كرونيك#الظل

#الظل_الحلقة 78

الحلقة 78:كانت راقدة كيف الملاك بعد ليلة عصيبة مرت عليها ما رقدت غير بطلوع الروح بين أحضان سهيلة راقدة و مش علابالها بالشي لراهم يطبخو فيه لتحت قرو و خطو لحياتها بلا مايشوروها بلا مياخذو رايها كأنها موش إنسان من لحم و دم عندو مشاعر و أحاسيس كأنها عبد مهمتها السمع و الطاعة لرأي أسيادها فاقت على خبط قوي على باب غرفتها تخلعت و حكمت في قلبها كانت تحسب هاذ الدق كابوس لكن أول ما فتحت عينيها عرفت أنو واقع و مش تحلم حكت عويناتها باش توضاحلها الرؤية لبست بنطوفتها و راحت تزرب في خطواتها تفتح أول ما فتحت شافت نصيرة و هند قدامها استغربت أول مرة يدخلو غرفتها جات راح تحكي و تقولهم صباح الخير نطقت نصيرة بصوتها المسموم وجدي روحك و حضري قشك باه تروحي منا.
-خزرت فيهم محتارة و تكلمت بصوت مبحوح من البكي نتاع لبارح وين راح نروح!!!
-تكلمت هند لكانت ورا أمهم بصوت مليان تشفي راح تروحي منين ما جيتي و علاش تحسبي بعد العار لي عملتيه راح تبقاي هنا.
-مريم عينيها دمعو حست بالذل و زادت فقدت جدتها أكثر لو كانت حية عمرها ما تعمل فيها هكذا حتى إذا غلطت تضربها تلومها تسبها لكن عمرها ما تتخلى عليها و لا ترميها تكلمت و الغصة حاكمتها:خالتي صدقيني و الله ما عملت هاذ الشيء و الله ما نعرفو ما قدرتش تكمل كلامها و انفجرت بالبكا لي صرالها فوق احتمالها و طاقتها.
-دزتها نصيرة بكل حقد حتى جات طايحة على الأرض اسكتي ماتحلفيش بربي لوكان جيتي تعرفي ربي مديريش عملتك هيا لمي قشك معنديش الوقت.
-وقفت مريم و قربت تبوس في يدها و ودموعها يسيلو ويدان الله يسترك خالتي خليني هنا على الأقل حتى نطمن على بابا و نحكيلو بلي مزلت طاهرة خليني نثبت براءتي و بعدها نروح وين حبيتو
-بعدت يدها منها بقرف كانو فيها مرض معدي:باباك ههو لي طردك و قال من بعد الشي لي درتيه أنا متبري منك ليوم الدين ازربي اخرجي قبل ما بجي ويرجع يمرض.
-كلمة مصدومة متعبرش على الشي لي حساتو يعني بعد ما بدات تحس أنو رجعت عندها عايلة رجعت وحيدة من أول جديد يعني باباها موش مصدقها و تبرى منها خلاص مبقاش أي حاجة تعيش على جالها فهاذ الدنيا الظاهر وقفت بصعوبة و مشات جيهة الخزانة تلم فحوايجها نطقت هند باستهزاء:ادي لحوايج لي جبتيهم معاك بلاكي تمسي الشي لي شريتيه بدراهم بابا و طلقت ضحكة طويلة.
-تمنات تموت و متسمعش هاذ لكلام لجارح كلامهم كيف السكاكن يطعنو بيها القلوب لكن غليلهم ميشفاش يعودو يخرجو السكين مرة ثانية و ثالثة و رابعة و يبقاو يطعنو أكثر و أكثر هزتلها راسها و كملت تلم فحوايجها.
-شافت فيهم بانكسار و قاتلهم كملت.
-ضحكت هند و قالت أخيرا القصر راح ينضاف.
-مشات معاهم و ركبت في السيارة مودعة هاذ القصر للأبد عمرها لا تصورت أنها راح تغادرو مذلولة مكسورة موسومة بعار معملاتوش تمنات لو أنها مجاتش تمنات لو بقات في دوارها ترعى نعجاتها و جاجاتها تتونس بالسهول و الجبال تحكي مع الطيور و الحيوانات و لا جي هنا و تتحطم كرامتها لكن اللوم بعد القضاء بدعة
-وصلو لمبنى كبير معرفتش واش هو لكنها تساءلت مش قالو راح نرجع مين ما جيت وين جايبيني مالا.
-نطقت نصيرة بلهجة أمر:أنزلي
-هزت كيسها و خرجت مش فاهمة حاجة هي وين و علاه جات هنا؟؟؟