كرونيك#الظل

#الظل_الحلقة 159

الحلقة 159:تمشي في الشارع هايمة تحت قطرات المطر مخها مش معاها راح تهبل راح تجن ليوم تلقات أقوى صفعة في حياتها ليوم طعنت مرتين مرة بحقيقة أنو أمها عايشة و سمحت فيها و مرة لما تخلى عليها يونس راح و عطاها بظهرو كأنو عمرو لا عرفها كأنها مش مرتو و مهما كان تبقى تحت مسؤوليتو و مش من حقو يسمح فيها المطر قوات و تخلطت قطراتها مع دموعها الدنيا ظلامت و هي مزالت ما وصلت تحمد ربي لي حفظتها سهيلة العنوان و إلا ما كانتش تعرف وش راح دير ثيابها تبلو و لصقو على قشها طرافها جمدو من البرد و شفايفها زراقو و رعشتهم قوات ضمت روحها بذرعيها تطلب في شوية دفا لكن والو برودة جسمها قاعدة تزيد أكثر و أكثر بدات تزرب في خطواتها تحب توصل في أقرب الوقت الخوف بدى يسري في جسمها الشوارع فرغت من المارة و بقاو قلة قليلة يجرو حتى يتخباو ....
-كان قاعد في بيتو حاط قرعة بيرة و يشرب في الكاس ورا الكاس حاب ينسى حاب يسافر لعالم آخر وين يقدر ينحيها من مخو و قلبو لكن كل ما يزيد في الدوز تتغلغل في عقلو أكثر ماهي متغلغلة نظرتها و هي تترجى فيه زعزعاتو هداتو و قتلاتو كل ما يشوف أنو الدار خلاص فرغت من حسها معادش يشوف ضحكتها الحلوة معادش يشوف شعرها لي يهبلو و لا زينها لي يقتلو معادش يسمع لكلامها لحنين معادش يشوف حتى دموعها لي يذبحوه مش عارف كيفاه راح يفوت بقية حياتو بلا بيها خلاص الطفلة أدمنها و صارت كيف لا دروق يمشي في عروقو و في دمو.
-يسمع في الباب يدق دقات خافتة تجاهل الدق أصلا ما فيه ما ينوض و يفتح لكن الدقة صارو دقات و الظاهر مولاها حاب يدي طريحة يفرغ غشو فيه فيه مشا بتثاقل يسب و يكفر و يتحلف فلي فسدلو مزاج.
فتحو و هو يسب بأعلى صوتو: و ذوك متخلوش ر....الواحد في عقلو و لا كيفا....لكن أول ما هز راسو مصدقش لي شافو تكلم بذهول:م..مريم......ضحك على طول صوتو : و الله و هبلت نتاع الصح صرت تتخيلها في كل مكان فيق يا يونس مريم خلاص خرجت من حياتك....قفل الباب و خلاها و اقفة ترجف مش قادرة تحكي رجعت هزت يدها الباردة و دقت مرة و زوج ...حتى تفتح هاذ المرة بقوة اكبر: مريم متهبلينيش قولي منيش نحلم قولي خاطر عقلي خلاص راني ودرتو فهميني و إذا كان حلم فيقيني.
-تكلم بصوت مرعوش شوية من الدموع و شوية من البرد: يو..نس..ها..ذي..أ..أنا..مر..يم..مخلاهاش تكمل و جبدها لحظنو يبكي كيف الولد الصغير عصرها و ما خلالهاش مجال تتحرك يحرك في يديه على طول ظهرها كانو ياكد لروحو بلي مهيش حلم..رجع يبوس في راسها بوسات متفرقة و دموعو طايحين على شعرها: مريم يا روح يونس رجعتيلي رجعتيلي يا عمري أحكي قوليلي بلي مش قاعد نحلم أحكي خليني نطمن ...بعدت عليه بطلوع الروح شافت فيه بنظرة عتاب : علاه خليتني يا يونس علاه سمحت فيا معقولة منعنيلك والو معقولة هاذ القلب قربت يدها و حطتها على صدرو عمرو لا حس بيا عمرو لا دق كيفما قلبي ديما يدق ليك علاه طعنتني و طعنت قلبي لي تعلق بيك علاه يا يونس علاه....كلماتها شواوه و حرقوه معرفش وش يرد كيفاه يفهمها و كيفاه يحكيلها على لي قاعد يجرى فيه طلع يدو و حط صباعو على شفافها: اششس متحكيش هكذا مريومتي أنتي ماسة نادرة انتي جوهرة قيمتك غالية تستاهلي تعيشي ملكة مع راجل يستحقك مع راجل كامل مع راجل وقت تخرجي معاه تخرج وانتي مفتخرة بيه تشوفي فوجوه الكل تقوليلهم هذا راجلي حلالي ليا أنا وحدي كمل بمرارة لكن مش انا هاذ الراجل أنا مجرد وحش إنسان مشوه لي يشوفو يخاف منو لي شوفو يعافو و يهرب منو مش حاب نكون أناني و نظلمك معايا روحي و عيشي حياتك بعيد عليا و متخافيش على يونس تعود يعيش وحدو الوحدة هي ونيستي و هي رفيقتي الوحيدة فهاذ الدنيا