الحلقة 92:ضربت أشعة الشمس في وجها فاقت مخلوعة راحت تجري للحمام غير طلعت راسها شافت وجها تصدمت منو كان كلو جروح و كدمات الله لا تربحك يا لهادي كيفاه راح نقابل الناس ليوم بهاذ الوجه خرجت تجري من الغرفة طلت يمين يسار و لما مالمحت حتى واحد راحت بزربة لغرفتها غير وصلت لقات السرير منظم يعني سي لهادي بايت فالمكتب أحسن راحت للكوافوز و بدات تغطي في الاثار لي على وجها بالمكياج.
-لتحت في غرفة المكتب كان لهادي واقف و يخزر من التاقة يتكف فالدخان و مش هامو صحتو الشي لي عملاتو فيه نصيرة كبير و كبير بزاف لعبت بيه و بحياتو طول هاذ الثمنتاش سنة يعني مريم مش بنتي يعني الشي الوحيد لي كان يربطني بيها راح و تبخر يعني بعدما كنت نحسب روحي ربحت كلشي و نحيت لمحمد كلشي نلقاه فالأخير هو لي ربح و خلاتلو وفاء قطعة منها زير على يديه بغل يكرهو و يكره سيرتو و كل ما يتفكرو الجنون يركبوه .
-ليوم مريم فاقت بكري مش حابة تتبل ببيدون ماء كيما لبارح أول ما دخلت للكوزينة احتارت و معرفتش وش تعمل مش عارفة بواش يحب يفطر لكن قررت انها تعمل فطور كيما ليحبو قلبها ضحكت في سرها و قالت خلي ياكل كيما نحب أنا بدات بالكسرة خبزتها و حطتها طيب و راحت جبدت الزبدة و لعسل و زيت الزيتون عصرت التشينة و حطت لحليب و القهوة يطيبو
عند يونس لي كان راقد و مش جايب خبر لكن أول ما شم ريحة بنينة خرج يجري يتبع في مصدرها كيف المسحور غير وصل للمطبخ شافها عاطياتو بظهر لامة شعرها بخمار لكن هكذاك و بقى نصو مدلي يلمس في ترميها لكبار لمدورين بلع ريقو اكثر وقت هبط عينيه و جاو في سيقانها البيض لي كانت مشمرة عليهم الروبة السخانة طلعتلو و حس بكمية إغراء كبيرة رغم أنو المنظر عادي لكنو يرى فيه قمة في الاغراء عندها أنوثة طاغية تبان و تبرز حتى في أسوء حالاتها فاق من سرحتو وقت دارت و شافتو تبسمت في وجهو و قاتلو صباح الخير رغم انها عارفة أنو مش راح يرجعهالها لكن هذي هي طبيعتها تتبسم في وجه الكل حتى لوكان ميحبوهاش لما شافتو مرجعلهاش وهاذا المتوقع زادت تكلمت و قاتلو لفطور وجد.
فاق من سرحتو على هاذ الكلمة و نزل عينو للمايدة المزينة بما لذ و طاب ضحك في سرو عيش يا يونس و اتمتع بعدما كنت تفطر غير بفنجان قهوة و لا كاس حليب بارد وليت تفطر فطور الملوك شاف فيها و عمل روحو مش مهتم نروح نغسل و نجي .
-بعدما كملت مكياجها سمعت دق الباب رجعت شافت في روحها مليح تتاكد أنو حتى اثر مراه باين غير تاكدت اذنت للطارق بالدخول أول ماشافتها تكلمت:على سلامتك يا لالة كنتي زدتي يوم و لا يومين و قيلا حنا لي رانا نخدمو عندك مش انتي
-نزلت فضيلة راسها و هي متوترة علابالها بلي زودتها لكن ظروفها أقوى :سامحيني يا مدام لكن و الله كانت عندي ظروف قاهرة منعتني نجي.
-واش هي هاذ الظروف يا لالة.
-ولدي اسماعيل يا مدام بعد ما نفذ خطتو و روح جاه واحد في ذيك الليلة و تعدى عليه بالضرب دقدقو و مخلاش فيه عظم صحيح كسرلو عظمة في صدرو و يديه في زوج بلا لجروح لي في كامل جسمو الله لا تربحو وين ما كان.
- شافت فيها نصيرة و سألتها بفضول و معرفتوش شكون لا لما شفنا فالكاميرات نتاع الشارع كان متلثم و المشكل أنو ما سرق منو حتى فرنك.
-نصيرة بدا يدخلها الشك لكن حبت تتأكد يمكن واحد من أعداء ولدك.
-لا يا لالة اسماعيل صح نتاع شراب و زطلة لكن خاطيه المشاكل و عمرو ما تهاوش مع واحد أنا نظن أنو عندها علاقة مع الشي لي دارو زعمة ميكونش سي لهادي و لا سي وليد هوما لعملوها فيه.
-نصيرة سكتت و ملقات ما تقول لهادي خاطي أصلا كان مرمي فالسبيطار فذيك الليلة زعما يكون وليد لكن حتى هو من وقت دخل لهادي راح معاه و بقى ليلة كاملة ثم.
-غدوة نحب نشوف تسجيل الكاميرات بنفسي مفهوم
-مفهوم ألالة راح نروحو غدوة لمركز الشرطة نتاع لحي و تشوفيه بنفسك.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
