كرونيك#الظل

#الظل_الحلقة 47

الحلقة 47:صوتو الرجولي مخلط ببحة زعزعتلها كيانها و أطربتلها مسامعها ولي هدها أكثر و قت جلست بقربو و شمت ريحة عطرو القوية تمنات تقرب منو أكثر حتى تلصق فيه و تشم ريحتو أكثر و أكثر رغم أنو مغطي وجهو إلا أنها حست بهيبة كبيرة كان يبان غامض و غموضو هو لي محليه و معطيه شخصية خلاف على كل الرجال ضحكت في سرها هههه و لي يسمعها يقول هاذي عاشرت كامل الرجال حتى تحكي هكذا و هي من غير جارهم الميلود معرفت حتى راجل مافاقت غير و هو يقدملها كاس التاي لي وجد و ريحتو سابقاتو مدت يدها باه تحكمو تلامست أصابعها مع صباع يدو حست برجفة سرات في كل جسمها إحساس أول مرة تجربو و تعيشو لمسة بسيطة دارت فيها هاذ الشيء مالا لوكان يلمس يدها كامل وش راح يكون ردة فعلها مجرد الفكرة خلات خدودها يتلونو بلون الورد يا ربي فاش راني نخمم.
-أما هو فمكانش أقل منها لمست يدها الصغيرة و ملمسهم الرطب الناعم كهربلو جسمو و خدرهولو لكنو بسرعة تمالك نفسو رص على يدو لي مسكها بيها بقوة حتى يخبي أي توتر و بعدها نطق:وش رايك فالتاي إن شاء الله يكون عجبك
-جاوبت و هي ذايبة فحوايجها من الحشمة :بنين يعطيك الصحة فكرني بتاي جدة ربي يرحمها.
-ربي يرحمها باين كنتي تعزيها بزاف.
-فوق ما تتصور أصلا هي كانت كل عيلتي من لي حليت عينيا لقيتها غير هي قدامي .
-سمعت بلي كنتي تخطفتي من باباك بصح كيفاه حتى وصلتي عند جداتك منضنش مرا كيفها تقدر تخطف.
-دارتلو مدهوشة صح مخمتش فهاد الشيء بابا قال بلي كنت مخطوفة و أنا كيفاه حتى وصلت عند جدة قالتلو:تصدق هذا وين فكرت في هاذ الشيء خلي كي يرتاح بابا نسقسيه.
-سامحيني إذا كنت أزعجتك بهاذ السؤال لكن كان مجرد فضول قاطعاتو :لا عادي اسئل كيما تحب أصلا معنديش أسرار باه نخبيهم و لا نخجل منهم حياتي بسيطة مفيها حتى تعقيد
جا باش يتكلم شاف سيارة العايلة قربت باه تدخل وقف و قالها سامحيني لكن لازم تمشي نضن مش راح يحبذو وجودك معايا وماتلو براسها و قاتلو شكرا على التاي و مشات و هي مش حابة كاين حاجة تجذب فيها ليه معرفتش واش هي تمنات لوكان بقات الليل كامل تحكي معاه يمكن من وحدتها فهاذ القصر و قعدتها نهار كامل بين أربع حيوط خلاها تحس بالملل و تتلصق في أي حد يعبرها و يحكي معاها.