي لي حبيتو
-تقدمت منها و باستها على راسها هذي هي بنتي لي نحبها مبروك عليك.
-حل الليل و جا الظلام كانت قاعدة فوق السرير لامة رجليها عندها و دموعها مزالو على خدها قاعدة تستنى فيه وكتا يجي طول بزاف و هي خافت وحدها خصوصا أنو مكان أول مرة تبقى فيه و زيد الجوع عمل فيها عمايلو من البارح ماذاقتش اللقمة كرشها تزيرت عليها و حست بالفشلة لوكان تزيد شوية دوخ أول ما سمعت حس المفتاح و قفت بسرعة و راحت تجري غير تحل دخل و بقى يشوف فيها باستغراب
-شايفك مستنيتني عند الباب متقوليش برك توحشتيني
-لا لكن خفت وحدي.
-امم خفتي وحدك ووش حابتني نديرلك نهزك بيديا و نحطك في حضني و نرقدك ختى يتنحالك الخوف قالها باستهزاء شي في داخلو متمنيه أنو يعملها لكن مستحيل يرضخ و يستسلم لمشاعرو.
-من اليوم تعودي على الخوف أنا مش قاعدلك حتى نبقى مقابلك ليل و نهار غير كمل كلامو سمع صوت صادر من كرشها جاتو الضحكة لكن حبسها أكيد راهي جيعانة شد من روحو و قالها بصوت قاسي هاكي حطيلنا نتعشاو .
-أول ما سمعت كلمة نتعشاو مسكت لكيس عليه و راحت طايرة للمطبخ مخلياتو يتبع فيها بعينيه و هو يضحك و الله عندو الحق لي قال الجوع كافر.
-خرجت الأكل من الكيس و كان عبارة عن جاج مشوي مع روز و سلاطة حطتهم فوق طاولة صغيرة فالمطبخ و راحت تناديلو أول ما جا قعد جات باش تقعد حتى هي عيط عليها بكل قوتو شكون قالك اقعدي معايا اتقعدي من هنا هزلها صحنها و حطهولها في الأرض هنا تاكلي هاذا هو مكانك عمرك تاقبليني و أنا ناكل قعدت على الارض و هي حاسة روحها راح دوخ لازم تاكل حتى شوية باش تشد روحها.