كرونيك#الظل

#الظل_الحلقة 58

الحلقة58:نصيرة تصدمت و الدم نشف فيها مستحيل هاذ الشيء مستحيل مدرتش حسابي لهاد الأمر كيفاه يا نصيرة غلطتي هاذ الغلطة كيفاه لا لازم ندير حاجة لازم نحبس هاذ الخطبة قبل ما تم هشام يا يكون لهند يا ميكونش لكن باه تديه هاذ القروية على جثتي تكلمت و الربثة حاكمتها:كيفاه يا هشام حاب تدي دلولة الدار و احنا مزلنا مشبعناش بيها كي بدينا نتعلقو بيها راح تديهالنا زيد الطفلة مزالت صغيرة و باباها حابها تقرا و دير مستقبلها و بعدها يخمم فالزواج.
-جاوبها هشام بعدما شاف الصدمة في وجها هاذ هو الشيء لحاب يوصل ليه:لا مش صغيرة يا مرت عمي 18سنة سن مليح بزاف للزواج و إذا على لقراية فمعنديش مشكل إذا حبت تقرا راح نسجلها في أحسن المدارس و لا وش قال عمي.
-لهادي لشاف نظرات الوعيد من نصيرة لكن مهتمش و تجاهلها بعدها قال خلي نزيدو نسقسو لعروسة على رايها وش رايك مريم في هشام.
-مريم مكانتش هنا كانت في عالم آخر هشام راجل ألف وحدة تتمناه مكانتش تحلم في أقصى طموحاتها أنها تدي راجل كيما هو زين و عين و أخلاق وولد عمها من فوق لكن و علاش حاسة هكذا علاه مش فرحانة علاه أول متكلمو بأمر خطبتها جا في بالها هو هي من غير إسمو متعرف عليه والو حتى وجهو مشافتوش وش لخلى فكرها يروح عندو قلبها يخبط لكن مش من الفرحة أنها تخطبت لا من الحزن أنها إذا وافقت ملازمش تزيد تخمم فيه ملازمش تزيد توقف في تاقة بيتها و تخزر فيه بالسرقة تملا عينيها بشوفتو و تمني روحها يبادلها نفس النظرة حبت تقول لا مش موافقة لكن متقدرش الظاهر باباها فرحان بهاذ الزواج و ميجيش تكسرلو فرحتو و هو راجع من مرضة مدام هو وافق فأكيد أنو شاف صلاحها فهاذ الزواج خلي توافق و لي يصير يصير ممكن مع الأيام تنسى يونس.
كانت حاسة بخجل كبير آخر حاجة توقعتها أنها راح تتحط في موقف كيف هاذا هزت راسها وشافت في والدها لي يستنى فالاجابة و قالت بصوت يكاد يكون مسموع موافقة.
-تبسم لهادي لي حس بفرحة كبيرة وراح باس راسها ألف مبروك بنتي ربي يهنيك إن شاء الله.
-كمل كلامو و قال و بما أنو تفاهمنا و الكل وافق أنا نقول خير البر عاجله الخطبة تكون منا على يومين و الزواج بعد أسبوع وش رايك يا هشام.
-لتشوفو مناسب يا عمي أعملو أحنا لازم نمشو راح الحال بعد غدوة إن شاء الله نتلاقاو وقف و تبعاتو فيروز و ميساء لي مهزتش راسها من لي جات خطو و قررو و تفاهمو في مكانها و مخذاوش حتى رايها ههه حابة يشاوروك و إنتي قررتي وحدك عملتي لقالك عليه قلبك و نسيتي أخلاقك و تربيتك تبعتي لي باعك و بعتي أهلك و ناسك اسكتي يا ميساء و حطي جمرة سخونة على ذاك القلب أكويه و متخليهش يزيد يدمرك شافت في وليد نظرة أخيرة نظرة مختلفة تماما على نظرات العشق و الغرام لكانت تخزرلو بيهم نظرة تحمل الكثير من المعاني إلا معنى واحد لي هو الحب.