كرونيك#الظل

#الظل_الحلقة 101

الحلقة 101:كان قاعد في مكتبو لما دق عليه مراد الباب و دخل.
غير شافو وقف و عملو التحية العسكرية بعدها صافحو و حضنو بود وحب كبيرين هذا الراجل جمايلو كثيرة و مهما يوفيه حقو ما يكفيش.
-جلس مراد و شاف فيونس وقالو:عندي ليك أخبار مهمة .
-شاف فيه يونس يتساءل بخصوص واش ؟؟
-نظن عايلة بلمختاري شكو في أمرك ليوم مرتو جات للمستشفى تحب تعرف حقيقة موتك و حتى زوجها لهادي راح للشركة الأمنية لي دخلت بيها لعندهم لكن مديرها دخلو في حيط و معطالو حتى جواب صافي لازم تاخذ إحتياطك أكثر و تخلي عينك محلولة.
-غريبة لكن نظن زيارة نصيرة للمستشفى مش بسبة خدمتي .
-وش تقصد
-لي نقصدو أنهم يحوسو على حاجة من الماضي لكن لي موش فاهمو و علاه حتى دوكا باه تفكروني .
-أكيد شكو فيك مؤخرا و عرفو بلي راك عايش لازم متخليهش يعرفو يا يونس خدمتنا حساسة بزاف و أي غلطة راح دمر جهد سنين رد بالك و متحيرنيش جا واقف و قالو أنا نخليك دوكا عندي ميسيون للصحراء أي جديد خبرني بيه.
- غير خرج بقا يونس يطلع و يهبط و علاه حتى نصيرة بنفسها راحت للسبيطار و سقسات عليا يعني أنها شكت بلي راني عايش يا ترى وش حابيين مني زعمة يكون عندهم يد فلي جرا قبل سنين لا مستحيل أصلا غريمي واحد و معروف لكن حتى هوما مش قليلين و يقدرو يديروها لالا وش مصلحتهم من هاذ الشي أوووف فكر يا يونس فكر ملازمش نخلي أي فرصة للخطأ.
بقا رايح جاي فالبيرو نتاعو مش عارف كيفاه يتصرف و منين يبدا علمتهم دخلاتو في حيط و شوشتلو أفكارو دخل عليه مروان بلا ما يستأذن و قعد يشوف فيه.
-أحبس أصاحبي ساعة و أنت دور كي الزربوط دوختني .
-رجع جلس على كرسيه شعل سيجارة و بقى يتكيف فيها بشراهة.
-أحكيلي يا يونس و فرغ قلبك واش لي مقلقك و محيرك.
-لهادي و نصيرة نظن شاكين في أمري و بداو ينبشو ورايا لكن معرفتش واش مقصدهم حابين يحوسو عليا كيونس ولد محسن و لا كيونس ضابط المخابرات لازم نعرف كيفاه راهم يخممو و سهيلة وحدها مش قادرة جيبلي خبارهم لازم نزرعو واحد جديد وسطهم .
-شكون ؟؟
- أنت يا مروان مهمتك الجديدة بدات من اليوم.
-لكن....قاطعو يونس بصرامة هذا أمر عسكري
-شاف فيه بخوف يعرف صاحبو وقت يتعلق الأمر بالخدمة يولي ميعرف حتى واحد وش هي هاذ المهمة
-راح تخدم في شركة بلمختاري للإنشاءات
-بصح هاذي الشركة نتاع هشام و احنا حابيين نتجسسو على لهادي.
- أنت دير لي قتلك و بعدها راح تعرف وحدك السبب غدوة راح توجد هويتك الجديدة و بعدها تعمل مقابلة مع مدير الموظفيين هو راح يدخلك و يفهمك طريقة العمل.
-معليش أسيدي من غدوة راح نكون ثم بصح هاذا ميعنيش أني نسيت أمر لعشا.
-شاف فيه و عمل روحو مش فاهم وينا عشا؟
-عشا زواجك و لا حاب تجبد بينا لبساط و دير روحك نسيت.
-بفف لصقة يا لطيف هذا وين عرفت وعلاش سهيلة رافضة تتزوج بيك.
-و شكون قالك رافضة هي برك حابة تدلل و أنا راني مسايرها لكن مصيرها تكون بين يديا و في حضني هي نتاعي و تخلقت ليا و غير مروان لي يطبع عليها اسمو.
-هههههه واثق من روحو سي خونا
-اضحك اضحك خاطش مجربتش الحب نهار تجربو و تذوق بنتو راح تحس بصاحبك.
- غير قال هاذ الكلمات غرق في عالمو و جات بين عينيه مريم زعما هاذا لنحس بيه جيهتها وش هو زعما شوقي لشوفتها تعطشي للمسها توقي للغرق في عينيها إحساسي لما نشم ريحتها فرحتي وقت نلمح ضحكتها وجيعتي وقت نشوف دمعتها زعما يكون هاذا هو الحب لي يحكي عليه مروان لا مستحيل فيق يا يونس أنت متخلقتش للحب لي بينك و بين مريم نار و مستحيل تطفا حتى ترجع حقك و حق والديك.