كرونيك#الظل

#الظل_الحلقة 131

الحلقة 131:تسوق فالطومبيل و عقلها موش هنا كلشي تخلط عليها و كلشي جاها مرة وحدة من يونس لهشام و زادت عليهم وفاء لازم تحل هاذ المشاكل و لا مخها راح يتلف من التخمام وصلت عند عمارة كبيرة قارات و هبطت ..دخلت للداخل طلعت فالأسانسير و ضغطت على الرقم 6.
-بعد دقائق كانت جالسة قدامو فالمكتب نتاعو تكلمت بعدما حطت فنجان القهوة: يعني على حساب هدرتك مكانش أمل نلقاه.
-و الله على حساب ما قلتيلي عليه يا مدام فنظن صعيب بزاف باه نلقاوه السيد عايش بهوية أخرى غير هويتو و يخدم و يتجول بيها عادي فهاذا معناه أنو شخص خطير و مش راح يخلي وراه آثار حتى تلقيه هاذا إذا مكانش عندو هويات أخرى غير هاذو الزوج و هذا احتمال كبير.
-زعما وش يكون هاذ الانسان حتى قادر يزور كامل هاذ الهويات.
-و الله ما نقدر نقولك يمكن يكون عضو من أعضاء المافيا المهميين و لا تابع جهاز الانتربول أو المخابرات.
-ايه و الحل كيفاه ؟؟؟
-و الله ما نكذب عليه أنا راح ندير جهدي باش نلقاه لكن ما نوعدكش.
- في الجهة الأخرى كان لهادي في طريقو للمستشفى كلام نصيرة حتى و إذا كان مقنع لكن مش قادر يصدقو حاب يوصل للحقيقة حاب يعرف وش صار بالضبط قبل 18 سنة وصل ثم و طلع ديراكت لمكتب المدير بحكم أنو شخصية معروفة ملقاش مشكل باش ياخذ موعد...أول مادخل و بعد السلام و المصافحة بدا طول في صلب الموضوع و سألو على وفاء
-المدير وجهو خضار و صفار الظاهر سيرة هاذ المرأة مراحش تخلاص كل يوم يجيه واحد يسقسيه عليها أصلا كل ما يتفكر ليلة البارح و السلاح محطوط فوق راسو يحس بقلبو راح يحبس من الخلعة شاف فلهادي و بلع ريقو لازم يبلعطو بالكلام و يزرب يتخلص منو يخاف كشما يغلط و يقولو و يجيه الشبح نتاع لبارح وهاذ المرة مراحش يرحمو بلع ريقو و تكلم: أعطيني الإسم الكامل و تاريخ الوفاة.
-وفاء***توفات يوم*********.
-عمل روحو يبحث فالميكرو الموضوع قدامو بعد دقايق شاف فيه و قالو بكذب مكتوب هنا وفاة عادية.
-لهادي جن و تعصب خبط عليه المكتب:كيفاس وفاة عادية تكذب عليا.
-مش من حقك تكذبني يا سيد ملفها هنا يقول وفاة عادية هاذ المعلومات لي عندي أنا أصلا متعين من سبع سنين يعني ما نقدر نفيدك بوالو.
-خرج من السبيطار و الدخان يتطاير منو يعني ما قدر ياخذ حتى معلومة عليها حلو الوحيد يمشي لدار المدير لقديم أكيد يعرف حاجة.
-بعد نص ساعة كان قدام الفيلا نتاعو بقى يصوني و بعد دقايق فتحت مرتو: أنعم شكون أنت.
-سامحيني مدام عمار مهداوي هنا؟؟؟
-تكلمت بملل من هاذ الناس لي كل يوم جايين يسقسو على راجلها: إيه هنا بصح إذا كشما محتاج منو نقولهالك من درك راجلي براليزي عندو عامين ما يحكي ما يتحرك يعني ما راح يفيدك بوالو.
-لعن حظو في داخلو لكن بقى عندو بصيص أمل تكلم بكذب: لا يا مدام فهمتيني غالط أنا كانت عندي معريفة قديمة بسي عمار و غير وين سمعت بلي جرالو فحبيت نزورو.
-سامحني والله حسبتك من لي يجيو على مصالحهم تفضل معايا لغرفتو.
-غير دخل وشاف حالتو و تاكد من كلام المراة كفر في سرو خرج يزرب و الجنون دايرين بيه.