كرونيك#الظل

#الظل_الحلقة 127

الحلقة 127:شاف فيها بندم أول مرة يهز يدو عليها أول مرة يكون سبب في دموعها سهيلة مش مجرد صديقة لا هي أختو لي مولدتهالوش أمو هي رفيقة دربو و ونيستو فالحياة معزتها هي مروان معزة خاصة صحيح ميبينش مشاعرو ليهم لكن لو تتقاس شعرة منهم يحرق الاخضر و اليابس قرب منها طابس عندها باسلها راسها و جبدها لحظنو : حقك عليا يا سهسوهة علابالي محقيش ندير هكذا بصح يخي تعرفيني كي نتقلق نعود منشوفش قدامي....بقات تبكي و تشهق في حظنو علاه هكذا يا يونس علاه قولي وش درت فاش غلطت.
-اشش مدرتي والو يا سهيلة مدرتي والو لكن الشي لي شفتو هاذا وين صدمني و خلاني بلا عقل.
-شكون هاذ لمراة يا يونس وين تعرفها فهمني؟
-مش ذوك منقدرش نحكيلك حتى نتاكد أنا راح نروح يمكن نبات برا ابقاي هنا متروحيش مسحت دموعها بكفوف يدها و قاتلو معليش.
-هز الفاست نتاعو و جا خارج و مبعد دار ليها: روحي سكتي مريم علابالي بيها راها تبكي.
-ضحكتلو في وسط دموعها: شوف شوف الراجل كيفاه خايف على حبيبة القلب.
-خرج من الدار ركب موطوه عفس على الفيتاس و ديمارا ماشي راح يهبل مش عارف وش يدير كيفاش يتصرف مش فاهم كيفاه مزالت عايشة يخي قالولو ماتت زعما يكونو كذبو عليه و هي وين كانت طول هاذ السنين علاه محوستش عليا علاه راحت عند نصيرة وش هو السر لي بينهم .
-وصل للمكتب نتاعو عيط لواحد من مساعديه: نحبك فالحين جيبلي معلومات على وفاء***.
-بعد ربع ساعة دخل عليه : سيدي المرأة لي قلتلنا عليها متوفية من أكثر من 18 سنة توفات و هي على طاولة الولادة هي و بنتها في مستشفى ***.
-خبط كلشي موجود قدامو الله ينعلكم هز الفاست نتاعو و خرج يزرب في خطواتو ركب موطوه و توجه نحو المستشفى أكيد غيرت اسمها مستحيل تعيش بالاسم لقديم .
-وصل للسبيطار طلع ديراكت لمكتب المدير دخل عندو بلاما يدق لقاه يلم في أوراقو و خارج غير شافتو بدا يعيط عليه: آيي وين راك حاسب روحك داخل بلاما تستأذن.
-ندخل وين ما نحب و بلاما نشاور.
-المدير غير شافو كيفاش يحكي خاف لا يكون كلوشار و لا مجرم: علاش تحوس.
-وفاء*** كيفاه حتى ماتت.
-بلعقل عليا شكون هاذي وفاء و وين راح نعرفها المستشفى هاذي كبيرة و كل يوم يموتو فيها كيفاه راح نتذكر.
-تتذكر و الا يذكرك هاذا جبد السلاح من ورا السروال و حطو على راسو يلاه أنطق.
-الراجل غير شاف السلاح الدم نشف في عروقو: قولي وقتاه ماتت هاذ المراة؟
-من 18 سنة .
-سامحني بصح أنا عندي سبع سنين من لي حكمت هاذ السبيطار تقدر تهبط للأرشيف ممكن تلقا الملف نتاعها.
-شكون هو المدير لقديم؟؟؟؟؟؟
-سي عمار مهداوي بصح...مخلاهش يكمل يهدر أهبط معايا للارشيف و اجبدلي الملف نتاعها .
-هبط معاه و الخلعة حاكماتو البولة قريب يطلقها أول مرة في حياتو يتعرض لهاذ الموقف وصلو للأرشيف و بقاو ليل كامل و هوما يبحثو على ملفها لكن والو تقول بلعاتو الأرض.
-يونس بعدما لقى ملفها مفقود عرف بلي لحكاية كبيرة و كبيرة بزاف و أختفاءها طول هاذ السنين وراه سر.
خرج من المستشفى و الوجهة هاذ المرة دار عمار مهداوي مكانش مهتم لا بالوقت و لا بأي حاجة لازم يعرف وينها و الا يجن غير و صل عند باب الفيلا حط يدو على الصونات و محبش يحبس بعد دقايق فتحت عليه مراة كبيرة فالسن كانت مخلوعة من هاذ الغريب لي دق عليهم في ساعة متأخرة من الليل شاف فيها و بلا مقدمات تكلم عمار مهداوي هنا شافت فيه بخوف إيه بصح شكون أنت دفعها بيدو و دخل لداخل مخليها تصرخ بأعلى صوتها بقى يفتح فالبيبان كيف المجنون حتى وصل لآخر بيت غير دخل شاف راجل كبير فالسن فاتح عينيه و يخزر للسقف بلا تردد سألو: ويني وفاء**** وش عملتو فيها أنطق ؟؟؟؟
- جات المراة من وراه تلهث: مراحش يجاوبك
-كيفاه؟؟
-عندو عامين من لي جاتو جلطة شلت كل أطرافو و فقداتو النطق.