كرونيك#الظل

#الظل_الحلقة 71

الحلقة 71:رجع لدارو راح طول تمد من غير ما يغير ثيابو لي سمعو هاذ الليلة صدمو و حيرلو مواجعو يعني غريمتو طول الوقت قدام عينيه و هو مش حاس بيها كيفاه غفل على شيء كيف هاذا كيفاه مفاقش لكن الشيء لي مفهموش و معرفلوش تفسير مش مرت محمد ماتت و هي معندهاش أولاد شكون هاذي لي تحوس على مريم وش علاقتها بنصيرة و لهادي و كيفاه حتى عندها طفلة من محمد يعني بعد هاذ الشيء يظهر خاين و خادع مرتو مالا علاه عمل كامل هاذ الشيء علاه دمرهم هاو حتى هو خاين و الله يا محمد غير ندمك على كل شيء عملتو و الله نذوقك المر لي ذوقتهولي و البداية راح تكون بنتك عيشيلك يا مريم هاذ الأيامات استمتعي بالعز قبل ما نحرمك منو و نرجعك ذليلة تحت رجلي.
-مرو الأيام و قرب موعد العرس مريم كانت طول هاذ الأيام مشغولة بالتحضيرات كل يوم تخرج هي وسهيلة تشري وش خاصها من مستلزمات كانت تحاول تشغل روحها بأي حاجة لمهم متقعدش و متفكرش فيه تحاول تنساه بأي طريقة لكن رغما عنها تلقى روحها تفكر فيه.
-نصيرة و هند ظلو طول هاذ الأيام هادئين يراقبو فالاوضاع من بعيد و يستناو في اللحظة الحاسمة بفارغ الصبر.
-هشام كان متحمس بزاف لهاذ الزواج و يستنا في اليوم الموعود بفارغ الصبر مريم نساتو فأحزانو و خفت عليه الوجيعة لي سبتها ميساء صح منساش شيء لي عملاتو و عمرو مراح ينساه غدرتها راح تخلي أثرها في نفسو لآخر يوم من عمرو لكن حس أنو مريم عوضتلو شوية و خلاتو يفكر فحاجة أخرى من غير هاذ الفضيحة.
-فضيلة طبقت خطتها و عاد ولدها كل يوم هنا و ين ولات تتعمد تبينو قدام الخدامات و تبدى تتشكى منو ليهم و تقولهم معرفتش هاذ الولد كل يوم يديرلي سبة و يجي كثر بزاف هاذ الأيام و أنا حاسة وراه حاجة سهيلة كانت شاكة وراها مصيبة لكن مقدرتش تعرف واش هي تعرفها ذيبة و خبيثة كبيرة و تقدر دير أي حاجة في خاطر المال.
-يونس قرر ووصل لنتيجة وحدة لازم يخطف مريم قبل ما يتم الزواج راح يدير لي في راسو مهما كلفو الثمن و مش راح يخبر سهيلة بهاذ الشيء عارفها تحبها و مراحش ترضى تعاونو مالا لازم يتكل على روحو و ينفذ كل شيء وحدو.