كرونيك#الظل

#الظل_الحلقة 105

الحلقة 105:كانت في مكتبها رايحة جاية تستنى فالخبر لي صارلها أيام تخطط ليه سمعت هاتفها رن راحت تجري ليه بالزربة غير هزت:تكلم الصوت الصادر من الجهة الأخرى
مدام رانا حطينا السلعة المغشوشة وسط سلعة السي هشام و مبقالهاش بزاف و توصل للمتعاملين
اكتفات بكلمة و حدة صحيت .
متحكيش هاذ الامور لما تكون فالمكتب تخاف يكون يتجسس عليها.
ضحكت في سرها ضحكة انتصار و الله و جا ليوم لي راح نذلك بين الناس من ليوم راسك متزيدش تهزو و سمعتك لي كانت سلاحك راح تصير سلاح ضدك أنا وعدتك باش ننتقم و جا ليوم لي ننتقم فيه .
بعد ساعة من الزمن سمعت صوت لومبيلونس قدام الشركة فالأول مهتمتش لكن مبعد دخلها الشك أول ماخرجت من مكتبها لمحتهم متوجهين لغرفة هشام بقات متبعتهم و هي موش فاهمة حتى حاجة
كان قاعد في مكتبو يراجع فحسابات الشركة و قلبو مقبوض عليه من الصباح و هو حاس روحو مش مليح قال خلي غير نكمل هاذ الملف و نروح للدار نرتاح لكن جا يكمل سمع حس برا مفهمش وش كاين ناض خارج يستفسر فإذا بالبوليس داخلين عندو تقدم واحد منهم خرج مذكرة توقيف ووراهالو هشام وجهو راح ألوان و جا ألوان جس بالأرض دور بيه كيفاه هشام لي طول عمرو سمعتو راس مالو هشام لي يا ما رفض صفقات بالملايير فقط لكونها مشبوهة هشام لي عادى ناس كثير لأنهم غير نزهاء و ما يناسبوش مهنيتو و أخلاقو يتجر ليوم كيف المجرمين و أعين الناس تراقب فيه الناس لي ياما شهدولو بأخلاقو اليوم راح يشهدو بأنو فاسد و مجرم خرج من مكتبو و هو مهبط راسو لكن أول ما فات عليها وقف و شاف فيها ورحمة بابا المدفون تحت التراب لو نلقا عندك يد فلي جرالي غير نقتلك و نشرب من دمك.
بقات واقفة و تشوف فيه كلشي فيها تجمد و كلماتو زادو جمدوها أكثر و أكثر دموعها عملو طريق على خدها و رجليها فشلو عليها و مقدرتش تحركهم تمت على هذا الحال دقايق حتى وعات على روحها راحت تجري كيف المجنونة لمكتبها هزت ساكها و مفاتحها و هبطت تجري خارجة لبرا ركبت سيارتها عفست على الفيتاس و ديراكسيون دارهم دموعها يسيلو و حلفو لا يحبسو لوكان يحبسوه تقتل روحها هي مخططتش لهاذ الشي هي برك حبت تعطيلو قرصة خفيفة أما السجن عمرها لا فكرت فيه غير و صلت للقصر قارات لبرا و خلات باب سيارتها محلول وصلت للصالة لقات لكل مجموع معدا ميساء التعبانة كانو فرحانين و الفرحة مش سايعتهم بخبر الحفيد الجاي قبل لا تدخل عليهم هند كيف الإعصار : وصلت عندهم و عيطت بأعلى صوتها بابا
دارو ليها مفجوعين دموعها على خدها مخلطين بالكحل السايح و جها أصفر و ما فيهش قطرة دم و يديها برجفو رجيف كملت كلامها و هي تشوف في باباها بحدة:وش عملت لهشام أنطق وش درتلو قوووول ؟؟؟وش قلت لكلابك علاه دخلتوه للحبس علاه يا بابا علاه.
-شاف فيها لهادي و هو مش فاهم حاجة:وش راكي تخلطي يا طفلة ما تهبلينيش وش راح نعمل لهشام و كيفاه حتى دخل للحبس.
- شافت فيه و علات صوتها أكثر و أكثر أنت لي دخلتو للحبس علابالي بلي أنت غير ما تكذبش ماجات تكمل كلامها حتى جاتها كف قوية من لهادي:على آخر عمري تقوليلي كذاب يا خسارة تربيتي ليك.