كرونيك#الظل

#الظل_الحلقة[16]

الحلقة 16: بعد ليلة حافلة بالاحداث نستقبلو نهار جديد مخبي في جعبتو الكثير. -ناضت نصيرة صباح بكري على غير العادة تفاجأ منها لهادي مش من طبيعتها تفيق بكري *لهادي* غير لخير شايفك صبحتي نايضة-*نصيرة*:ماكاين والو غير اتهنى من القلقة نتاع لبارح حرم عليا النوم و زيد عندنا اجتماع في الجمعية راح نروحو للقرى النائية نصدقو على المحتاجين لثم شربت قهوتها بزربة و خرجت و غير شافها ركبت فطوموبيل هز البورطابل و عيط لواحد من ليقارد نتاوعو:اسمعني مدام نصيرة خرجت دوك نحبك تعسهالي و جيبلي خبارها أول بأول رد بالك تفيقلك كمل لمكالمة نتاعو وراح قعد يكمل فطورو فهذا الأثناء هبطت هند *لهادي*:اوووه اميرتي ناضت بكري متقوليش برك راكي حابة تخدمي من ليوم *هند*:يا بابا وشمن خدمة خليني على الأقل نريح شوية و مبعد ساهل لحال ديجا بعد شي لصرا لبارح لمورال نتاعي راه يتكركر علاه يا بابا ديرلنا هكذا كون على الأقل شاورتنا و لا حتى علمتنا بالموضوع مش جي فجأة و ترمي قنبلة فوسطنا كأن شيئا لم يكن لبارح لأول مرة نحس روحي رخيسة و بلا كرامة ولد خوك بهدل بينا مسح بينا الارض و انت تعرفني مليح كلش إلا عزة نفسي تنهد الهادي تنهيدة طويلة:صح عندك الحق في هذي أنا تسرعت بزاف في قراري أما شوفي لحكاية من منظور اخر كنت حاب نحميكم و نحمي و لاد خويا كنت حابكم تتقربو اكثر باه ثروتكم ميديهاش البراني ملقيتش حل غير إني نحطكم قدام الأمر الواقع بصح مكنتش حاسب حساب هشام .لمهم أنا نروح وقت لخدمة دوكا في وقت آخر و نكملو هدرتنا *هند*:بابا *لهادي*:وي ما بال *هند*:حابة نسقسيك على شركة بلمختاري للإنشاءات ياخي مزلنا شركاء فيها مع عمي و عندنا فيها نسبة أسهم *لهادي*:إيه بصح و علاه تسقسي *هند*:خاطش حابة نخدم فيها استغرب لهادي من هدرتها بصح و علاه تخدم فيها نسبة أسهمنا فيها مش كبيرة و زيد هشام قايم بيها على أكمل وجه ما راح تضيفي والو*هند*:لا بلعكس يا بابي راح نضيف راح نكون قريبة منهم و نعرف كيفاه راهم يخممو يخي المثل يقول احذر عدوك مرة و احذر صديقك ألف مرة و أنا حابة نكون عينك لي تجيبلك أخبارهم حار لهادي في بنتو عمرو ماكان يحسبها تخمم بهاد الطريقة طلعت داهية كبيرة أما عندها لحق في واش قالت راح نخليها عيني لتجيبلي خبارهم تبسملها لهادي و قالها:مبدئيا موافقك أما لازم نحكيو فالموضوع بشكل مفصل متتخذيش حتى قرار حتى تشاوريني *هند*:مرسي بابي على ثقتك و نوعدك راح نكون على قد ثقتك بيا .هو خرج و هي تبسمت بخبث و هكذا يا سي هشام راح نبدا ننتقم منك.