كرونيك#الظل

#الظل_الحلقة 137

الحلقة 137:يوم جديد حامل في طياتو أحداث جديدة .
-كانت الساعة ثناش نتاع الليل و هو مزال مرجعش بقات فالصالة رايحة جاية تستنى فيه هي عارفاتو راهو يحوس عليها طول هاذ الأشهر لكن كانت ساكتة و عاملة روحها مش فايقة لكن الايام الاخرة زودها بزاف صار ديما غايب على الدار حتى فالليل و ميرجعش زواجهم صار مهدد كثر من أي وقت و كلو بسبة الزفتة نتاع وفاء.
-دخل للفيلا و هو مهدود و تعبان خلاص يأس و فقد الأمل أنو يلقاها حس روحو راح يجن لدرجة يضل يسوق و هايم فالشوارع على أمل يلمحها أو يلقاها جا راح يطلع لغرفتو لكن وقفو صوت نصيرة دارلها براسو و تكلم و هو كاره من روحو و منها: الغدوة يا نصيرة اذا عندك هدرة أجليها للغدوة راسي يوجع فيا و منيش قادر نحكي.
-صار ماكش قادر تحكي بصح التحواس على لالة وفاء قادر عليه بالاك تقول نصيرة نية و راها راقدة على وذنيها و مش فايقتلي لا يا حبيبي نصيرة حاجة ما تخفى عليها كنت ساكتة و ضاربة النح خاطر عندي مشاكل أكبر منك و من ست الحسن لكن الظاهر أنت محبتش تفهم روحك و تقادر هاذ المراة لي متزوج بيها و قاعد تخون فيها.
-هبط ليها و هو كاره منها و من كلامها المريض وين شفتيني نخون فيك أحكي وين.
-إيه تخون فيا و لا تخمامك فمراة أخرى واش يتسمى مش خيانة أحكي نشوف فيك ساكت.
-ههههه و الله يا نصيرة تحكي كي شغل رانا زوج متزوجين و نعشقو في بعضانا نغير عليك و تغيري عليا بالاك صدقتي الكذبة زواجنا خلاص يوم رحتي و عملتي علاقة مع مصطفى و الا نفكرك نفكرك أنو منذاك ليوم ملمستكش و لا قربت ليك.
-تحكي فيها على أساس خنتك و غدرتك يخي كلش كان بموافقتك و رضاك و الا نسيت أنو لولا هاذ الشي لي عملتو عمرك ما كنت راح تصير لهادي بلمختاري رجل الاعمال لكبير و لمعروف كنت تلقى نكرة حثالة واحد ما يسمع بيك و لا يعرفك.
-برافو يسمى راكي تمني عليا دوكا و لا كيفاه.
-إيه نمن عليك و نعاود أنا و أنت نعرفو مليح بلي نصيرة هي لي صنعاتك و هي لي رجعاتك راجل و دير في بالك مليح كيما طلعتك قادرة فنهار نهبطك مالا حط عقلك في راسك و بعد من طريق ذيك لم..ما جات تكمل كلامها حتى تسمع صوت زجاج طاح و تكسر في الأرض دارو لزوج مخلوعين لقاوها ميساء كانت تشوف فيهم و تبكي مش مصدقة الشي لي سمعاتو .
لهادي و نصيرة جمدو و معرفوش وش يقولو آخر حاجة توقعوها أنو يجي نهار وواحد فيهم يعرف سر من أسرارهم المشكل أنها سمعتهم بوذنيها و معندهم كيفاه يكذبوها.
-تكلمت بكل حقد و دموعها يسيلو ويدان: أنتو مستحيل تكونو بشر كيفاه عطاكم قلبكم ديرو هاذ الشي كيفاه وأنت يا عمي يلي خسارة فيك كلمة عم علاجال وسخ الدنيا تفرط فشرفك و تخلي غيرك يدنسو و يني صلاتك و حجك و زكاتك و ينهم ولا هاذو الكل كانو ماسك يخفيو وجهك الحقيقي.