كرونيك#الظل

#الظل_الحلقة 108

الحلقة 108:كان جالس في مكتبو غارق في الملفات لي قدامو حتى يشوف في سهيلة هاجمة عليه كيف الإعصار و وراها مروان يتبع.
-لا أنت زودتها بزاف شحال عندنا و أحنا نحاولو فيك تدينا لدارك و أنت مخشن راسك .
-حط الستيلو من يدو ربع يديه و بقا يشوف فيها:و علاه حابة تروحي لداري يا لالة كشما مودرة فيها.
-مش حبا فيك رايحة نشوف المخلوقة لي راميها في دارك و مش مخليها تتنفس.
- نظن هي مرتي مش مرتك حتى تتحيري عليها.
-شوف شوف الطفل كيفاه يحكي اسمع مريم قبل ما تكون مرتك راهي صاحبتك خليني نزور الطفلةالطفلة و نطمن عليها و إلا و الله غير نعملك فضيحة و نخبر الكل بلي تزوجت و نعرضهم باسمك و نشوفو ساعتها وش دير.
-نفخ بضيق من هاذ المخلوق الاستفزازي شاف فمروان و قالو: على وجه ربي أدي هاذ الطفلة عليا.
-ههه و الله هاذ الطفلة كيما راك تقول ما يقدر عليها غير ربي ما لا ديرلها رايها و ريح روحك من المشاكل.
-تنهد بملل من هاذ الكارثة المتنقلة نتاع سهيلة وقف هز الفاست نتاعو و قالهم تبعوني.
-سهيلة صفقت بيديها و ضحكت:ياسسس ما يجيبك للطريق غير سهيلة خرجت تجري متباعتو قبل ما يبدل رايو و وراها مروان يكيل في ترميها المكعبرين كيفاه يتعوجو وحدهم حك جبهتو وقال في سرو:أححح وقتاه تحني عليا و نطفي فيك ناري.
-بعد نص ساعة كانو قدام دارو دارت ليه سهيلة و الغش راكبها:حفرة الزطالجية يا مخلوق ملقيت وين تسكنها غير فحفرة الزطالجية .
-مسح على لحيتو بغش علابالو ليوم متسكتش ندم لي جابها حل المفتاح دخل و سبقهم ينادي على مريم لي غير سمعت صوتو فرحت و دقاتها تسارعو عندها مدة ما شافتوش يروح بعدما ترقد و يخرج قبل ما تنوض خرجت تجري من الكوزينة هازة سرفيتة تمسح بيها فيديها غير هزت راسها شافت سهيلة و معاها واحد معرفاتوش واقفين ورا يونس راحت تجري عند سهيلة و الضحكة مالية وجها حضنتها و بدات تبوس فيها بكل حب: كيفاه حتى جيتي و وين عرفتي وين نسكن.
-حكاية طويلة مبعد نحكيهالك قوليلي انتي كيفاه عاملة ووش داير فيك سي يونس احكيلي إذا قلقك أنا نجيبلك حقك منو ضحكت مريم على هدرتها و خدودها توردو من الحشمة بعدها تذكرت الشخص لي واقف مع سهيلة طلعت راسها ليه و قدمتلو يدها:سامحني خويا و الله ما تولهت.
-لا مكان حتى مشكل معاك مروان صاحب يونس و مدلها يدو ناسين عيون النسر لي تراقب فيهم و قريب تاكلهم بنظراتها ضغط على يديه بقوة حتى يهدي روحو و قاعد يتحلف فيها في سرو على اليد لي تمدت لغير يدو.
-دخلتهم مريم للصالة و الضحكة مالية وجها و سط دهشة سهيلة و مروان من حالة الدار لي تفتقر لابسط مقومات العيش غير خرجت باش جيبلهم حاجة يشربوها دارو ليونس يلومو فيه.
-علاه هكذا يا صاحبي و الله معرفت قلبك قاسي حجر هكذا ملقيت وين تسكن الطفلة غير هنا و أنت قادر تسكنها فأحسن البيوت .
- أنا حر و نسكن مرتي وين نحب الله إن شاء الله حتى في حفرة واحد ما يدبر عليا.
-لا ماكش حر تكلمت سهيلة بغضب ماكش حر ولا كي شفت الطفلة يتيمة و معندها حتى واحد قلت خلي نستقوى عليها
-سهيلة رص على سنيه و حكى بصوت خشين آخر مرة تحكي معايا هكذا و متخلينيش نندم لي جبتك تشوفيها.
- شافت فيه سهيلة بغضب أكبر و الله راح يجي نهار و تند.....قاطعها دخول مريم هازة صينية القهوة و معاها قاطو خدماتو ليوم حطتهولهم و البسمة مفارقتهاش بقات تصبلهم فيها تحت نظرات الجميع ...قرب مروان من يونس و همسلو في وذنو و الله وصبرت و نلت يا يونس ديت طفلة كاملة مكمولة ألف واحد يتمناها غير سمع هدرتو هبل في مخو و نار الغيرة شعلت فيه و قف بزربة و عيط لمريم تلحقو للكوزينة.