كرونيك#الظل

#الظل_الحلقة 31

الحلقة 31:شاف فيها بتردد لازم تعرفي بلي إذا مشيتي فهاذ الطريق ما راحش تقدري ترجعي و ممكن تخسري فيهم خوك و أنا راح نخسر عايلتي و نخسر صاحبي وولد عمي. -مسحت دموع عينيها و قاتلو ميهمنيش ميهمني في حتى واحد المهم نكون معاك متهمني حتى حاجة فهاذ الدنيا غير أنت قولي برك واش ندير و أنا نديرها. -حكملها يدها باسهالها و سألها تقدري يا ميساء توهبيني جسدك باه نضغطو بيه على عايلتك تقدري تضحي هاذ التضحية الكبيرة جاوبيني يا ميساء و أعطيني قرارك. -بقات تخزرلو مصدومة عمرها توقعت يطلب منها هاذ الشيء كيفاه راح ديرها كيفاه راح نقدر تشوف في وجه خوها و أمها إذا دارت هاذ الشيء راح تقتل كل حاجة كانت بينها و بين عايلتها راح تقتل كل شيء حلو و كل رابط كان يربطها معاهم لكن إذا مدارتش هكذا راح تخسر وليد راح تخسرو للأبد راح تضيع فرصتها باه تكون معاه الحلم لي عاشت طول عمرها علاجالو راح يتبخر وش فيها إذا غامرت في سبيل حبها أصلا هكذا رح تكبر في عين وليد و يعرف قيمتو عندها أما عايلتها فراح يغضبو فالأول لكن من بعد أكيد راح يسامحوها . -طال سكوتها و زاد توترو قال في نفسو أكيد رفضت مدام سكتت هكذا وش كنت تحسب يا وليد راح تضحي هاذ التضحية الكبيرة على جالك حتى و إذا كانت تحبك لكن لطلبتو منها حاجة صعيبة بزاف إذا مكانتش مستحيلة تكلم بصوت مهزوم بعدما خمن قرارها و قال نضن وصلني جوابك هيا نديك تروحي -لا راح نروح معاك حابة نكمل حياتي معاك أنت أنا حبيتك يا وليد حبيتك فوق ما تتصور و مستعدة نعطيك أغلى حاجة عند الطفلة خلينا نديروها مكملتش كلامها و طرطقت بالبكا -وليد تبسم إبتسامة معرفتش معناها و بعدها حضنها و باسلها راسها نوعدك بلي زواجنا راح يتم متخافي من والو هكذا راح يوافقو رغما عنهم مبقا محضنها بيد و يد يسوق بيها و مخو سارح في ألف حاجة الشيء لراهو يدير فيه صحيح و لا غالط من ناحية ضميرو مأنبو على هاذ الإنسانة و من جهة أخرى كل ما يتفكر خوها يحقد و يدفن ضميرو الحي في الأعماق.