كرونيك#الظل

#الظل_الحلقة 146

الحلقة146:-ههه أكيد قاعدة نحلم يونس مات و شبع موت أنطق شكون أنت ؟؟؟؟
- يا خسارة يا عمتي نسيتي يونس ولد خوك ولد محسن و زهرة و لا الزمان و الغربة نساوك في أهلك.
- لا يا ربي أنا مش مصدقة قالولي مات مات محروق مع والديه حست براسها ثقيل عليها عينيها بداو يتغمضو هزت يدها باش تتسند بيها مع الباب لكن اوووب وجي طايحة مغمي عليها.
-تقدم منها بزربة هزها في حضنو و دخلها لداخل حطها فوق الكانابي المحطوط ثم و راح يجري للكوزينة يجيب فالخل.....بدا يحطو على نيفها و فكل مرة يخبطها بكفوف خفاف حتى بدات بشوي بشوي تحل في عينيها ..غير فاقت على وضعها ناضت مخلوعة: يونس هاذا أنت يا يونس ولا قاعدة نحلم فهمني راني راح نهبل.
- إيه يا عمتي هاذا أنا يونس ولد خوك محسن بشحمو ولحمو .
-هزت يدها المرجوفة و مررتها على وجهو و دموعها يسيلو وديان تكلمت بصوت غالبو البكا: قالولي مت يا يونس كذبو عليا و قالولي حتى أنت معاهم في ذيك الليلة .
-هز يديها قربهم لفمو باسها بوسة مرصوصة تعبر على وحشو ليها: ممتش يا لغالية يونس مزال عايش و حتى واحد ما يعرف بهاذ الشي الكل يحسبني مت....أحكيلي أنتي وين كنتي علاه غبتي فهميني وش وقعلك كيفاه حتى ذاك الكلب عمل فينا هكذا أحكيلي يا عمتي راني كل ما نتفكر مخي يطير من مكانو نجن و نعود كيف المهبول.
-متسقسينيش يا يونس و الله كل ما نتفكر الماضي نحس بحاجة تخنق فيا نحس الهواء ضاع من صدري و سكاكن تقطع في قلبي...الشي لي عداتو عمتك مش قليل عمتك ظلموها يا يونس عمتك لي كانت الضحكة متفارقهاش بكاوها في بلاصة الدموع دم.
-قوليلي شكون هوما قوليلي برك و أنا و الله نجيبهم عند رجلك و نقتلهم قدام عينك شكون هوما يا عمتي؟؟؟
-منقدرش يا يونس أنت ماكش قدهم؟
-وقف من مكانو و بدا بعيط على طول صوتو: شكون قالك مش قدهم يونس الطفل الضعيف كبر وصار راجل يهابو لكبير قبل الصغير أنت قوليلي برك عليهم إذا على الكلب محمد فمتخافيش نستنا فالوقت المناسب و حسابو عندي.
-خلاص يا يونس أنسى الانتقام و عيش حياتك خليهم هوما حسابهم عند ربي.
-كيفاه ننسى و أنا كل ما نجي نرقد صورتهم و هوما يتحرقو متفارقش عيني كيفاه ننسى و صوت صرختهم مزال يدوي لحد اليوم في وذني كيفاه ننسى و أنا  ما نقدرش نشوف فالمرايا منقدرش نمشي و أنا رافع راسي بين الناس الحرقة لي في وجهي ممكن ننساها لكن حرقة قلبي منقدرش راح تبقى قادية حتى ناخذ بثاري.
-كلماتو خلاو قلبها ينزف أكثر و أكثر شوية القوة لي كانت عندها تلاشات و ضاعت مع حديثو مقدرتش تصبر أكثر و أنهارت تبكي: سامحني يا ولدي كلو بسبتي كلو أنا سباب هاذ الشي يا ريتني متت قبل ذاك النهار إذا كان لازم تاخذ بثارك خوذو مني أنا الأولى.
-كان يسمع ليها و قلبو يتقطع ألف قطعة معرف يواسي روحو و لا يواسيها: شكونو يا عمتي؟؟
-طلعت راسها ليه مش فاهمة وش يقصد:كيفاه؟
-شكون لي خنتيه معاه؟؟؟
-كلمتو طعنتها في الصميم يعني حتى هو مصدق هاذ الشي: حتى أنت يا يونس مصدق هاذ لكلام مصدق بلي عمتك تخون و تغضب ربي عليها أنت أكثر واحد تعرف تربيتي و تعرف أني مستحيل ندير هاذ الشي.
-مالا علاه عمل هاذ الشي علاه؟؟اتهمك بذنب معملتيهش و دفعنا ثمن حاجة حنا منعندنا فيها حتى يد.
-مش كل لي تشوفو العين قادر يكون صحيح هو حكم و قرر و نفذ أمرو بالاعدام بلاما يبحث على الحقيقة.
-أنا مبقيت فاهم والو فهميني و خليني نعرف وش كاين متخلينيش عايش في دوامة مش عارف نخرج منها.
-مش ليوم يا يونس و الله نهار نكون قادرة راح نحكيلك كل شي أنا دوك عندي رجاء واحد عاوني فيه و ساعتها نوعدك نخبرك بكل لي تحب عليه.
- وش هو؟؟؟
-بنتي يا يونس ألقالي بنتي حابة نشوفها و نضمها لصدري نطلب منها السماح و نسمع منها كلمة ماما.
-عمل روحو مصدوم ومش فاهم حاجة: كيفاه يعني انتي عندك طفلة!!!!
-إيه و متسقسيش علاه خليتها اني وعدتك يوم تلقاها راح نحكيلك كلش.