كرونيك#الظل

#الظل_الحلقة 112

الحلقة 112:بقات ليل كامل و هي في غرفتها تبكي بوجع بالم بحسرة علابالها بلي بفعلتها خلاص خسراتو خسرت حب حياتها للأبد حطمت كلشي بيديها و حكمت على قلبها بالإعدام مسحت دموعها المخلطة مع الكحل بكف يديها و قامت للدوش غسلت و جها مرات و مرات حابة تصحى من هاذ الكابوس لكن في كل مرة يلامس الماء وجها تتأكد ان هاذ الكابوس ماهو إلا واقع و هي لي تسببت في هاذ الواقع خرجت للغرفة هزت مفتاحها و هبطت تجري لازم تقابلو لازم تطلب منو السماح لازم يغفرلها و الا مش راح تقدر تعيش بهاذ الذنب .
-كان قاعد فالحبس الإنفرادي حاط يديه على راسو و يخمم فالمصيبة لي طاحت عليه حتى سمع صوت طالون ماشي و يقرب عندو غير هز راسو شافها الشيطانة الصغيرة وريثة أمها فالخبث و النفاق تبسم باستهزاء:هه خير ماجابك ولا جيتي تشوفي حالتي كيفاه راهي جيتي تتشفاي فيا و ترضي غرورك بلي قدرتي تحطميني و تذليني.
-بقات تسمع ليه و كلامو كيف لخناجر يطعنو فيها و كل طعنة تكون أقوى من الثانية دموعها طاحو و الحروف هربو منها بعد الشي لي قالو :أن..أنا مجيتش نشفى صدقني أنا...أنا...ندمانة و الله مكان قصدي تدخل للحبس....قاطعها و النار تخرج من عينيه كذااابة مالا وش قصدك كي مندخلش للحبس هه و الا حابتهم يعدموني طول بصح نهنيك و الله و ظهرتي مش ساهلة و أنا لي خذيت كامل احتياطاتي منك لكن قدرتي تلعبيها صح برافو نصفقلك يا بنت نصيرة.
-و الله ندمانة يا هشام قولي وش ندير باه تصدقني و الله مكان قصدي كنت حابة نعطيك درس خفيف على إهانتك ليا لكن مخبرتش الشرطة و الله ما أنا لي خبرتهم انهارت بالبكى و جلست على ركايبها وسط نظرات هشام الحاقدة لي حتى لو تقتل روحها قدامو عمرو ما راح يصدقها.
-هه قاتلك وش ندير باه تصدقني تعرفي وش ديري باه نصدقك.
-طلعت راسها تشوف فيه بأمل لكن قتلها أول ما تكلم:لي ديريه أنك طيري من قدامي و متزيديش توريني وجهك و الا أقسم برب الكعبة غير نقتلك و ساعتها يولي دخولي للحبس عندو مبرر طييييررررييي علا صوتو حتى صارت ترجف وقفت و خرجت تجري منهارة محطمة مدمرة تستاهل هي لي جناتو على روحها.
-رجع لبلاصتو تكى على الحيط و بقى يخمم هو من الاول معصب و شوفتها خلاتو يعصب أكثر و أكثر .
-كان يمشي بخطوات ثابتة و موزونة خطوات دل على هيبة و قوة شخصية وصل عندو لقاه متكي على الحيط و غارق فهمومو فتح الباب و دخل عندو.
-هشام غير هز راسو و شافو استغرب من هاذ الشخص شكون هو ووش قاعد يدير هنا:شكون أنت.
-جلس بجنبو و قالو :متخافش جيت باش نعاونك و نخرجك من محنتك .
-شكون انت و وين تعرفني حتى تعاوني
- معاك يونس رائد فالجيش علابالي راك تتسائل علاش و كيفاش لكن قضيتك أكبر مما تتصور قضيتك متعلقة بأمن الدولة
-كيفاه كيفاه مفهمتش فهمني.
-راح نفهمك كلشي لكن تسمعني و متقاطعنيش لان الشي لي نقولو ممكن يصدمك.
-مع الاسف يا سيد هشام شركتك كانت مخترقة من طرف عصابة منظمة يترأسها عمك كانت هي الواجهة لاعمالو المشبوهة هو و عدة شخصيات فالدولة و خارج الدولة شركتك لانها معروفة بنزاهتها و سمعتها الحسنة استعملها لهادي كغطاء لتبييض أموالو بمساعدة عملاء يخدمو عندك كنا طيلة هاذ الفترة مراقبين أعمالهم من خلال الشركة نتاعك و بعدما عرفنا خطة هند ضدك حاولنا نستغلوها لصالحنا و ألقينا القبض عليك حتى يتشوش عليهم الأمر و نشوفو مخططاتهم بعد ما تصير شركتك تحت أعين الشرطة و المخابرات و ميقدروش يزيدو يستغلوها أكثر.