الحلقة50:هبطت لتحت لقات لعايلة متوجهين لطاولة لفطور وصلت و سلمت عليهم ما رد السلام عليها غير وليد بقاو ياكلو في صمت حتى نطقت مريم مترددة:وليد معليش تديني للسبيطار حابة نزور الوالد.
-أكيد مكان حتى مشكل أصلا احنا رانا رايحين دوكا نكملو لفطور و نمشيو.
-تكلمت هند بكل حقد :كيفاه عاود عاود تروح معانا هاذ المنحوسة باه تكمل على بابا شوف جات نهار برك دخل هو للسبيطار لي عمرو مادخلو.
-خبط وليد الطاولة و تكلم بغش:هند آخر مرة نسمعك تحكي عليها هكذا ديري في بالك مليح راهي اختي كيفها كيفك و لي يقيسها بكلمة نقيسو بعشرة و إذا مش حابة تركبي معاها روحي فطموبيلك مش محتمة تروحي معايا.
-صار هكذا يا وليد وليت تعيط على اختك في جال الدوارية أشفى عليها مليح و جات واقفة حبستها نصيرة لكانت تابع المشهد بصمت ومش عاجبها الحال:استناي هند نجي معاك منقدرش نروح فسيارة وليد نتخنق و دارت لمريم بمعنى راني عليك و أنت(على وليد) لعشية عندي هدرة معاك .
-مريم غرغرو عينيها:سامحني وليد مكنتش نقصد نديرلك مشكل مع عايلتك.
-مدرتيلي حتى مشكل هند زودتها بزاف و كان لازم نوقفها عند حدها إذا كملتي هيا نمشيو.
-وصلت مريم برفقة وليد للمستشفى وين كان الكل مدهوش شكون هاذ الطفلة لواقفة مع وليد بلمختاري خاصة و أنو لبستها بسيطة و متدلش على الغنى لعايشينو عايلتو.
-وصلو لغرفة لهادي لقاو نصيرة و هند سابقينهم باه يدخلو وخرت هند خطوتها لما شافت مريم جاية و حبت تلوحلها كلمة تسم بيها بدنها:لوكان على الأقل بدلتي لبستك تقول راكي في كرنفال في دشرة.
-مريم غمضت عينيها بقوة تتمالك في أعصابها هاد المخلوقة زودتها بزاف مش عارفة وش هي مشكلتها معاها جات تتكلم سبقها وليد:هند احتارمي نفسك و احتارمي المكان لي رانا فيه هاذا كل غيرة منها كي شفتها أحلى منك.
-هند هبلت في مخها كيفاه تجرأ و قالها أحلى منك:أنا نغير من هاذ القروية راك غالط يا خويا لعزيز مش هند لتغير من هاذ الأشكال.
-مالا سكتينا و لا راح نصدق صح بلي راكي غايرة منها هو بينو و بين نفسو متأكد بلي غايرة منها لكن محبش يكبر المشكل أكثر خصوصا و أنهم في مستشفى.
-دخلو كلهم لغرفة لهادي لي غير دار و شاف مريم تبسملها تبسيمة طويلة و قالها:جيتي يا بنتي متعرفيش شحال توحشتك. هند ردتلو الابتسامة تحسب عليها حتى كمل أرواحي مريومة أرواحي عند باباك. هند حست بسطل ما بارد تكب عليها أما مريم فما صدقت هدرة لهادي راحت تجري ليه ترمات في حضنو حتى توجع.
-تكلمت نصيرة بلؤم:بلعقل عليه و لا حابة تقتلي الراجل.
-بعدت مريم على لهادي حشمانة باستلو يدو و قالتو طهورا إن شاء الله.
-بعدها قربت هند و نصيرة منو سلمو عليه و ردلهم سلامهم.
-جا وليد باه يسلم عليه بعد يدو دور وجهو وقال:وش جابك عندي أخرج منحبش نشوف وجهك
-حس اللون تخطف من وجهو غاضتو عمرو بزاف مكانش يحسب باباه راح يهز في قلبو عليه هكذا تكلم بصوت ضعيف:سامحني بابا و خرج.
-خرجت نصيرة تجري من وراه لحقاتو و دوراتو ليها:ممكن تفهمني واش بينك و بين باباك وش درتلو حتى مش حاب يشوف وجهك أنطق
-نحى يدها و قالها كي يرتاح أو يحكيلكم وحدو عيطيلي لمريم خليني نوصلها للدار.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
