كرونيك#الظل

#الظل_الحلقة27

الحلقة 27:فاقت نصيرة مبكرة على غير العادة حابة تلحق بلهادي قبل مايروح للخدمة هبطت درجات القصر بسرعة لازم ليوم تفريها معاه و تحط النقاط على الحروف وصلت عندو لقاتو يفطر خزرلها بنص عين و كمل ماكلتو هاد الأيام موش حامل يشوف وجها قدامو يتجنب فيها على قد ما يقدر طولت فالشوفة فيه مسح فمو بالسرفيتة و قالها:غير الخير كشما مودرة في وجهي -لا لكن يظهر لي أنت راك مودر هاذ الأيامات و نسيت إتفاقنا. -ههه أنا و كتاه اتفقت معاك منيش متفكر و قيلا بديتي تخرفي يا مرا غير أجري على روحك. - لضت على سنيها بغش و قربت منو وشوشتلو في وذنو ألحقني للمكتب إذا حاب تشوف بنتك. -مسح على وجهو بغل و شرب كاس ماء على ضربة وحدة لعل طفي نار لي شعلتها فيه نصيرة مهما يحاول يدعي القوة لكن قدام جبروت هاذ المرأة يستسلم. -دخل للمكتب و قفل الباب لقاها قاعدة ثما و حاطة رجل على رجل قعدة تدل على ثقتها فروحها و فلي راح تقولو. -جلس مقابلها و هو متوتر من الشيء لراح تقولو تمالك روحو و نطق:اتفضلي يا لالا احكي و اشرطي اشرطي مدام بنتي بين يديك و حاكمتني من اليد لي توجعني. -آه يا لهادي آه بنتك كانت سلاحي لقدرت نأمن بيه روحي لسنين معاك و ذوكا جا الوقت لي نأمن فيه على ولادي بنفس السلاح أما هاذ المرة على شرط راح نخلي بنتك تعيش عندك و قدام عينك لكن قبلها راح تقنع هشام يتزوج بهند لازم تخليه يتزوجها بأي طريقة و نوعدك بنتك راح تكون هنا اليوم قبل غدوة،خمم مليح يا لهادي شركات مصطفى بلمختاري لازم يكونو لينا بأي طريقة نحتاجو ليهم باه نظفو شركاتنا و نبعدو الخطر علينا و باه يقوى إسمك أكثر فالبلاد و واحد ميقدر يواجهنا أنت تحوس على بنتك حاضر يا سيدي بنتك راح تكون عندك لكن نفذلي هاذ الشرط الصغير. -وأنا كيفاه راح نقدر نقنع هشام بهاذ الشيء شفتيه وش دار هداك النهار مستحيل يقبلي مستحيل -يقبل يا لهادي يقبل أنت برك أعرف كيفاه تلعبها اضغط عليه بنقطة ضعفو. -واش هي نقطة ضعفو ؟؟؟؟ -ميساء الطفلة عاشقة في وليد و لوكان يقولها موتي تموت من لي كانت صغيرة و أنا ملاحظة تصرفاتها و كيفاش تلحق فيه من بلاصة لبلاصة روح أحكي معاها و بينلها بلي راك شاريها لولدك و مستحيل تسمح فيها وزيد أحكي مع فيروز البهلولة هذيك نية وراح تحشم منك لانها مدايراتك فمقام بابات ولادها أكيد مش راح تحشمك ساعتها إذا فشلت ننتقلو للخطة الثانية. -موافق يا نصيرة لكن بشرط نحب نشوف بنتي بأقرب فرصة باه نديرلك رايك بعد الصبر لي صبرتو سنين منقدرش نصبر أكثر.