كرونيك#الظل

#الظل_الحلقة 116

الحلقة 116:بقا ليل كامل و هو فايق قتلو التخمام كلشي تخلط عليه و كلشي جاه على غفلة معرفش واش يدير و لا كيفاش يتصرف خصوصا بعد الشي لي قالو يونس زاد دخلو في حيط فطن من تخمامو على الباب يتفتح دخل ليه الشرطي و بلغو بقرار النائب العام بإخلاء سبيلو أوووف أخيرا هم و إنزاح من الان راح يبدى فانتقامو من كل واحد أذاه و أذى عيلتو أول ما خرج لقى فيروز تستنى فيه غير ما شافتو راحت ليه تجري تبكي و تضحك تحضن و تشم من لي دخل و هي مهمومة حرمت على روحها الماكلة و الشراب هشام مكانش من العاكسين غير شافها حل ذرعيه ليها ضم بكل قوتو بقا يبوس فيها من كل مكان يشم في ريحتها و يستمد في طاقتو منها بعد ما خذا جرعة من الراحة فاحضان الوالدة باسها على راسها و استأذن منها يروح للشركة رغم رفضها لكن إصرارو كان أقوى.
-بعد نص ساعة وصل للشركة لقى الموظفين كامل يخزرو فيه و يوشوشو بيناتهم أول ما دخل للبيرو عيط على السكريتيرة جيبلو قهوة و جي غير دخلت لاحظ توترها و رجفة يدها و هي تحط فالقهوة حس أنو وراها كارثة .
-غير الخير سميرة وش بيه وجهك أصفر.
-سامحني مسيو هشام علابالي موش وقتها لكن مصيبة و طاحت على راس الشركة.
-كيفاه ؟؟؟؟ فهميني وشمن مصيبة ثاني علاه أنا ناقص مصابي.
-راحت تجري فتحت التليفزيون و هنا كانتلو الصدمة عنوان مكتوب بالبند العريض"رجل الأعمال الشاب هشام بلمختاري ما هو إلا محتال". زادت قلبت قناة اخرى كاتبة في اخبارها "هكذا بنى هشام بلمختاري امبراطوريته بالنصب و الاحتيال " بقات تقلب فالقنوات و كل قناة مخرجة عليه إشاعة زي حس روحو في كابوس مش مصدق الشي لي جرالو هز كل الملفات لي على سطح المكتب و بدا يرمي فيهم و يكسر في كلشي يجي قدامو تحت أنظار السكريتيرة لي قريب تعملها على روحها من الخلعة شكلو كان يخوف كان كيف الإعصار لي يحصد كلشي يجي فطريقو ما هداش غير لما سمع صوت الهاتف لكن المكالمة ماكانت غير إعلان من احد الشركات على وقف التعامل مع شركتو و بعدها توالات الاتصالات و كلهم يقولو نفس الشيء. هشام مقدرش يتحمل و نقطة الصبر لي كانت عندو فاضت هز الهاتف للاعلى و خبطو حتى كل طرف طار في جيهة و بدا يصرخ بكل قوتو السكريتيرة غير شافت شكلو خرجت تجري خايفة لا تدي نصيبها من التكسار أول ماوصلت للباب تصدمت مع هند المفجوعة لي غير سمعت صوت هشام و صريخو خافت عليه و مقدرتش تصبر بلا ما تطمن عليه غير شافت منظرو الدم نشف في عروقها على قد ما كانت حابة تذلو و تشوفو فهاذ الحالة على قد ما وجعها قلبها و بكا بلاصة الدموع دم من شكلو قربت ليه بخطوات ثقال مش مهتمة إذا راح يضربها و لا يسبها و لا يهينها المهم توقف معاه المهم تكون قريبة منو و تتقاسم معاه و جيعتو و حزنو وصلت عندو كان متكي ينسف فالدخان الجسد هنا و الروح عالم بيها ربي قعدت بجنبو و حطت يدها المرجوفة على يدو.
-كان حاس بيها و بوجودها و زاد حس أكثر وقت ضمت بيدها يدو على قد ما كان كارها و متقزز من قربها عايفها و مش طايق وجودها لكن حاس كل شيء فيه مات كلشي فيه مربوط و مش قادر يتحرك و لا يبعدها الشي لي سمعو ليوم صدمو و شل أحاسيسو.
-كانت تشوف فيه كيفاه ساكن و يشوف للفراغ حساتو غير طبيعي و خصوصا أنو متفاعلش معاها مدزهاش مضربهاش و لا سبها طموعها طاحو اكثر الندم يقطع فيها مش قادرة تتخيل أنها هي بيديها وصلاتو لهاذ المرحلة تكلمت بصوت مرجوف باكي:هشام أحكي الله يسترك متسكتس و تخوفني عليك أحكي و قول أي كلمة عيط عليا سبني أضربني المهم دير حاجة متحيرنيش عليك أحكي يا هشام احكي و ريحيني عارفة روحي غالطة و غالطة بزاف و لوكان نبقى طول حياتي نطلب فالسماح منك مش راح نقدر شوف فيا و قولي قولي وش ندير حتى تغفرلي و الله ندير أي حاجة المهم تسامحني و الله لو تقولي أقتلي روحك نقتلها.
-هههه بعد واش يا هند بعد واش دوك حتى موتك مش راح تفيدني روحي بعدي عليا و اخطيني منيش طايق روحي و لا طايقك روحي يا بنت الناس لا نستجرم فيك و نعشي قاتل روح.