الحلقة 129:دخلت للشركة و هي متوترة ليوم راح تخطي أول خطوة في طريق مجهولة العواقب لكن خلاص مدام عطات كلمتها خلي تكمل فيها للآخر أصلا هاذا هو الصح هوما غلطو و أذاوه بزاف وراح يكون هذا الشي تعويض على خسارتو.
-طلعت للطابق الفوقاني و دخلت للمكتب نتاعو لقاتو كيف العادة غاطس في أوراقو و ملفاتو قدمت لعندو و حطتلو ملف على الطاولة طلع راسو ليها و عمللها إشارة بيدو وش هاذا؟؟؟
-ملف المناقصة لي راح تتقام آخر الأسبوع فيه كامل المعلومات على المبالغ لي راح يدخل بيهم بابا أنت حط سومة أقل و مبروك عليك.
-شاف فيها و هو محتار مقدرش يفهم هاذ المراة مناش مصنوعة و كيفاه تفكر أحيانا تبان بمظهر المرأة القوية المتسلطة لي كل همها أنو غرورها و كبريائها ميتمسوش وأحيانا أخرى تبان بمظهر المراة الضعيفة لي تتمنى منك كلمة وحدة حلوة : مليح نتمنى ميكونش لعبة جديدة من ألاعيبك.
-هند و كأنو كلمتو كانت القطرة لي أفاضت الكاس و اعلنت عن قدوم سيل من الدموع مش كافيها أنها ليل كامل و هي على أعصابها و بايتة طلع و تهبط تعرف أنو الشي لي عملاتو يعتبر خيانة لأهلها و تعرف أنو لو يعرفو بلي عملاتو راح يتبراو منها لكن هي أعطات وعد وعد أنها تصلح غلطتها و غلطة والديها حتى لو كان هاذ الشي على حسابهم ليلة كاملة مغمضتش فيها عينها من التخمام و شوف هو وش قاعد يقول.
-يشوف فيها تبكي و هو مستغرب معرفش وش بيها دموعها أثرو فيه و حس بنغزة خفيفة في قلبو تكلم بصوت حنين على غير العادة : هند وش لي يبكي فيك.
-تسقسي فيا زعما أنت مش عارف وش لي يبكيني علاه من وكتا كان كلامك ميبكينيش من يوم عرفتك و كل حاجة فيك تبكيني إهانتك و جرحك ليا الظاهر أنهم إدمان و عمرك ما راح تتخلى عليهم حتى لو حطيتلك الجنة في طبسي متأكدة راح تخير جهنم لأنها مش مني.
-تصدم من كلامها و أول مرة يحس روحو حقير صح هو دايما يجرحها و ميفوتش فرصة إلا و يهينها قرب منها و بلا وعي منو هز يديه و مسح بطراف صباعو دموعها تكلم بصوت حنين قلما يظهرو للناس فما بالك لهند: حقك عليا علابالي راح تتصدمي من لي راح نقولو علا بالي قسيت عليك و علابالي بلي جرحتك مش مرة و مش زوج لكن صدقيني عمري لا تصورت أنو كلماتي راح يخليو فيك أثر كنت ديما نشوفك هند القوية لي متهزهاش أي كلمة لكن هاذا وين عرفت غلطتي و مهما كان انتي مراة في داخلها طفلة صغيرة تتجرح من أبسط كلمة.
-كانت تسمع فيه و مش مصدقة أنو هاذ الحكي خارج من فم هشام هشام الراجل المغرور لي يبخر بريحتها قاعد يعتذر منها الدموع لي كانو يطيحو من الحزن قبل شوي صارو دموع فرح وش راح تتمنى أكثر والو ما راح تتمنى والو كان حلمها أنو يجي نهار و يحكي معاها هشام بهاذ الطريقة يحس بيها و يتفهم شعورها .
-أشش و علاش كامل هاذ الدموع خلاص يخي قتلك سامحيني.
-علابالي مراحش تصدقني لكن هاذو دموع الفرحة ...شاف فيها مستغرب...متستغربش يا هشام لو تعرف هاذ القلب قداه هاز في داخلو من حب ليك راح تفهم و علاه نبكي لو تعرف هاذ القلب قداه تعذب و قداه بكى و قداه تقهر راح تفهم الشي لقاعد تشوفو هزت يديها ببطأ مررتها على لحيتو و ركزت عينيها في عينيه تعرف أنو كنت مستعدة ندفع الملاير مقابل أني نتلمس وجهك بيديا يمكن حبي ليك تشوفو جنون لكن أنا نشوفو حياة ..إيه حياة عايشتها و عايشة فيها و نعرف أنو راح يجي يوم و نودع هاذ لحياة لأنو قلبك مش ليا و عمرو ماراح يكون ليا.
-حسد روحو يمكن تستغربو من كلامي لكن هاذا هو الشي لي حسو و هو يسمع في كلامها حسد روحو أنو كاين وحدة تحبك كامل هاذ الحب و عمرها لا نساتك رغم أنها متأكدة بلي كل الي تبادلولها هو الكره حسد روحو و صابو الغرور أنو مهما جرالو مهما فقد و بعد على ناس هو عارف و متأكد أنو كاين قلب في هاذ العالم يفكر فيه يعشق فيه و مستعد يفديه بكل غالي تكلم بعد طول انتظار: تعرفي أنو بكلامك هاذا خليتيني نحس بتأنيب ضمير أنو واحد يحبني لهاذ الدرجة و ما لقا مني غير الصد و الجرح تأكدي ووعد مني من اليوم عمري لا راح نجرحك مرة أخرى صحيح منوعدكش لا بالحب و لا أنو نكونو زوجيين عاديين لكن من اليوم علاقتنا راح تصير علاقة صداقة مبنية على الصدق و الاحترام وش قلتي موافقة؟؟؟
-مسحت دموعها و تبسمتلو تبسيمة تاخذ لعقل هه و يسقسي فيها إذا موافقة أكيد موافقة.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
