كرونيك#الظل

#الظل_الحلقة 135

الحلقة 135:فاتو 3 أشهر على ذيك الليلة يونس راح للصحراء يلبي نداء الوطن و خلى قلبو عند مريم كان يعد فالدقايق و الثواني باه يرجع توحشها و الوحش قتلو مقدرش يصبر على فراقها متصورش أنو راح يصير هكذا فغايبها هابل و ديما على أعصابو فكل ثانية يلقى روحو يخمم فيها زعما وش قاعدة دير زعما راهي تضحك ولا تبكي نساتني و تهنات مني و توحشتني كيما أنا متوحشها زعما مش ترقد الليل و تبات تعد فنجومو كيما نعمل أنا و إلا راهي ترقد مرتاحة خاطر الوحش لي كان منكدلها حياتها راح كل ما يتذكر آخر ليلة بينهم يجن و يعض صوابعو ندم على الي قالهولها صورتها وهي مرمية في الأرض تبكي مزالت لحد الآن محفورة في مخو و مش قادر ينحيها من بالو.
Flash back:
-كمل مكالمتو مع سهيلة و دخل للدار شافها و ياريتو ماشافها منظرها قسملو قلبو على زوج قاعدة في الأرض و تبكي على طول صوتها تمنى يروح ليها يحضنها يدخلها وسط ضلوعو يمسحلها دموعها و يقولها حقك عليا أنا رخيس و منستاهلش ملاك كيف انتي ..انتي نجمة مقامك السماء و أنا وحش محرم عليه يمس هاذ النجمة ضغط على يديه زوج و فات يجري لبيتو جمع اغراضو في كابة و تم خارج لقاها في نفس الوضعية مقدرش يشوفها على هاذ الحالة و ميروحلهاش الله غالب مهما كان القلب لحمة و وجيعة الغالي واحد ما يقدر يتحملها راح لعندها طابس عليها هزلها يدها و حط عليها بوسة طويلة تلخص بزاف حوايج ...طلعت عينيها المدمعين حايرة فهاذ العبد من شوية كان يجرح بابشع الكلام و ذوك قاعد يبوس و كانو ما صرا شي حيرها و هبلها و خلاها بلا عقل كل ما تقول فهمتو تلقا روحها ما فاهمة والو ...
-حط يديه على وجها و مسحلها دموعها لكن كل ما يمسح دمعة يطيحو في بلاصتها دمعات تكلم بصوت باح و حنين: اشش آخر حاجة نحب نشوفها هي دموعك ..حط روس صوابعو على ذقنها و طلعلها وجها..تقابلو العينين و كل زوج فيهم يحكيو حكاية كمل كلامو وهو يشوف فيها: متبكيش يا مريم و الله ما نقدر نشوف دموعك امسحيهم و خليني نروح و أنا مطمن متحيرينيش عليك.
- شافت فيه و هي مش فاهمة حاجة وين راح يروح زعما خلاص كره منها وراح يطلقها بعدما القلب تعلق و العقل تلف رايو معاه راح يروح و يخليها و هي شكون بيها و لمن راح تبقى فهاذ الدنيا علاه الناس كامل يروحو و يخليوها سألاتو بصوت مرجوف: راح تروح و تخليني.
-و علاه أنا نقدر نخليك لوكان جيت نقدر و الله راني عملتها و ريحت روحي كمل كلامو بجد هاذ المرة أنا مسافر يا مريم و معلاباليش قداش راح نقعد راح تجي سهيلة تقعد معاك طول ما أنا غايب نحبك توعديني بحاجة وحدة حتى يرتاح بالي...منحبكش تبكي و منحبش دمعة وحدة طيح من هاذ العينين أوعديني .
- شافت فيه و قلبها يعصر عليها مهما عمل و مهما قال لكن غير عرفت أنو رايح و مخليها جنت و مقدرتش تتحمل هزتلو براسها برك حاسة بلسانها ثقيل و الكلمات حالفين لا يخرجو.
-قدم منها أكثر جبدها لحضنو ياخذ شوية طاقة لكن زرب بعد خايف لا يوالف و ميقدرش يبعد باسها على راسها بوسة طويلة هز كابتو و مشى.
Back:
-كانت طل على التاقة كيما كل يوم من 3أشهر ديما غارسة راسها هنا و تستنى فيه يرجع توحشاتو و مقدرتش على فراقو تمناتو يرجع و يعمل فيها وش حب يضربها يسبها يجرحها بكلامو المسموم لكن المهم يكون قريب ليها يتنفسو نفس الهواء و يرقدو تحت نفس السقف هزت راسها للسماء و تكلمت بصوت خافت أرجع يا يونس أرجع و الله ما قدرت نزيد نصبر أكثر أرجع و ريحيني و ريح معاك هاذ القلب لي تعبني.